រដ្ឋមន្ត្រីសេដ្ឋកិច្ចអាស៊ានចុះកិច្ចព្រមព្រៀងពីរសម្រូលដល់ពាណិជ្ជកម្មក្នុងតំបន់ និងជំរុញសមាហរណកម្មផ្នែកសេវាកម្មក្នុងតំបន់។ កិច្ចព្រមព្រៀងទាំងពីរនេះនឹងផ្តល់ប្រយោជន៍ច្រើនចំពោះក្រុមនាំផ្គត់ផ្គង់សេវាកម្មនិងនាំចេញទូទាំងតំបន់អាស៊ានទាំងមូលផងដែរនៅពេលខាងមុខ។
ក្រោយកិច្ចប្រជុំរដ្ឋមន្ត្រីសេដ្ឋកិច្ចអាស៊ាននៅសិង្ហបុរីថ្ងៃ ២៩ ខែសីហា រដ្ឋមន្ត្រីអាស៊ានទាំងដប់បានឯកភាពគ្នាចុះកិច្ចព្រមព្រៀងចំនួនពីរក្នុងនោះមានមួយផ្តោតលើសេវាកម្ម និងមួយទៀតផ្តោតលើផ្នែកពាណិជ្ជកម្មអាស៊ាន។
យោងតាមទីភ្នាក់ងារព័ត៌មានចិន Xinhua កិច្ចព្រមព្រៀងទីមួយគឺជាកញ្ចប់ទី ១០ នៃការប្តេជ្ញាចិត្តរបស់អាស៊ានសម្រាប់កិច្ចព្រមព្រៀងក្របខណ្ឌរបស់អាស៊ានស្តីពីសេវាកម្ម( AFAS) ដែលមានគោលដៅកាត់បន្ថយការរឹតត្បិតលើពាណិជ្ជកម្មសេវាកម្ម។ ឯកសារនេះត្រូវបានចុះហត្ថលេខាជាលើកដំបូងកាលពីឆ្នាំ ១៩៩៥។
រដ្ឋមន្ត្រីពាណិជ្ជកម្មសិង្ហបុរីលោក Chan Chun Sing ដែលជាប្រធាននៃកិច្ចប្រជុំតំបន់នេះបានលើកឡើងថា ក្រោមឯកសារថ្មីដែលត្រូវចុះហត្ថលេខាថ្មីនេះ សមាជិអាស៊ានបង្កើនការប្តេជ្ញាចិត្តមុតមាំ និងអនុញ្ញាតឲ្យមានការភ្ជាប់ទីផ្សារអាស៊ានទៅនឹងវិស័យសេវាកម្មផ្សេងទៀរដែរ។
«នេះមានន័យថា ក្រុមហ៊ុនផ្តល់សេវាកម្មនៅក្នុងតំបន់អាស៊ានត្រូវបានធានាផ្លូវច្បាប់ដោយទទួលបានការលើកលែងពិសេសកាន់តែទូលាយជាមុនដើម្បីចូលក្នុងទីផ្សារតំបន់ និងត្រឹមប្រឈមមុខនឹងរបាំងពាណិជ្ជកម្មតិចតួចប៉ុណ្ណោះ»។ នេះជាការលើកឡើងរបស់រដ្ឋមន្ត្រីសិង្ហបុរី។
ក្រោមកិច្ចព្រមព្រៀងនេះដែរ ក្រុមហ៊ុនផ្តល់សេវាក្នុងតំបន់អាស៊ានទាំងអស់នឹងកាន់តែងាយស្រួលជាងមុនក្នុងការចូលរួមក្នុងវិស័យដែលមិនសូវបើកចំហរក្នុងតំបន់អាស៊ានពីមុន។ វិស័យទាំងនោះមានផ្នែកភស្តភារ, ដឹកជញ្ជូនតាមផ្លូវអាកាស, តាមផ្លូវសមុទ្រ, កុំព្យូទ័រ, វិស័យទូរគមនាគមន៍, ទេសចរណ៍, សេវាសំណង់ និងសេវាកម្មជំនាញបច្ចេកទេសផ្សេងទៀត។
ចំណែកឯកសារមួយទៀតគឺ ពិធីសារដំបូងដែលមានគោលដៅវិសោធនកម្មកិច្ចព្រមព្រៀងអាស៊ានស្តីពីពាណិជ្ជកម្មទំនិញ (ATIGA) ដែលវាមានគោលដៅដាក់ចេញគម្រោងស្តីពីការចេញវិញ្ញាបនបត្រដោយខ្លួនឯងទូទាំងតំបន់អាស៊ាន (ASEAN-wide Self-Certification Scheme)។
បទបញ្ញត្តិថ្មីនេះត្រូវបានលើកឡើងជាដំបូងដោយរដ្ឋមន្ត្រីសេដ្ឋកិច្ចអាស៊ានកាលពីឆ្នាំ ២០០៩ ហើយវាមានគោលដៅសំខាន់អនុញ្ញាតឲ្យក្រុមហ៊ុននាំចេញអាចផ្តល់វិញ្ញាបនបត្រដោយខ្លួនឯងលើផលិតផលខ្លួន និងអាចទទួលបានការលើកលែងពិសេសផង។ វាជួយសម្រួលនីតិវិធីរដ្ឋបាលដែលរំខានពេលវេលា និងចំណាយអស់ច្រើនដែលពាក់ព័ន្ធលើការស្នើសុំការផ្តល់វិញ្ញាបនបត្រសម្គាល់ប្រភពទំនិញ (Certificate of Origin)។
សូមបញ្ជាក់ថា កិច្ចប្រជុំរដ្ឋមន្ត្រីសេដ្ឋកិច្ចអាស៊ានលើកទី ៥០ ត្រូវបានរៀបចំឡើងនៅសប្តាហ៍នេះនៅប្រទេសសិង្ហបុរីដែលជាប្រធានអាស៊ានប្តូរវេនឆ្នាំ ២០១៨នេះ។ ក្នុងកិច្ចប្រជុំថ្នាក់តំបន់នេះដែរ រដ្ឋមន្ត្រីអាស៊ានបានជជែកពិភាក្សាពីបញ្ហាអភិវឌ្ឍកម្រិតតំបន់ និងពិភពលោក រួមទាំងពិនិត្យមើលពីការអនុវត្តផែនការមេរបស់សហគមន៍សេដ្ឋកិច្ចអាស៊ានឆ្នាំ ២០២៥ និងការវិវត្តនៃទំនាក់ទំនងការបរទេសរបស់អាស៊ានផងដែរ៕