អន្តរជាតិ
ការចរចារំសាយនុយក្លេអ៊ែរជាប់គាំង លោក ត្រាំ មិនបន្ទោសកូរ៉េខាងជើង តែស្តីឲ្យចិន
មេដឹកនាំកូរ៉េខាងជើង គីម ជុងអ៊ុន និងប្រធានាធិបតីអាមេរិក ដូណាល់ ត្រាំ (រូបភាព AFP)
×![]()
ដោយ: តន ចាន់រិទ្ធារ៉ា
មួយថ្ងៃក្រោយប្រមុខការពារជាតិអាមេរិក ជេម ម៉ាធីស (James Mattis) លើកគំនិតចាប់ផ្ដើមសមយុទ្ធនៅឧបទ្វីបកូរ៉េឡើងវិញ ប្រធានាធិបតី ដូណាល់ ត្រាំ បែរជាប្រកាសថា លោកមិនគាំទ្រគំនិតនេះទៅវិញ។ ក្នុងសេចក្ដីថ្លែងការណ៍ថ្ងៃទី២៩ ខែសីហា លោក ត្រាំ នៅតែនិយាយលើកសរសើរទំនាក់ទំនងផ្ទាល់ខ្លួនរបស់លោកជាមួយមេដឹកនាំកូរ៉េខាងជើង គីម ជុងអ៊ុន ទោះជាការចរចាដើម្បីរំសាយនុយក្លេអ៊ែរបានជាប់គាំងក្ដី។ លោក ត្រាំ នៅតែបន្ទោសចិនដែលមិនព្រមជួយដោះស្រាយបញ្ហានេះ។
ការចរចារវាងអាមេរិក និងកូរ៉េខាងជើងដើម្បីរកផ្លូវឈានទៅកាន់ការរំសាយនុយក្លេអ៊ែរ មិនដំណើរទៅមុខឡើយ។ ទស្សនកិច្ចរបស់រដ្ឋមន្ត្រីការបរទេសអាមេរិក ម៉ៃ ប៉ុមប៉េអូ (Mike Pompeo) នៅក្រុងព្យុងយ៉ាងដើម្បីជជែកពីបញ្ហានេះ ត្រូវបានលុបចោល។ ដោយមើលឃើញការជាប់គាំង រដ្ឋមន្ត្រីការពារជាតិ ជេម ម៉ាធីស ក៏លើកឡើងបំណងចាប់ផ្ដើមសមយុទ្ធជាមួយកូរ៉េខាងត្បូងឡើងវិញ។ ប៉ុន្តែគំនិតនេះ ត្រូវបានលោក ត្រាំ បដិសេធចោល។
ក្នុងសេចក្ដីថ្លែងការណ៍របស់សេតវិមានថ្ងៃទី២៩ ខែសីហា លោក ត្រាំ និយាយថា នៅពេលនេះ គ្មានហេតុផលអ្វីដែលត្រូវចំណាយលុយច្រើនសន្ធឹកសន្ធាប់លើល្បែងសង្គ្រាមរវាងអាមេរិក និងកូរ៉េខាងត្បូងឡើយ។ ប៉ុន្តែសេចក្ដីថ្លែងការណ៍សេតវិមានបានបញ្ជាក់ដែរថា ប្រធានាធិបតីអាមេរិកអាចបញ្ជាឲ្យរៀបចំសមយុទ្ធនេះពេលណាក៏បានជាមួយកូរ៉េខាងត្បូង ឬជប៉ុនក៏ដោយ។ បើលោក ត្រាំ សម្រេចចិត្តបែបនោះមែន សមយុទ្ធនឹងកាន់តែធំមិនខាន។
ទំនងចង់រក្សាស្ថានភាពកុំឲ្យកាន់តែពិបាកនោះ លោក ត្រាំ ក៏ឆ្លៀតលើកសរសើរទំនាក់ទំនងផ្ទាល់ខ្លួនជាមួយមេដឹកនាំកូរ៉េខាងជើង គីម ជុងអ៊ុន ដែលកើតចេញពីជំនួបប្រវត្តិសាស្ត្រនៅសិ្ហបុរី។ ក្រៅពីមិនបន្ទោសកូរ៉េខាងជើងចំៗហើយនោះ មេដឹកនាំអាមេរិករូបនេះបែរជាទៅបាញ់ព្រួញដាក់ចិន និងបន្ទោសចិនថា ធ្វើឲ្យទំនាក់ទំនងរវាងអាមេរិក និងកូរ៉េខាងជើងយ៉ាប់យ៉ឺន។ លោក ត្រាំ និយាយត្រង់ថា មួយផ្នែកនៃបញ្ហាកូរ៉េខាងជើង បណ្ដាលមកជម្លោះពាណិជ្ជកម្មជាមួយចិន។
ដូចដឹងស្រាបហើយ ក្រុងប៉េកាំង គឺជាសម្ព័ន្ធចាក់ទឹកមិនលិចតែមួយគត់របស់របបដឹកនាំក្រុងព្យុងយ៉ាង និងជាទីឆ្លងកាត់ទំនិញទៅកូរ៉េខាងជើង។ លោក ត្រាំ អះអាងថា ក្រុងប៉េកាំងលែងមានជំហររឹងមាំដាក់ក្រុងព្យុងយ៉ាងទៀតហើយ។ តាមរយៈ Twitter នៅថ្ងៃទី២៩ ខែសីហា ប្រធានាធិបតីអាមេរិករូបនេះបញ្ជាក់ថា ចិនបានផ្ដល់ជំនួយច្រើនដល់កូរ៉េខាងជើងរាប់ទាំងលុយ ប្រេង ជី និងទំនិញច្រើនមុខទៀត ដែលនេះមិនមែនជារឿងល្អឡើយ។
ការជាប់គាំងការចរចាក្នុងការរំសាយនុយក្លេអ៊ែរ កើតចេញពីជំហរផ្ទុយគ្នារវាងអាមេរិក និងកូរ៉េខាងជើង។ អាមេរិកនៅតែប្រកាន់ជំហរឲ្យកូរ៉េខាងជើងបោះបង់នុយក្លេអ៊ែរទាំងស្រុងសិន មុននឹងខ្លួនអាចផ្អាកទណ្ឌកម្ម។ តែកូរ៉េខាងជើងចង់ឲ្យបានការព្យួរទណ្ឌកម្មសេដ្ឋកិច្ច និងការប្រកាសបញ្ចប់សង្គ្រាមកូរ៉េជាផ្លូវការ ទន្ទឹមគ្នានឹងពេលដែលខ្លួនបន្តដំណើរការរំសាយនុយក្លេអ៊ែររបស់ខ្លួន៕
Tag:
អាមេរិក
កូរ៉េខាងត្បូង
ដូណាល់ ត្រាំ
© រក្សាសិទ្ធិដោយ thmeythmey.com
