ជាតិ
សង្គមជាតិ
លោកគៀត ច័ន្ទថារិទ្ធ នឹងជំនួសតំណែងលោក សុខ ផល ឯអគ្គនាយកនៃមហាផ្ទៃពីររូបទៀត ក៏ត្រូវផ្លាស់ប្តូរ ពីឆ្វេងទៅស្តាំ៖ លោក សុខ ផល, លោក ម៉ៅ ច័ន្ទតារា, លោក ម៉ៅប៊ុនណារិន
× ភ្នំពេញ៖ សម្តេចនាយករដ្ឋមន្ត្រី ហ៊ុន សែន បានថ្វាយលិខិតទៅព្រះមហាក្សត្រ ដើម្បីក្រាបបង្គំសុំឲ្យព្រះអង្គ រាជានុញ្ញាត ផ្ទេរភារកិច្ច និងតែងតាំងមុខតំណែងជាអគ្គនាយកចំនួន៣ នៃក្រសួងមហាផ្ទៃ។ លិខិតនោះ ចុះនៅថ្ងៃទី៣១ ខែសីហា ឆ្នាំ២០១៨នេះ។
នាយឧត្តមសេនីយ៍បីរូប ដែលសម្តេច ហ៊ុន សែន សុំរាជានុញ្ញាតពីព្រះមហាក្សត្រ ដើម្បីតែងតាំង ឲ្យទៅកាន់តំណែងក្នុងអគ្គនាយកដ្ឋានទាំងបីនៃក្រសួងមហាផ្ទៃ គឺ លោក គៀត ច័ន្ទថារិទ្ធ ពីអគ្គស្នងការរងនគរបាលជាតិ ទៅជាអគ្គនាយកនៃអគ្គនាយកដ្ឋានអន្តោប្រវេសន៍, លោក កង សុខន ពីអគ្គស្នងការរងនគរបាលជាតិ ទៅជាអគ្គនាយក អគ្គនាយកដ្ឋានអត្តសញ្ញាណកម្ម, និងលោក សេង យូអ៊ាន់ ពីអគ្គនាយករង ទៅជាអគ្គនាយក នៃអគ្គនាយកដ្ឋានភស្តុភារ និងហិរញ្ញវត្ថុ។
បច្ចុប្បន្ន នាយឧត្តមសេនីយ៍ សុខ ផល ជាអគ្គនាយកនៃអគ្គនាយកដ្ឋានអន្តោប្រវេសន៍, នាយឧត្តមសេនីយ៍ ម៉ៅ ច័ន្ទតារា ជាអគ្គនាយកដ្ឋានអត្តសញ្ញាណកម្ម, និងនាយឧត្តមសេនីយ៍ ម៉ៅ ប៊ុនណារិន ជាអគ្គនាយក នៃអគ្គនាយកដ្ឋានភស្តុភារ និងហិរញ្ញវត្ថុ។ យ៉ាងណាក៏ដោយ លិខិតដែលសម្តេច ហ៊ុន សែន ថ្វាយទៅព្រះមហាក្សត្រ ពុំបានបញ្ជាក់ថា នាយឧត្តមសេនីយ៍ទាំងបីនាក់នេះ នឹងត្រូវផ្តេរទៅឲ្យកាន់តំណែងអ្វីឡើយ។
សារព័ត៌មានថ្មីៗ មិនអាចសុំការបំភ្លឺពីនាយឧត្តមសេនីយ៍ ខៀវ សុភ័គ អ្នកនាំពាក្យក្រសួងមហាផ្ទៃ និងនាយឧត្តមសេនីយ៍ គៀត ច័ន្ទថារិទ្ធ អ្នកនាំពាក្យអគ្គស្នងការនគរបាលជាតិ បានទេ ដោយសារតែលោកទាំងពីរ ពុំលើកទូរសព្ទ៕
Tag:
ហ៊ុន សែន
ព្រះមហាក្សត្រ
© រក្សាសិទ្ធិដោយ thmeythmey.com