ប្រមុខសិទ្ធិមនុស្ស UN ស្នើលោកស្រី ស៊ូជី លាលែង ព្រោះទង្វើហិង្សារបស់កងទ័ពមីយ៉ាន់ម៉ា

អន្តរជាតិ

ប្រមុខសិទ្ធិមនុស្ស UN ស្នើលោកស្រី ស៊ូជី លាលែង ព្រោះទង្វើហិង្សារបស់កងទ័ពមីយ៉ាន់ម៉ា

30, Aug 2018 , 5:18 pm

រូបភាព

ទីប្រឹក្សារដ្ឋមីយ៉ាន់ម៉ា អ៊ុងសាន ស៊ូជី ចាប់ដៃប្រមុខកងទ័ព មីន អ៊ុងឡាំង (រូបភាព AFP)

ដោយ: តន ចាន់រិទ្ធារ៉ា

ប្រមុខស្ថាប័នសិទ្ធិមនុស្សអង្គការសហប្រជាជាតិ Zeid Ra'ad al Hussein បានស្នើឲ្យទីប្រឹក្សារដ្ឋមីយ៉ាន់ម៉ា អ៊ុងសាន ស៊ូជី លាលែងពីតំណែង។ លោក al Hussein ដែលត្រូវចប់អាណត្តិនៅដំណាច់ខែសីហានេះ ស្នើបែបនេះ បន្ទាប់ពីរបាយការណ៍របស់ក្រុមប្រឹក្សាសិទ្ធិមនុស្សបង្ហាញថា ប្រមុខកងទ័ពមីយា់ន់ម៉ា មីន អ៊ុងឡាំង មានចេតនាប្រល័យពូជសាសន៍លើជនមូស្លីមរ៉ូហ៊ីងយ៉ា តែលោកស្រី ស៊ូជី មិនបានចាត់វិធានការអ្វីលើយោធាដែលបង្កទង្វើហិង្សាឡើយ។

ក្រោយហេតុការណ៍ខែសីហា ឆ្នាំ២០១៧ ដែលក្រុមឧទ្ទាមវាយប្រហារលើទីតាំងយោធានៅក្នុងរដ្ឋ Rakhine យោធាមីយ៉ាន់ម៉ាក៏បើកប្រតិបត្តិការមួយដែលប្រកបដោយហិង្សា ដែលបង្ខំឲ្យជនមូស្លីមរ៉ូហ៊ីងយ៉ាជាង៧សែននាក់ ភៀសខ្លួនទៅកាន់បង់ក្លាដែសក្បែរខាង។ ជាងមួយឆ្នាំមកនេះ ជនភាគតិចមួយនេះរងគ្រោះយ៉ាងខ្លាំងដោយសារទង្វើរបស់ក្រុមយោធាដូចជាការសម្លាប់រង្គាល ដុតផ្ទះសម្បែង និងការបំពានសិទ្ធិធ្ងន់ធ្ងរ។

នៅដើមសប្ដាហ៍នេះ ក្រុមស៊ើបអង្កេតឯករាជ្យរបស់អង្គការសហប្រជាជាតិបង្ហាញរបាយការណ៍របស់ខ្លួន ដែលបង្ហាញថា យុទ្ធនាការរបស់ក្រុមយោធាមីយ៉ាន់ម៉ាមានចេតនាប្រល័យពូជសាសន៍ជនមូស្លីមរ៉ូហ៊ីងយ៉ា។ ក្រុមស៊ើបអង្កេតក៏ស្នើឲ្យកាត់ទោសមេទ័ពកំពូលៗចំនួន៦រូបរាប់ទាំងអគ្គមេបញ្ជាការកងទ័ពឧត្តមសេនីយ៍ មីន អ៊ុងឡាំង ផង។ ជាងនេះទៅទៀត របាយការណ៍ក៏បង្ហាញថា រដ្ឋាភិបាលស៊ីវិលបានបរាជ័យទប់ស្កាត់ក្រុមកងទ័ពពីការធ្វើទង្វើដ៏ហិង្សាបំផុត។

ឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្សចប់អាណត្តិ Zeid Ra'ad al Hussein បានប្រាប់ឲ្យលោកស្រីទីប្រឹក្សារដ្ឋ អ៊ុងសាន ស៊ូជី លាលែងពីតំណែងទៅ។ ក្នុងកិច្ចសម្ភាសជាមួយសារព័ត៌មានអង់គ្លេស BBC លោក al Hussein ដែលបានរិះគន់លោកស្រី ស៊ូជី កប់មាត់នាពេលកន្លងមកនិយាយថា លោកស្រី ស៊ូជី កាន់តំណែងដែលគួរធ្វើអ្វីមួយ គឺអាចអង្គុយនៅស្ងៀម ឬក៏ចុះចេញពីតំណែងតែម្ដងទៅ។

ក្នុងកិច្ចសម្ភាសផ្សាយនៅថ្ងៃទី៣០ ខែសីហា ប្រមុខស្ថាប័នសិទ្ធិមនុស្សកំពូលនេះប្រាប់លោកស្រី ស៊ូជី ត្រង់ថា មិនចាំបាច់ធ្វើជាអ្នកនាំពាក្យឲ្យយោធាឡើយ និងមិនចាំនិយាយថា ព័ត៌មានទាំងឡាយ ជារឿងមិនពិតដែរ។ មិនត្រឹមតែរឿងលាលែងឡើយ លោក al Hussein ក៏ផ្ដល់យោបល់ឲ្យទីប្រឹក្សារដ្ឋមីយ៉ាន់ម៉ារូបនេះ ត្រឡប់ទៅស្ថិតក្រោមការឃុំខ្លួនផ្ទះដូចដែលធ្លាប់ធ្វើជាង១៦ឆ្នាំ ជាជាងក្លាយជាមនុស្សបន្ទាប់បន្សំរបស់យោធា។

តាមពិតទៅ លោកស្រី ស៊ូជី ត្រូវបានគេទទួលស្គាល់ថា មិនអាចគ្រប់គ្រងយោធាបានទេ ប៉ុន្តែការរិះគន់លើលោកស្រីចេះតែធ្លាក់មកជាបន្តបន្ទាប់ ព្រោះលោកស្រីមិនបានថ្កោលទោសយោធាឡើយ ហើយជារឿយៗនិយាយការពារប្រតិបត្តិការរបស់យោធាទៅទៀត។ នេះក៏ព្រោះតែលោកស្រី ត្រូវបានចាត់ទុកជានិមិត្តរូបសិទ្ធិមនុស្ស និងប្រជាធិបតេយ្យដ៏ល្បីមួយរូប ហើយក៏ជាជ័យលាភីណូបែលសន្តិភាពឆ្នាំ១៩៩១ ទៅទៀត៕