អន្តរជាតិ
អាមេរិក ចង់ចាប់ផ្ដើមសមយុទ្ធជាមួយកូរ៉េខាងត្បូង ក្រោយការចរចាជាមួយកូរ៉េខាងជើងជាប់គាំង
រដ្ឋមន្រ្តីការពារជាតិអាមេរិក ជេម ម៉ាធីស និងនាយសេនាធិការចម្រុះកងទ័ពអាមេរិក ឧត្តមសេនីយ៍ ចូសេហ្វ ដាន់ហ្វត (រូបភាព AFP)
×![]()
ដោយ: តន ចាន់រិទ្ធារ៉ា
ប្រមុខការពារជាតិអាមេរិក ជេម ម៉ាធីស នៅថ្ងៃទី២៨ ខែសីហា បានប្រកាសថា យោធាអាមេរិកគ្មានផែនការផ្អាកសមយុទ្ធជាមួយកូរ៉េខាងត្បូងទៀតឡើយ។ ការប្រកាសបែបនេះ ធ្វើឡើងស្របពេលដែលការចរចាជាមួយកូរ៉េខាងជើងលើការរំសាយនុយក្លេអ៊ែរ បានជាប់គាំងគ្មានដំណើរការដុំកំភួនអ្វីនោះ។ វាអាចជាប្រកាន់ជំហរតឹងរ៉ឹងរបស់អាមេរិកពេលការចរចាគ្មានបានផល ហើយក៏ជាការដាក់សម្ពាធកាន់តែខ្លាំងឲ្យកូរ៉េខាងជើងចាត់វិធានការដោះស្រាយបញ្ហានុយក្លេអ៊ែរឲ្យបានលឿន។
ក្រោយជំនួបនៅសិង្ហបុរីជាមួយមេដឹកនាំកូរ៉េខាងជើង គីម ជុងអ៊ុន ប្រធានាធិបតីអាមេរិក ដូណាល់ ត្រាំ បានប្រកាសជាឯកតោភាគីផ្អាកសមយុទ្ធជាមួយកូរ៉េខាងត្បូងសម្រាប់ឆ្នាំ២០១៨ ។ លោក ត្រាំ បានរងការរិះគន់ខ្លាំងដោយសារបញ្ហានេះ ព្រោះជាការធ្វើសម្បទានឲ្យកូរ៉េខាងជើងទាំងកូរ៉េខាងជើងបានត្រឹមសន្យាថា ខ្លួននឹងរំសាយនុយក្លេអ៊ែរ។ ជាងពីរខែមកនេះ កូរ៉េខាងជើងមិនបានធ្វើអ្វីជាដុំកំភួនឡើយទាក់ទងការរំសាយនុយក្លេអ៊ែរនេះ ហើយការចរចាអាមេរិក-កូរ៉េខាងជើងក៏គ្មានបានផលទៅទៀត។
ចុងក្រោយនេះទៀត អាមេរិក និងកូរ៉េខាងជើងក៏បានលុបចោលជំនួបថ្នាក់ខ្ពស់ផងដែរ។ ដោយសារការរំសាយនុយក្លេអ៊ែរមិនមានផ្លែផ្កាអ្វីនោះ យោធាអាមេរិកក៏ចង់ចាប់ផ្ដើមសមយុទ្ធយោធាជាមួយកូរ៉េខាងត្បូងឡើងវិញ។ នៅថ្ងៃទី២៨ ខែសីហា រដ្ឋមន្ត្រីការពារជាតិអាមេរិក ជេម ម៉ាធីស និយាយថា យោធាអាមេរិកគ្មានផែនការលុបចោលលំហាត់យោធានៅឧបទ្វីបកូរ៉េទៀតឡើយ តែមិនបានបញ្ជាក់ថា នឹងចាប់ផ្ដើមនៅពេលណាដែរ។
យោងតាមទីភ្នាក់ងារព័ត៌មាន AFP លោក ម៉ាធីស លើកឡើងថា៖ «យើងបានចាត់វិធានការដើម្បីផ្អាកសមយុទ្ធយោធាធំៗមួយចំនួនជាកាយវិការល្អ។ យើងគ្មានផែនការផ្អាកទៀតទេ។» ក្នុងសន្និសីទសារព័ត៌មាននៅសេតវិមាន ប្រមុខការពារជាតិអាមេរិករូបនេះ មិននិយាយដល់សមយុទ្ធនៅឆ្នាំក្រោយឡើយ។ យ៉ាងណាមិញ លោកបានទុកផ្លូវសម្រាប់កូរ៉េខាងជើងដែរ ដោយរង់ចាំការចរចាសិន ទើបសម្រេចចិត្តពីគម្រោងសមយុទ្ធរួមគ្នាជាមួយកូរ៉េខាងត្បូងទៀត។
សមយុទ្ធទ្រង់ទ្រាយធំបន្ទាប់របស់យោធាអាមេរិក និងកូរ៉េខាងត្បូង គឺសមយុទ្ធ Key Resolve និង Foal Eagle នៅចុងឆ្នាំ២០១៨ នេះ។ កន្លងមក កូរ៉េខាងជើងចាត់ទុកសមយុទ្ធនេះ និងសមយុទ្ធឯទៀត ជាការត្រៀមខ្លួនដើម្បីឈ្លានពានខ្លួន។ មិនត្រឹមកូរ៉េខាងជើង ចិនក៏មិនពេញចិត្តនឹងសមយុទ្ធហ៊ឹកហ៊ាក់នៅឧបទ្វីបកូរ៉េដែរ ដ្បិតជាញឹកញយ អាមេរិកបានបញ្ជូនយន្តហោះទម្លាក់គ្រាប់បែកនុយក្លេអ៊ែរចូលរួមទៀតផង។
ខណៈការចរចារាំងស្ទះនោះ រដ្ឋមន្ត្រីការបរទេសអាមេរិក ម៉ៃ ប៉ុមប៉េអូ នៅតែអះអាងថា អាមេរិកត្រៀមខ្លួនចរចាដដែល ទោះជាគម្រោងដំណើរទស្សនកិច្ចរបស់លោកទៅកាន់ក្រុងព្យុងយ៉ាង ត្រូវបានលុបចោលដោយលោក ត្រាំ ក្ដី។ ជាមួយគ្នានេះ មន្ត្រីក្រសួងការបរទេសអាមេរិកប្រកាសរក្សាការអត់ធ្មត់បន្តទៀតក្នុងការចរចានេះ ដោយទទួលស្គាល់ថា ការរំសាយនុយក្លេអ៊ែរនៅឧបទ្វីបកូរ៉េ គឺជារឿងលំបាកតាំងពីដើមមកម្ល៉េះ៕
Tag:
អាមេរិក
កូរ៉េខាងត្បូង
កូរ៉េខាងជើង
© រក្សាសិទ្ធិដោយ thmeythmey.com
