ជាតិ
នយោបាយជាតិ
ជាប់គុកជាងបីឆ្នាំ លោក មាជ សុវណ្ណារ៉ា និពន្ធសៀវភៅបានពីរក្បាល
× ភ្នំពេញ៖ ជីវិតជាងបីឆ្នាំក្នុងពន្ធនាគារព្រៃស លោក មាជ សុវណ្ណារ៉ា អតីតមន្ត្រីជាន់ខ្ពស់នៃគណបក្សសង្គ្រោះជាតិ និងធ្លាប់ធ្វើជាបេក្ខជនតំណាងរាស្ត្រ មិនបណ្តោយឲ្យពេលវេលា កន្លងទៅដោយឥតប្រយោជន៍ឡើយ។ រយៈពេលជាងបីឆ្នាំក្នុងពន្ធនាគារ លោក បានឆ្លៀតសរសេរសៀវភៅបានពីរក្បាល។
លោក មាជ សុវណ្ណារ៉ា ដែលគេចាត់ទុកជាអ្នកនយោបាយពូកែវោហារសាស្ត្រ បានប្រាប់អ្នកកាសែតថា សៀវភៅទាំងពីរក្បាលនោះ មានចំណងជើងថា «អ្នកគុកនយោបាយព្រៃស» និង «ក្រមសីលធម៌អ្នកដឹកនាំ»។ លោក បញ្ជាក់ថា សៀវភៅទាំងពីរក្បាលរបស់លោក នឹងត្រូវបោះពុម្ភផ្សាយនៅក្នុងឆ្នាំ២០១៨នេះតែម្តង។
អតីតមន្ត្រីជាន់ខ្ពស់នៃគណបក្សប្រឆាំងរូបនេះ បន្តថា នៅក្នុងពន្ធនាគារ លោក បានប្រឹងប្រែងអានសៀវភៅដល់ទៅជាង៥០០ក្បាលឯណោះ។ លោក បន្ថែម ការអាននេះហើយ ដែលជាទុនដ៏ចម្បងធ្វើឲ្យលោក មានគំនិតច្រើនក្នុងការសរសេរសៀវភៅទាំងពីរក្បាលនេះ។
ការលើកឡើងខាងលើរបស់លោក មាជ សុវណ្ណារ៉ា គឺបន្ទាប់ពីព្រះសង្ឃក្នុងវត្តចាស់ បានស្រោយទឹកឲ្យលោក និងគ្នីគ្នា១៣នាក់ទៀតរួច នារសៀលថ្ងៃទី២៨ ខែសីហា ឆ្នាំ២០១៨នេះ។ ព្រះមហាក្សត្រ បានចេញព្រះរាជក្រឹត្យលើកលែងទោសឲ្យពួកគេ នៅយប់ថ្ងៃទី២៧ ខែសីហា ហើយរហូតឈានចូលម៉ោង១យប់ នាថ្ងៃទី២៨ ខែសីហា សមត្ថកិច្ច ក៏អនុញ្ញាតឲ្យពួកគេ ចេញពីពន្ធនាគារ។
លោក មាជ សុវណ្ណរ៉ា និងអតីតសកម្មជន២នាក់នៃគណបក្សប្រឆាំង ត្រូវបានកាត់ទោសឲ្យជាប់ពន្ធនាគាររយៈពេល២០ឆ្នាំក្នុងម្នាក់ៗ ពីបទដឹកនាំធ្វើកុបកម្ម ហើយអតីតសកម្មជនជន១១នាក់ទៀត ត្រូវបានកាត់ទោសឲ្យជាប់ពន្ធនាគាររយៈពេល៧ឆ្នាំក្នុងម្នាក់ៗ ពីបទចូលរួមក្នុងចលនាកុបកម្ម។ ពួកគេ ជាប់ឃុំ ក្នុងអំឡុងខែកក្កដា ឆ្នាំ២០១៥៕
© រក្សាសិទ្ធិដោយ thmeythmey.com