រុស្ស៊ី៖ ស៊ីរីត្រៀមខ្លួនរួចហើយដើម្បីទទួលយកជនភៀសខ្លួនមួយលាននាក់ទៀតត្រឡប់មកវិញ

អន្តរជាតិ

រុស្ស៊ី៖ ស៊ីរីត្រៀមខ្លួនរួចហើយដើម្បីទទួលយកជនភៀសខ្លួនមួយលាននាក់ទៀតត្រឡប់មកវិញ

29, Aug 2018 , 8:39 am

រូបភាព

ដោយ: ថ្មីៗ

ក្រសួងការពារជាតិរុស្ស៊ីបានបញ្ជក់ថា រដ្ឋរងគ្រោះដោយសារសង្គ្រាមស៊ីវិលរ៉ាំរ៉ៃ«ស៊ីរី»ត្រៀមលក្ខណៈរួចហើយដើម្បីទទួលជនភៀសខ្លួនមួយលាននាក់ត្រឡប់មកវិញ។ បច្ចុប្បន្ននេះ រុស្ស៊ីដែលជាខ្នងបង្អែករបបដឹកនាំស៊ីរីនោះកំពុងជួយគាំទ្រគម្រោងស្តារហេដ្ឋារចនាសម្ព័ន្ធនៅស៊ីរីឡើងវិញកំពុងបន្តទៅមុខ។

ថ្ងៃអង្គារទី ២៨ ខែសីហា រដ្ឋមន្ត្រីការពារជាតិរុស្ស៊ីលោក Sergei Shoigu បានថ្លែងប្រាប់អ្នកសារព័ត៌មានថា ក្រោយរដ្ឋាភិបាលស៊ីរីបន្តរំដោះបានទឹកដីជាច្រើនពីក្រុងភេរវជនច្រើនលាននាក់បានត្រឡប់ទៅរស់នៅស្រុកកំណើតវិញកន្លងមក។

បើតាមការចុះផ្សាយរបស់ទីភ្នាក់ងារព័ត៌មានរុស្ស៊ី TASS ប្រមុខការពារជាតិរូបនេះបានបន្តថា បច្ចុប្បន្ននេះស៊ីរីក៏ត្រៀមលក្ខណៈរួចរាល់ហើយដែរក្នុងការទទួលយកជនភៀសខ្លួនមួយលាននាក់បន្ថែមទៀតត្រឡប់មកស្រុកកំណើតវិញ។

ចាប់ពីសង្គ្រាមផ្ទុះឡើងនៅក្នុងឆ្នាំ ២០១១ ប្រជាជនស៊ីរីរាប់លាននាក់បានបាត់បង់ជម្រកជាមួយនឹងប្រជាជនប្រហែល ៥លាននាក់បានបង្ខំចិត្តភៀសខ្លួនទៅរស់នៅប្រទេសជិតខាងផង។ មកដល់បច្ចុប្បន្នប្រជាជនដែលរងគ្រោះទាំងនោះភាគច្រើនកំពុងជ្រកកោននៅប្រទេសលីបង់, តួកគី និងហ្ស៊កដានី។

លោក Shoigu និយាយដូច្នេះ៖«ចាប់ពីឆ្នាំ ២០១៥មក នៅពេលដែលទីក្រុង និងភូមិស្រុកជាច្រើនត្រូវបានរំដោះ ប្រជាជនមិនតិចជាងមួយលាននាក់ទេដែលបានត្រឡប់មកលំនៅដ្ឋានវិញ។ ឥឡូវនេះ ឱកាសថ្មីទៀតត្រូវបានបង្កើតឡើងសម្រាប់ការត្រឡប់មកវិញនៃប្រជាជនប្រហែលមួយលាននាក់ទៀតដែលកំពុងភៀសខ្លួន»។

មន្ត្រីជាន់ខ្ពស់រុស្ស៊ីរូបនេះបានបន្ថែមថា ការទទួលយកជនភៀសខ្លួនមកវិញបានដោយសារបច្ចុប្បន្នស៊ីរីចាប់ផ្តើមមានស្ថិរភាព និងកំពុងបន្តគម្រោងស្តារហេដ្ឋារចនាសម្ព័ន្ធឡើងវិញ និងកសាងផ្លូវសម្រាប់ដឹកជញ្ជូន រួមជាមួយទីតាំងសន្តិសុខជាច្រើនផ្សេងទៀតផង។

ការបង្ហើបពីគម្រោងទទួលយកជនភៀសខ្លួននេះកើតឡើងបន្ទាប់ពីមានការឯកភាពគ្នារវាងលោក វ្ល៉ាឌីមៀ ពូទីន ជាមួយសមភាគីអាមេរិកលោក ដូណាល់ ក្នុងជំនួបទ្វេភាគីនៅទីក្រុងហែលសិងគី ប្រទេស ហ្វាំងឡង់កាលពីខែកក្កដាកន្លងទៅ។ ថ្វីបើមានការឯកភាពគ្នាដូច្នេះក្តី គេនៅតែមិនបានដឹងច្បាស់ថា វាមានកិច្ចសហប្រតិបត្តិការបែបណាឡើយរវាងអាមេរិក និងរុស្ស៊ីជុំវិញការធ្វើមាតុភូមិនិវត្តន៍របស់ប្រជាជនស៊ីរីនេះ។

ការប្រកាសនេះក៏កើតឡើងមួយថ្ងៃក្រោយពេលដែលអ៊ីរ៉ង់ និងស៊ីរីសម្រេចចុះកិច្ចព្រមព្រៀងរួមគ្នាលើការកសាងសមត្ថភាពការពារជាតិ និងស្តារប្រទេសជាតិឡើងវិញដែរ។ អ៊ីរ៉ង់នឹងបន្តរក្សាកងទ័ពខ្លួននៅស៊ីរីដើម្បីជួយគាំទ្រកងទ័ពស៊ីរីប្រឆាំងក្រុមភេរវជន និងជួយទ្រទ្រង់ដល់ដំណើការកសាងប្រទេសជាតិឡើងវិញផង ខណៈដែលរដ្ឋាភិបាលក្រុងដាម៉ាសកាន់តែមានប្រៀបខ្លាំងក្នុងសង្គ្រាមអូសបន្លាយអស់ ៧ឆ្នាំមកនេះ។

ត្រឡប់មកវិញ រុស្ស៊ីដែលជាសម្ព័ន្ធមិត្តយូរអង្វែងរបស់ស៊ីរី និងបន្តជួយគាំទ្រស៊ីរីផ្នែកការទូតនោះ បានចូលអន្តរាគមន៍នៅស៊ីរីក្នុងឆ្នាំ ២០១៥ តបតាមស្នើសុំរបស់លោក បាសា អាល់អាសាដ ដែលបន្តច្បាំងប្រឆាំងក្រុមឧទ្ទាមនោះ។ ការអន្តរាគមន៍របស់រុស្ស៊ីក្នុងជម្លោះផ្លាស់ប្តូរស្ថានភាពសង្គ្រាម ហើយទ័ពអាកាសរុស្ស៊ីមិនត្រឹមតែកម្ចាត់ក្រុមភេរវជនរដ្ឋឥស្លាមប៉ុណ្ណោះទេ តែក៏ឆ្លៀតសំពងក្រុមឧទ្ទាមដែលគាំទ្រដោយលោកខាងលិចដូចគ្នា៕