ជាតិ
សង្គមជាតិ
សុផានិត អាយុ១៥ឆ្នាំចាប់អារម្មណ៍ជំនាញគូរគំនូរ
× សៀមរាប៖គង់ សុផានិត ជាកុមារាមួយរូប ដែលស្រឡាញ់ និងមាននិស្ស័យ នឹងការគូរគំនូរ។ បច្ចុប្បន្ន សុផានិត មានលទ្ធភាពគូរគំនូរ ដែលអាចដាក់លក់លើទីផ្សារ និងអាចរកចំណូល សម្រាប់ផ្គត់ផ្គង់ការសិក្សាដោយខ្លួនឯងបានផងដែរ។
សុផានិត ជាជាងគំនូរមួយរូបដែលគូរលក់នៅក្នុងផ្សារ ផលិតផលកម្ពុជា ដែលស្ថិតក្នុងបរិវេណ ឃីងស៍រ៉ូដ អង្គរ។ សុផានិត ប្រាប់ថាគេទើបរៀនគូរគំនូរនេះរយៈពេល៣ខែ ហើយក៏បានចេះគូរគំនូរខ្នាតតូចៗ មានដូចជារូបដំរី ផ្ទះលិចទឹក និងរូបអង្គរវត្ត។
បច្ចុប្បន្ន សុផានិត អាយុ១៥ឆ្នាំ និងរៀនថ្នាក់ទី១០ មាននិស្ស័យផ្នែកគំនូរនេះតាំងពីនៅអាយុ១០ឆ្នាំមកម្លេះ។ កុមារានេះបានបញ្ជាក់ថា ក្នុងមួយថ្ងៃគេអាចគូរគំនូរទំហំ២០គុណ២៥ បានចំនួន ៤ទៅ៥ផ្ទាំង ដែលអាចលក់បានក្នុងតម្លៃមួយផ្ទាំងចំនួន ៧ដុល្លារ។ ឳពុកម្តាយរបស់ សុផានិត ជាអ្នកលក់ដូរ និងគ្មានចំណេះដឹងផ្នែកគំនូរឡើយ គឺមានតែរូបគេ និងប្អូនស្រីម្នាក់តែប៉ុណ្ណោះដែលចាប់អារម្មណ៍នឹងការងារនេះ។
ទៅថ្ងៃខាងមុខ សុផានិត ចង់ក្លាយជាជាងគំនូរមួយរូប ប៉ុន្តែបញ្ជាក់ថាចង់រៀនផ្នែក វិស្វកម្មសំណង់ស៊ីវិល ដែលជាក្ដីស្រម៉ៃរបស់គេ៕
© រក្សាសិទ្ធិដោយ thmeythmey.com