ផ្លូវសមុទ្រដ៏មមាញឹកនៅជ្រោយ Hormuz ស្ថិតនៅនៅចន្លោះរវាងអ៊ីរ៉ង់និងអូម៉ង់ក្លាយជាប្រធានបទចម្រូងចម្រាស និងក្តៅគគុកនៅសប្តាហ៍នេះ ក្រោយកងទ័ពជើងទឹកអ៊ីរ៉ង់អះអាងថា ជ្រោយនេះជាកម្មសិទ្ធិផ្តាច់មុខ របស់អ៊ីរ៉ង់ផ្ទាល់។ ការបិទច្រកពាណិជ្ជកម្មសមុទ្រយុទ្ធសាស្ត្រនេះអាចធ្វើឲ្យមានបញ្ហាច្រើនដុចជាការកាត់ផ្តាច់ការដឹកជញ្ជូនប្រេង ធ្វើឲ្យប្រេងឡើងថ្លៃ និងផ្ទុះឡើងបញ្ហាសន្តិសុខតំបន់ទៀត។ ឥឡូវនេះសហរដ្ឋអាមេរិកដែលកំពុងដាក់សម្ពាធលើអ៊ីរ៉ង់តាមរយៈទណ្ឌកម្មថ្មី បានគំរាមអ៊ីរ៉ង់ និងត្រៀមសហការជាមួយសម្ព័ន្ធមិត្តដើម្បីរក្សាសេរីភាពនាវាចរណ៍តាមច្រកសមុទ្រអន្តរជាតិ។
បញ្ហាភូមិសាស្ត្រនយោបាយនេះកាន់តែឡើងកំដៅបន្ទាប់ពីមេបញ្ជាការកងទ័ពជើងទឹកសាធារណរដ្ឋឥស្លាមអ៊ីរ៉ង់ប្រកាសថា ឈូងសមុទ្រពែក្យទាំងមូល រួមជាមួយជ្រោយ Hormuz ស្ថិតក្រោមការគ្រប់គ្រងរបស់ខ្លួន ហើយនាវាដែលឆ្លងកាត់ទាំងនាវាដឹកជញ្ជូន និង នាវាយោធាក៏ស្ថិតក្រោមការគ្រប់គ្រងរបស់ខ្លួនដូចគ្នា។
បើតាមទីភ្នាក់ងារព័ត៌មាន Reuters មេបញ្ជាការកងទ័ពជើងទឹកនៃឆ្មាំបដិវត្តន៍អ៊ីរ៉ង់លោក Alireza Tangsiri ដូច្នេះថា៖« យើងអាចធានាសន្តិសុខនៅឈូងសមុទ្រពែក្យ ហើយវាមិនចាំបាច់ត្រូវមានវត្តមានមហាអំណាចខាងក្រៅដូចជាអាមេរិកឬប្រទេសដទៃដែលមិនមានទីតាំងនៅទីនេះឡើយ។
មន្ត្រីជាន់ខ្ពស់រូបនេះបន្ថែមថា រាល់នាវាឆ្លងកាត់ទាំងយោធា ឬមិនមែនយោធាគឺស្ថិតក្រោមការគ្រប់គ្រងរបស់អ៊ីរ៉ង់ ហើយវត្តមានរបស់អ៊ីរ៉ង់នៅក្នុងតំបន់គឺមិនផ្លាស់ប្តូរទាំងយប់ និងថ្ងៃ។
អ៊ីរ៉ង់យកបញ្ហាជ្រោយ Hormuz មកដាក់សម្ពាធលើភាគីពាក់ព័ន្ធជាពិសេសសហរដ្ឋអាមេរិក និងសម្ព័ន្ធមិត្តក្នុងតំបន់រដ្ឋឥស្លាមនិកាយស៊ូនីដូចជាអារ៉ាប៊ីសាអូឌីត និងអារ៉ាប់រួមអេមីរ៉ាត់ ស្របពេលដែលអាមេរិកដាក់ទណ្ឌកម្មប្រឆាំងអ៊ីរ៉ង់ឡើងវិញបន្ទាប់ពីបោះបង់កិច្ចព្រមព្រៀងនុយក្លេអ៊ែរអ៊ីរ៉ង់ឆ្នាំ ២០១៥។ កន្លងមកប្រធានាធិបតីអ៊ីរ៉ង់លោក ហាសាន់ រូហានី (Hassan Rouhani) ធ្លាប់គំរាមថា បើសិនជាទណ្ឌកម្មអាមេរិកធ្វើឲ្យប៉ះពាល់ដល់ការនាំចេញប្រេងឆៅរបស់អ៊ីរ៉ង់ ការនាំចេញប្រេងផ្សេងទៀតពីមជ្ឈិមបូព៌ាក៏ត្រួវប៉ះពាល់ដូចគ្នា។
ក្រោយការប្រកាសរបស់អ៊ីរ៉ង់លើការគ្រប់គ្រងជ្រោយ Hormuz នេះ រដ្ឋមន្ត្រីការបរទេសអាមេរិកលោក ម៉ៃ ប៉ុមប៉េអូ បានចេញមុខឆ្លើយតបវិញដូចគ្នាដោយទាត់ចោលសិទ្ធិផ្តាច់មុខរបស់អ៊ីរ៉ង់ និងត្រៀមសហការជាមួយប្រទេសដទៃដើម្បីឆ្លើយតបនឹងបញ្ហានេះ។
លោក ប៉ុមប៉េអូ បានបញ្ជាក់តាមគណនី Twitter របស់ខ្លួនថា៖« សាធារណរដ្ឋឥស្លាមអ៊ីរ៉ង់មិនគ្រប់គ្រងជ្រោយ Hormuz ឡើយ។ ជ្រោយនេះជាដែនទឹកអន្តរជាតិ។ សហរដ្ឋអាមេរិកនឹងបន្តសហការជាមួយប្រទេសជាដៃគូក្នុងតំបន់ដើម្បីធានាសេរីភាពនៃការធ្វើនាវាចរណ៍ និងលំហូរពាណិជ្ជកម្មឆ្លងការតាមដែនទឹកអន្តរជាតិនេះ»។
គេមិនទាន់ដឹងថា សហរដ្ឋអាមេរិកនឹងចេញវិធានការបែបណាឡើយជុំវិញការប្រកាសរបស់អ៊ីរ៉ង់នេះ ប៉ុន្តែការសម្រេចបិទការឆ្លងកាត់ជ្រោយ Hormuz នឹងបង្កើតឲ្យមានបញ្ហាឈឺក្បាលច្រើនជាពិសេសការកាត់ផ្តាច់ការដឹកជញ្ជូនប្រេង និងការប្រឈមមុខដាក់គ្នាក្នុងតំបន់រវាងប្រទេសដែលមានផលប្រយោជន៍ក្នុងការនាំប្រេងចេញផង។
-ហេតុអ្វីជ្រោយ Hormuz សំខាន់?
ការគំរាមបិទជ្រោយ Hormuz របស់អ៊ីរ៉ង់ដើម្បីបង្កើតរឿងចម្រូងចម្រាសគឺទាក់ទិននឹងបញ្ហាភូមិសាស្ត្រនយោបាយ។ គេប្រហែលជានៅចាំរឿងរ៉ាវដែលធ្វើរុស្ស៊ីលើកទ័ពឈ្លានពានអ៊ុយក្រែន។ តាមពិតទៅរុស្ស៊ីលេបត្របាក់យកឧបទ្វីបគ្រីមៀមិនមែនរឿងចៃដន្យទេ តែវាជារឿងភូមិសាស្ត្រនយោបាយដូចគ្នា។ រុស្ស៊ីមិនអាចបាត់បង់គ្រីមៀដែលដែលខ្លួនមានតាំងមូលដ្ឋានទ័ពជើងទឹកនៅកំពង់ផែ Sevastopol ឡើយ។ វាជាកំពង់ផែដែលមិនកក(Warm Water Port) តែមួយគត់ដែលរុស្ស៊ីអាចប្រើប្រាស់បានគ្រប់កាលៈទេសៈភ្ជាប់ទៅសមុទ្រខ្មៅ និងឆ្លងទៅសមុទ្រមេឌីទែរ៉ាណេក្នុងពេលសន្តិភាព ឬពេលសង្ក្រាម។
ត្រឡប់មកជ្រោយ Hormuz គឺដូចគ្នា។ ឈូងសមុទ្រពែក្យជាតំបន់ដែលផលិតប្រេងនាំមុខគេ ហើយផលិតបានប្រេង ៣០ភាគរយសម្រាប់ផ្គត់ផ្គង់ទីផ្សារពិភពលោកទាំងមូល។ ចំណែកជ្រោយ Hormuz ដែលមានទំហំប្រហែល ៣៤ គីឡូម៉ែត្រជាច្រកពាណិជ្ជកម្មតាមផ្លូវសមុទ្រដ៏សំខាន់ និងមរមាញឹកបំផុតមួយលើពិភពលោក ដែលរដ្ឋនាំប្រេងចេញក្នុងតំបន់ដូចជា បារ៉ែន, អ៊ីរ៉ង់, អ៊ីរ៉ាក់, គុយវ៉ែត, កាតា, អារ៉ាប៊ីសាអូឌីត និងអារ៉ាប់រួម អេមីរ៉ាត់ ប្រើប្រាស់ដើម្បីជញ្ជូនប្រេងទៅលក់នៅទីផ្សារអន្តរជាតិរៀងរាល់ថ្ងៃ។
បើតាមរបាយការណ៍រដ្ឋបាលព័ត៌មានថាមពលអាមេរិក (EIA) ប្រេងប្រហែល ១៧ លានបារ៉ែលដែលស្មើ ៣៥ភាគរយនៃប្រេងដែលត្រូវដឹកជញ្ជូនតាមសមុទ្រគឺត្រូវឆ្លងកាត់ជ្រោយនេះ។ វាក៏ជាច្រកដ៏សំខាន់បំផុតមួយសម្រាប់ការដឹកជញ្ជូនប្រេងទៅកាន់ទីផ្សារអាស៊ីបូព៌ាដូចគ្នា។ របាយការណ៍ព័ត៌មានថាមពលអាមេរិកឆ្នាំ ២០១៦ ក៏បង្ហាញថា អាមេរិកនាំចចូលប្រេង ១៨ភាគរយពីរដ្ឋឈូងសមុទ្រពែក្យនេះដែរ។
ដូច្នេះហើយ រាល់ការកាត់ផ្តាច់ការដឹកជញ្ជូនទំនិញតាមជ្រោយនេះទោះជាក្នុងរយៈពេលខ្លី ឬវែងក៏ដោយនឹងបង្កើតបញ្ហាធ្ងន់ធ្ងរទាំងសន្តិសុខ និងការខាតបង់សេដ្ឋកិច្ច។ ឧទាហរណ៍ជាក់ស្តែងគឺ ប្រទេសឈូងសមុទ្រពែក្យដែលនាំប្រេងចេញនឹងបាត់បង់ចំណូលច្រើនដោយសារប្រេងដែលនាំចេញត្រូវកាត់ផ្តាច់ ខណៈដែលប្រទេសនាំប្រេងនោះក៏ត្រូវប្រឈមមុខនឹងការខ្វះខាតប្រេង និងត្រូវនាំចូលប្រេងដែលមានតម្លៃថ្លៃដូចគ្នា។ បើសិនបិទច្រកនេះកាន់តែយូរ វានឹងមានការខាតបង់កាន់តែធំដូចគ្នា។
កន្លងមក ប្រទេសឈូងសមុទ្រពែក្យព្យាយាមរកវិធីសាស្ត្រដើម្បីធានាការនាំចេញថាមពលដោយគ្មានកាត់ផ្តាច់ បើទោះជាអ៊ីរ៉ង់បិទជ្រោយនេះក៏ដោយ។ ទីមួយ ប្រទេសទាំងនោះបានកសាងផ្លូវសម្រាប់នាំប្រេងចេញដោយឡែកពោលគឺ វិនិយោគលើការកសាងបំពង់ប្រេង។ ប៉ុន្តែតាមស្ថានភាពជាក់ស្តែង សមត្ថភាពបំពង់ប្រេងនេះនៅតែមិនអាចជួយឲ្យបណ្តាប្រទេសទាំងនោះកាត់បន្ថយការប្រើប្រាស់ជ្រោយ Hormuz ទាំងស្រុងឡើយ។
វីធីសាស្ត្រទីពីរ គឺរដ្ឋឈូងសមុទ្រពែក្យពឹងពាក់អាមេរិកដោយបង្កើតសម្ព័ន្ធសន្តិសុខដើម្បីធានាថា ជ្រោយនេះមិនត្រូវបានបិទក្នុងប្រការណាមួយទេ។ ដូចបានរៀបរាប់ខាងដើមស្រាប់អាមេរិកមានប្រយោជន៍នៅទីនោះ ដែលវាមានន័យថា អាមេរិកត្រូវធានានិរន្តភាពនៃថាមពលសម្រាប់នាំចូល និងការពារសន្តិសុខតំបន់ផង។
-អ៊ីរ៉ង់អាចបិទច្រក តែអាមេរិកត្រូវប្រើកម្លាំងតប?
តាមពិតទៅ ការដកខ្លួនចេញពីកិច្ចព្រមព្រៀងអ៊ីរ៉ង់ឆ្នាំ ២០១៥ របស់ប្រធានាធិបតីលោក ដូណាល់ ត្រាំ និងការដាក់ទណ្ឌកម្មប្រឆាំងអ៊ីរ៉ង់ឡើងវិញជាដើមហេតុសំខាន់ដែលបណ្តាលឲ្យស្ថានការណ៍មជ្ឈិមបូព៌ាកាន់តែធ្ងន់ធ្ងរ។ រឿងដែលគួរឲ្យបារម្ភនោះ គឺអ៊ីរ៉ងអាចនឹងបិទច្រកនេះតាមការគំរាមរបស់ខ្លួន។
អ៊ីរ៉ង់អាចពង្រាយមីនក្រោមទឹកដើម្បីប្រឆាំងរាល់នាវាដែលឆ្លងកាត់ជ្រោយនេះ ស្របពេលដែលគេសង្កេតឃើញមហាអំណាចតំបន់នេះបន្តសម្ញែងសាច់ដុំយោធាបន្តបន្ទាប់តាមរយៈសមយុទ្ធយោធា។
វាច្បាស់ណាស់ថា រាល់ការដោះស្រាយបញ្ហានេះ វាតម្រូវឲ្យអាមេរិកប្រើកម្លាំងទ័ព។ ថ្វីបើអ៊ីរ៉ង់ដឹងច្បាស់ថា កងទ័ពជើងទឹកខ្លួនគ្មានសមត្ថភាពអាចកម្ចាត់ទ័ពជើងទឹកអាមេរិកឡើយ។ ប៉ុន្តែយ៉ាងហោចណាស់ មហាអំណាចតំបន់មួយនេះចង់ក្រឡុកស្ថានការណ៍ និងធ្វើវាកាន់តែច្របូកច្របល់ដែរ។
ការខាតបង់សេដ្ឋកិច្ចជារឿងមួយសំខាន់ ប៉ុន្តែការប្រឈមមុខដាក់គ្នា ឬប៉ះទង្គិចគ្នាដោយយោធានោះនឹងមានផលប៉ះពាល់នឹងធំធេងពិបាកស្មាន។
កាលពីដើមខែសីហានេះ មេបញ្ជាការនៃទីបញ្ជាការយោធាកណ្តាលកងទ័ពអាមេរិកលោកឧត្តមសេនីយ៍ Joseph Votel ធ្លាប់លើកឡើងពីការបង្ហាញសមត្ថភាពរបស់កងទ័ពអ៊ីរ៉ង់កន្លងមក ជាពិសេសមត្ថភាពក្នុងការពង្រាយមីនសមុទ្រ,ដាក់គ្រឿងផ្ទុះលើទូកក្នុងដែនទឹក និងការប្រើប្រាស់មីស៊ីលតាមបណ្តាយជ្រោយនេះផង។ ប៉ុន្តែលោកសង្កត់ធ្ងន់ថា អាមេរិក និងសម្ព័ន្ធមិត្តជានិច្ចជាកាលបានបន្តហ្វឹកហ្វឺននិងបង្កើនសមត្ថភាពត្រៀមខ្លួនជានិច្ចដើម្បីឆ្លើយតបនឹងបញ្ហាដែលធានាបានសេរីភាពនៃការធ្វើនាវាចរណ៍ និងលំហូរពាណិជ្ជកម្មអន្តរជាតិ។
ដោយឡែកនៅដើមសប្តាហ៍នេះ មន្ត្រីយោធាអាមេរិកបានលើកឡើងជាថ្មីទៀតថា វិធានការតឹងរ៉ឹងអាចនឹងត្រូវដាក់ចេញដើម្បីកំញើញអ៊ីរ៉ង់ផង បើសិនជាស្ថានភាពកាន់តែអាក្រក់នោះ។
ក្នុងបទសម្ភាសន៍ជាមួយទូរទស្សន៍ Fox News នៅថ្ងៃចន្ទ អ្នកនាំពាក្យទីបញ្ជាការកណ្តាលកងទ័ពជើងទឹកអាមេរិកលោក Chloe Morgan បានបញ្ជាក់ថា អាមេរិកនិងដៃគូនឹងបន្តលើកស្ទួយសន្តិសុខ និងស្ថិរភាពក្នុងតំបន់ជារៀងរាល់ថ្ងៃ។ មិនត្រឹមតែប៉ុណ្ណោះភាគីពាក់ព័ន្ធត្រៀមខ្លួនរួចហើយដើម្បីធានាសេរីភាពនាវាចរណ៍ និងលំហូរដោយសេរីនៃទំនិញតាមដែនទឹកអន្តរជាតិ៕