ជាតិ
សង្គមជាតិ
សមត្ថកិច្ច រឹបអូសប៊ីចេងក្លែងក្លាយ១៧តោន នៅទួលសង្កែទី២ និងនៅចោមចៅ
× នគរបាលប្រឆាំងបទល្មើសសេដ្ឋកិច្ច សហការជាមួយមន្ត្រីកាំកុងត្រូល និងអាជ្ញាធរមូលដ្ឋាន បានចុះឆែកឆេរផ្ទះ២កន្លែងនៅភ្នំពេញ ដែលលួចវេចខ្ចប់ផលិតប៊ីចេងក្លែងក្លាយ និងរំលោភកម្មសិទ្ធិបញ្ញាប្រមាណ១៧តោន។ សមត្ថកិច្ច បានរឹបអូសផលិតប៊ីចេងក្លែងក្លាយទាំងនោះ ហើយនាំម្ចាស់ទីតាំង ទៅចាត់ការតាមនីតិវិធី។ នេះបើតាមការផ្សាយរបស់គេហទំព័រនគរបាលជាតិ នៅថ្ងៃទី២៧ ខែសីហា។
នគរបាលជាតិបានឱ្យដឹងថា ក្នុងប្រតិបត្តិការឆែកឆេរខាងលើនេះ សមត្ថកិច្ចរកឃើញទីតាំងដែលបានវេចខ្ចប់ប៊ីចេងក្លែងក្លាយ និងភស្តុតាងរួមមាន ប៊ីចេងបាវសចំនួន ៣៥២បាវ, ប៊ីចេងបាវគគីរ១២៥បាវ, ប៊ីចេងរាយម៉ាក Win win ១៤០បាវ, ប៊ីចេងច្រករួច ៣២បាវ, ប៊ីចេងច្រករួចម៉ាក Gold Cup ៤៧កេស, ប៊ីចេងរូបវែក (250g), ម៉ាស៊ីនដេរម៉ាត់បាវ ២គ្រឿង, ម៉ាស៊ីនអ៊ុតម៉ាត់ថង់ ១គ្រឿង, ម៉ាស៊ីនរុំខ្សែ និងកាត់ខ្សែ ២គ្រឿង, ជញ្ជីងថ្លឹង ២គ្រឿង, បាវរូបវែក ៩៣បាវ និងប៊ីចេងរាយមិនទាន់វេចខ្ចប់មួយចំនួនទៀត សរុបទំងន់ទាំងអស់ប្រមាណ ១៧តោន។
នគរបាលជាតិ បានស្រង់សម្ដីឧត្តមសេនីយ៍ឯក ចាន់ វ៉ាន់ធឿន ប្រធាននាយកដ្ឋាននគរបាលប្រឆាំងបទល្មើសសេដ្ឋកិច្ចទៅចុះផ្សាយថា ក្រោយពីបានស្រាវជ្រាវស៊ើបអង្កេត កម្លាំងជំនាញនាយកដ្ឋាន បានសហការជាមួយមន្ត្រីកាំកុងត្រូល និងអាជ្ញាធរមូលដ្ឋាន និងអាជ្ញាធរពាក់ព័ន្ធ បានចុះបង្ក្រាបទីតាំងវេចខ្ចប់ប៊ីចេងក្លែងក្លាយដែលមានទីតាំងនៅរាជនីភ្នំពេញពីរកន្លែង ហើយបានឃើញវត្ថុតាងជាច្រើន។
លោក បន្ថែមថា ទីតាំងទាំងពីរកន្លែងគឺ ទីតាំងទី១ស្ថិតនៅផ្ទះ លេខAB4-5 ផ្លូវ56R សង្កាត់ទួលសង្កែទី២ ខណ្ឌឫស្សីកែវ រកឃើញប៊ីចេងក្លែងម៉ាក និងក្លែងក្លាយ និងទីតាំងទី២ ស្ថិតនៅភូមិទួលពង្រ សង្កាត់ចោមចៅ ខណ្ឌពោធិ៍សែនជ័យ។ នេះបើតាមនគរបាលជាតិ ដែលបានស្រង់សម្ដី លោក គង់ វុទ្ធី អនុប្រធានសាខាកាំកុងត្រូលផែស្ងួតចុងទីភ្នំពេញ និងបានឲ្យដឹងទៀតថា ថ្វីដ្បិតតែក្រុមការងារមិនទាន់យកប៊ីចេងនេះទៅពិសោធនៅក្នុងម៉ាស៊ីនឡាបូក៏ពិតមែន ប៉ុន្តែតាមការពិនិត្យជាបឋមឃើញថា ប៊ីចេងនេះ គឺក្លែងក្លាយ ហើយក្លែងម៉ាកផងដែរ ដែលអាចធ្វើឲ្យប៉ះពាល់ខ្លាំងដល់សុខភាពអ្នកបរិភោគ៕
Tag:
ប៊ីចេងក្លែងក្លាយ
ចាន់ វ៉ាន់ធឿន
© រក្សាសិទ្ធិដោយ thmeythmey.com