ឆ្នាំ២០១៧ ក្រសួងការងារ បានដោះស្រាយវិវាទបុគ្គលជិត ៥០០ករណី

ជាតិ

សង្គមជាតិ

ឆ្នាំ២០១៧ ក្រសួងការងារ បានដោះស្រាយវិវាទបុគ្គលជិត ៥០០ករណី

28, Aug 2018 , 7:59 am

រូបភាព

ប្រភព៖ គេហទំព័រក្រសួងការងារ

ដោយ:

ភ្នំពេញ៖ នៅឆ្នាំ២០១៧ នាយកដ្ឋានវិវាទការងារ បានដោះស្រាយវិវាទបុគ្គលចំនួន ៤៧៦ករណី ដោយក្នុងនោះ សះជា ២២៨ករណី មិនសះជា ១៩១ករណី និងមោឃៈ ៥៧ករណី។ ជាមួយគ្នានេះ ការដោះស្រាយវិវាទការងាររួមចំនួន ១២៧ករណី សះជា ៥៦ករណី និងមិនសះជា ៧០ករណី និងមោឃៈ ១ករណី។ នេះបើតាមការផ្សាយនៃគេហទំព័រក្រសួងការងារ នៅថ្ងៃទី២៧ ខែសីហា។

ក្រសួងការងារ និងបណ្ដុះបណ្ដាលវិជ្ជាជីវៈ តាមរយៈនាយកដ្ឋានវិវាទការងារ បានដើរតួយ៉ាងសំខាន់ ក្នុងការធានាភាពសុខដុមរមនានៃទំនាក់ទំនងវិជ្ជាជីវៈប្រកបដោយប្រសិទ្ធភាពតាមរយៈយន្តការផ្សះផ្សាវិវាទ ស្របតាមបទប្បញ្ញត្តិនៃច្បាប់ស្តីពីការងារ រួមជាមួយនឹងលិខិតបទដ្ឋានគតិយុត្តពាក់ព័ន្ធ។ នេះបើតាមការលើកឡើងរបស់ លោក អ៊ិត សំហេង រដ្ឋមន្ត្រីក្រសួងការ និងបានបន្តថា ក្នុងនោះដែរ ក៏មានប្រកាសស្តីពីនីតិវិធីនៃការដោះស្រាយវិវាទការងាររួម ប្រកាសស្តីពីនីតិវិធីនៃការដោះស្រាយវិវាទបុគ្គល ប្រកាសស្តីពីក្រុមប្រឹក្សាអាជ្ញាកណ្តាល និងប្រកាសស្តីពីការតែងតាំងក្រុមប្រឹក្សាអាជ្ញាកណ្តាល ព្រមទាំងច្បាប់ស្តីពីសហជីព ដែលទើបនឹងត្រូវបានអនុម័ត។

លោក អ៊ិត សំហេង លើកឡើងបន្តថា នៅឆ្នាំ២០១៦ ក្រុមប្រឹក្សាអាជ្ញាកណ្តាលបានទទួលសំណុំរឿងវិវាទជាង២៦៥០ករណី ដែលពាក់ព័ន្ធផ្ទាល់ជាមួយកម្មករនិយោជិតជាង១លាននាក់។ លោក និយាយថា ក្នុងចំណោមសំណុំវិវាទជាង២ពាន់នេះ ទទួលជោគជ័យបាន ៧៥ភាគរយ តាមរយៈការផ្សះផ្សា និងមជ្ឈត្តកម្ម ដោយចំណាយពេលជាមធ្យម ១៧ថ្ងៃ។

ក្រសួងការងារ និងក្រុមប្រឹក្សាអាជ្ញាកណ្ដាល ជាដៃគូកិច្ចសហការជាមួយគ្នារយៈពេល ១៥ឆ្នាំមកហើយ ក្នុងការឆ្ពោះទៅរកប្រព័ន្ធទំនាក់ទំនងវិជ្ជាជីវៈមួយល្អប្រសើរសម្រាប់កម្មករនិងនិយោជក។ នេះបើតាមការបន្ថែមរបស់រដ្ឋមន្ត្រីក្រសួងការងាដដែល ហើយបានបន្តថា កិច្ចសហការនេះ បានសម្រេចនូវសមិទ្ធផលជាច្រើនគួរឱ្យកត់សម្គាល់ រួមទាំងការដោះស្រាយវិវាទការងារដែលបានលើកឡើងខាងលើ។

នៅក្នុងកិច្ចប្រជុំពិសេសរបស់ភាគីពាក់ព័ន្ធនៃក្រុមប្រឹក្សាអាជ្ញាកណ្ដាល នាព្រឹកថ្ងៃទី២៧ ខែសីហា នៅសណ្ឋាគារ សាន់វេ លោក អ៊ិត សំហេង បានលើកឡើងបន្តទៀតថា បច្ចុប្បន្ន ក្រសួងបានចេញប្រកាសចំនួន ៤បន្ថែម ទៅលើប្រកាសដែលមានស្រាប់ចំនួន៤ ពាក់ព័ន្ធនឹងការអនុវត្តច្បាប់ស្ដីពី សហជីពឱ្យមានលក្ខណៈកាន់តែប្រសើរ និងគ្រប់ជ្រុងជ្រាយ។ លោក និយាយទៀតថា ជាក់ស្ដែងគិតត្រឹមឆ្នាំ២០១៧ ក្រសួងបានចុះបញ្ជីសហជីពមូលដ្ឋានចំនួន៣៧៩៣ សហព័ន្ធសហជីពចំនួន១៣៨ សហភាពសហជីពចំនួន២៣ និងសមាគមនិយោជកចំនួន៨។

ស្របតាមផែនការយុទ្ធសាស្ត្រ ២០១៤-២០១៨ ទាក់ទងនឹងនិរន្តរភាពនៃមូលនិធិក្រុមប្រឹក្សាអាជ្ញាកណ្តាល ក្រសួងនឹងសហការឱ្យកាន់តែជិតស្និទ្ធ ជាមួយមូលនិធិក្រុមប្រឹក្សាអាជ្ញាកណ្តាល ដើម្បីជួយដល់មូលនិធិក្នុងការអនុវត្តផែនការយុទ្ធសាស្ត្រ អំពីនិរន្តរភាពរបស់ក្រុមប្រឹក្សាអាជ្ញាកណ្តាល សម្រាប់រយៈពេលមធ្យម និងវែង ម្យ៉ាងទៀតក្នុងការឱ្យស្ថាប័នមួយនេះអាចដំណើរការការងាររបស់ខ្លួនឱ្យកាន់តែមានប្រសិទ្ធភាពខ្ពស់ និងឆ្លើយតបទៅនឹងតម្រូវការរបស់ភាគីពាក់ព័ន្ធជានិរន្តតទៅ។ នេះបើតាមក្រសួងការងារដដែល៕