មួយឆ្នាំក្រោយវិបត្តិផ្ទុះឡើង ជនភៀសខ្លួនរ៉ូហ៊ីងយ៉ារាប់សែននាក់នៅតែបន្តស្រែករកយុត្តិធម៌

អន្តរជាតិ

មួយឆ្នាំក្រោយវិបត្តិផ្ទុះឡើង ជនភៀសខ្លួនរ៉ូហ៊ីងយ៉ារាប់សែននាក់នៅតែបន្តស្រែករកយុត្តិធម៌

28, Aug 2018 , 8:59 am

រូបភាព

ដោយ:

គឺរយៈពេលមួយឆ្នាំហើយ ដែលវិបត្តិជនភៀសខ្លួនជនជាតិភាគតិចរ៉ូហ៊ីងយ៉ា នៃមីយ៉ាន់ម៉ា បានផ្ទុះឡើងនិងបន្តគ្មានដំណោះស្រាយសមស្រប។ ជនភៀសខ្លួនជនជាតិភាគតិចរ៉ូហ៊ីងយ៉ារាប់សែននាក់ពីរដ្ឋរ៉ាខាន (Rakhine) របស់មីយ៉ាន់ម៉ា បានរត់ចេញពីប្រទេសទៅព្រំដែនបង់ក្លាដែសជាមួយភាពភ័យខ្លាច។ ពេលនេះ ពួកគេ នៅតែរន្ទឹងរង់ចាំការផ្តល់យុត្តិធម៌ ខណៈរស់នៅក្នុងស្ថានភាពមិនល្អជាច្រើនខែហើយនោះ។

២៥ សីហា ឆ្នាំ២០១៧ គឺជាព្រឹត្តិការណ៍ដ៏រន្ធត់មួយរបស់ជនជាតិភាគតិចរ៉ូហ៊ីងយ៉ា ដែលរស់នៅក្នុងរដ្ឋរ៉ាខាន ភាគជើងនៃមីយ៉ាន់ម៉ា ដែលជាតំបន់ភូមិសាស្ត្រឧស្សាហ៍មានការប៉ះទង្គិចគ្នារវាងសហគមន៍ពីរគឺសហគមន៍ជនជាតិភាគតិចម៉ូស្លីម និងសហគមន៍ពុទ្ធសាសនិក។ គឺថ្ងៃនេះ២៥ សីហានេះហើយ ដែលមានការប៉ះវាយប្រហារប្រដាប់អាវុធរវាងក្រុមឧទ្ទាម និងកងកម្លាំងរដ្ឋាភិបាលមីយ៉ាន់ម៉ា រហូតដល់ប៉ះពាល់ដល់ការរស់នៅរបស់ប្រជាជនក្នុងសហគមន៍ ដែលត្រូវបង្ខំចាកចេញពីលំនៅដ្ឋានរបស់ខ្លួន។

តែគួរឲ្យកត់សម្គាល់នោះ តាមរបាយការណ៍របស់អង្គការជំនាញសិទ្ធិមនុស្ស រួមទាំងភ្នាក់ងារជំនាញរបស់អង្គការសហប្រជាជាតិផង ឧប្បទ្ទវហេតុនេះ ហាក់ដូចជាការប៉ុនប៉ងមួយរបស់កងកម្លាំងមីយ៉ាន់ម៉ាដើម្បីបោសសម្អាតជនជាតិភាគតិចរ៉ូហ៊ីងយ៉ាន។ ការណ៍ដែលរបាយការណ៍អាចហ៊ានអះអាងបែបនេះ ដោយយោងតាមការកិច្ចសម្ភាសន៍ផ្ទាល់ពីជនរងគ្រោះ ដែលរួចផុតពីជីវិតពីការធ្វើបាបរបស់កម្លាំង។

តាមរបាយការណ៍ ព្រឹត្តិការណ៍ជាសោកនាដកម្មរបស់ជនភៀសខ្លួនជាងកន្លះលាននាក់នេះ បានបង្កប់ជាមួយនឹងបទល្មើសរំលោភបំពានសិទ្ធិមនុស្សធ្ងន់ធ្ងរជាច្រើនរួមទាំង រំលោភហិង្សា ទារុណកម្ម ការបាត់ខ្លួន និងការសម្លាប់ក្រៅប្រព័ន្ធតុលាការ។ ដោយសារតែហេតុការណ៍ហើយទើបធ្វើឲ្យសហគមន៍អន្តរជាតិ ជាពិសេសភ្នាក់ងារជំនាញអង្គការសហប្រជាជាតិ បន្តឈឺឆ្អាលតាមរយៈការទទូចឲ្យរដ្ឋាភិបាលមីយ៉ាន់ម៉ាទទួលយកជនភៀសខ្លួន និងធានាពីការវិលត្រលប់ឲ្យបានប្រសើរ ខណៈបន្តផ្តល់ជំនួយមនុស្សដល់ពួកគេសម្រាប់ការរស់នៅប្រចាំថ្ងៃបណ្តោះអាសន្នផង។

សូម្បីតែអគ្គរដ្ឋអាជ្ញា នៃតុលាការព្រហ្មទណ្ឌអន្តរជាតិ ក៏ព្យាយាមរកយុត្តិធម៌ឲ្យជនរងគ្រោះតាមរយៈការស្នើឲ្យមានការជំនុំជម្រះដើម្បីស្វែងរកយុត្តាធិការលើសំណុំរឿងមួយនេះ ទាំងដឹងហើយថា មីយ៉ាន់ម៉ា មិនមែនជាភាគីលក្ខន្តិកៈក្រុងរ៉ូម នៃតុលាការព្រហ្មទណ្ឌអន្តរជាតិផង។

រយៈពេលកន្លងមកនេះ រដ្ឋាភិបាលមីយ៉ាន់ម៉ា ក៏បានចុះព្រមព្រៀងមួយចំនួនផងដែរជាមួយនឹងរដ្ឋាភិបាលបង់ក្លាដែស និងភ្នាក់ងារជំនាញរបស់អង្គការសហប្រជាជាតិពាក់ព័ន្ធនឹងការបញ្ជូនជនភៀសខ្លួនត្រលប់ទៅវិញ។ ក៏ប៉ុន្តែ កិច្ចព្រមព្រៀង នៅមិនទាន់ត្រូវបានអនុវត្តនៅឡើយនោះទេ ខណៈសហគមន៍អន្តរជាតិ បន្តទទូចឲ្យមីយ៉ាន់ម៉ាសហការជាមួយ និងផ្តល់លទ្ធភាពឲ្យក្រុមការងារឲ្យចូលទៅបំពេញបេសកកម្មរបស់ខ្លួននៅក្នុងតំបន់រងផលប៉ះពាល់ទាំងនោះ៕