លីគសម្រាកពីរសប្តាហ៍ ដើម្បីឲ្យកីឡាករត្រៀមប្រកួតមិត្តភាព និងពានសម្តេច ហ៊ុន សែន

កីឡាជាតិ

ជាតិ

លីគសម្រាកពីរសប្តាហ៍ ដើម្បីឲ្យកីឡាករត្រៀមប្រកួតមិត្តភាព និងពានសម្តេច ហ៊ុន សែន

30, Aug 2018 , 10:57 am

រូបភាព

ដោយ:

ការប្រកួតបាល់ទាត់ដណ្តើមពានរង្វាន់ក្របខណ្ឌមិត្តហ្វូនខេមបូឌានលីគ នឹងសម្រាកចំនួនពីរសប្តាហ៍ ដើម្បីទុកពេលឲ្យកីឡាករត្រៀមប្រកួតពានរង្វាន់សម្តេច ហ៊ុន សែន និងជំនួបមិត្តភាពអន្តរជាតិរវាងក្រុមជម្រើសជាតិកម្ពុជាជាមួយម៉ាឡេស៊ី។ ការប្រកួតនឹងចាប់ផ្តើមឡើងវិញនៅថ្ងៃទី១៥ ខែកញ្ញា ឆ្នាំ២០១៨ ខាងមុខ។

ទស្សនិកជននិងអ្នកគាំទ្រ នឹងខកខានទស្សនាការប្រកួតក្នុងក្របខណ្ឌខេមបូឌានលីគចំនួនពីរសប្តាហ៍។ ខកខាន ក៏ដោយសារពានរង្វាន់សម្តេច ហ៊ុន សែន ប្រចាំឆ្នាំ២០១៨ ត្រូវប្រកួតវគ្គពាក់កណ្តាលផ្តាច់ព្រ័ត្រនៅចុងសប្តាហ៍នេះ។ ក្នុងនោះណាហ្គាវើល ត្រូវបើកទ្វារពហុកីឡដ្ឋានជាតិទទួលស្វាគមន៍ក្រុមក្រសួងការពារជាតិ នៅថ្ងៃទី១ ខែកញ្ញា ឆ្នាំ២០១៨ មុនក្រុមអង្គរថាយហ្គឺរ ជួបអគ្គស្នងការនគរបាលជាតិនៅថ្ងៃទី២ ខែកញ្ញា ឆ្នាំ២០១៨ នៅពហុកីឡដ្ឋានជាតិដូចគ្នា។

ក្រុមឈ្នះក្នុងការប្រកួតត្រូវឡើងទៅជួបគ្នានៅវគ្គផ្តាច់ព្រ័ត្រ ដើម្បីប្រជែងដណ្តើមជើងឯក ខណៈក្រុមចាញ់ត្រូវប្រជែងគ្នាដណ្តើមចំណាត់ថ្នាក់លេខ៣។ តែយ៉ាងណាគណៈកម្មការរៀបចំការប្រកួតបាល់ទាត់ជាតិកម្ពុជា(CNCC) មិនទាន់បង្ហាញវេលាជាក់លាក់ពីការប្រកួតទាំងពីរនេះនៅឡើយទេ។

ម្យ៉ាងការសម្រាកនេះ ក៏ដើម្បីទុកពេលឲ្យកីឡាករជម្រើសជាតិ ក្រោមការដឹកនាំរបស់គ្រូបង្វឹកអាហ្សង់ទីន Felix ប្រមូលផ្តុំហ្វឹកហាត់ សម្រាប់ត្រៀមប្រកួតមិត្តភាពអន្តរជាតិជាមួយក្រុមជម្រើសជាតិម៉ាឡេស៊ី នាថ្ងៃទី១០ ខែកញ្ញា ឆ្នាំ២០១៨ នៅពហុកីឡដ្ឋានជាតិ។ ការប្រកួតដកស្រង់បច្ចេកទេសនេះ ធ្វើឡើងដើម្បីត្រៀមការប្រកួតផ្លូវការក្នុងពានរង្វាន់ AFF Suzuki Cup 2018 ដែលគ្រោងធ្វើឡើងនៅខែវិច្ឆិកា ខាងមុខនេះ៕