ជាង២ឆ្នាំក្នុងពន្ធនាគារ អ្នកស្រី ទេព វន្នី ចាក់កន្សែង អាវ និងកាបូបដៃ ដើម្បីបន្លប់ការនឹកគ្រួសារ

ជាតិ

សង្គមជាតិ

ជាង២ឆ្នាំក្នុងពន្ធនាគារ អ្នកស្រី ទេព វន្នី ចាក់កន្សែង អាវ និងកាបូបដៃ ដើម្បីបន្លប់ការនឹកគ្រួសារ

01, Sep 2018 , 9:30 pm

រូបភាព

Front រូបពីហ្វេសប៊ុកអ្នកស្រី ទេព វន្នី ដែលបង្ហាញពីការចាក់កាបូប មួក និងអាវ

ដោយ:

ភ្នំពេញ៖ ក្រោយជាប់ពន្ធនាគារជាង២ឆ្នាំ អ្នកស្រី ទេព វន្នី បានបន្សល់នូវ វត្ថុអនុស្សាវរីយ៍ជាច្រើន ដែលធ្វើចេញពីអំបោះ និងចាក់ដោយដៃ។ សម្ភារទាំងនោះមានដូចជា កាបូប មួក កន្សែងបង់ករ កន្សែងពានា និងអាវជាដើម។ អ្នកស្រី គ្រោងទុកសម្រាប់ជូនដល់បុគ្គលសំខាន់ៗ ដែលអ្នកស្រីគោរព ស្រលាញ់ ហើយក៏ដើម្បីទុកសម្រាប់រំឭកដល់ រឿងរ៉ាវដែលកញ្ញាបានជួបប្រទះនៅក្នុងពន្ធនាគារ។

រស់នៅជាង២ឆ្នាំ ក្នុងបន្ទប់ដែលមានទំហំប្រមាណ ៥គុណ១៦ម៉ែត្រ មានគ្នា១៣២នាក់ អ្នកស្រី ទេព វន្នី បានសម្រេចចិត្តជ្រើសរើសការចាក់សម្ភារប្រើប្រាស់ដើម្បីបំភ្លេចនូវទុក្ខកង្វល់ និងការនឹករឭក ដល់ឪពុក ម្ដាយចាស់ ព្រមទាំងកូន។ សម្ភារដែលអ្នកស្រីចាក់ចេញពីអំបោះដែលលក់ក្នុងពន្ធនាគារមានដូចជា កាបូប មួក កន្សែងបង់ក កន្សែងពានារ និងអាវជាដើម។

រាល់សម្ភារទាំងនេះ គឺអ្នកស្រី ទេព វន្នី មិនចង់យកទៅលក់នៅទីណាឡើយ តែអ្នកស្រីចង់ទុកធ្វើជាវត្ថុអនុស្សាវរីយ៍ និងសម្រាប់ជូនទៅបុគ្គលដែលអ្នកស្រីគោរព ស្រលាញ់។ ការចាក់អំបោះប្រភេទម្ជុលមួយនេះ អ្នកស្រីចំណាយពេលទាំងស្រុងដើម្បីចាក់ លើកលែងតែពេលបាយ និងពេលយប់តែប៉ុណ្ណោះ។

អ្នកស្រី ទេព វន្នី បញ្ជាក់ថា៖ «ពេញមួយថ្ងៃខ្ញុំមិនចេញទៅណាទេ ខ្ញុំនៅតែក្នុងបន្ទប់ពន្ធនាគារ អង្គុយចាក់កាបូប អាវកន្សែង។ ខ្ញុំសម្រាកតែពេលបាយ បាយហើយខ្ញុំក៏អង្គុយចាក់វិញភ្លាម ហើយយប់ខ្លះខ្ញុំចាក់ដល់ម៉ោង១២ ឬម៉ោង១អីណោះ ពេលខ្លះក៏ភ្ជាក់តាំងពីម៉ោង៥ ហើយអង្គុយចាក់ទៅ»។

អ្នកស្រី ទេព វន្នី បានចាត់ទុកការចាក់សម្ភារប្រើប្រាស់នេះ ដូចជាការធ្វើសមាធិ ដែលអាចធ្វើឲ្យអ្នកស្រី មិនសូវគិតច្រើន និងកាត់បន្ថយការព្រួយបារម្ភពីអ្នកផ្ទះ។ មិនតែប៉ុណ្ណោះអ្នកស្រីក៏បានជួយបង្រៀនអ្នកទោសមួយចំនួនដែលចង់ចេះចាក់អំបោះនេះ ឲ្យបានចេះដូចអ្នកស្រីដែរ។

អ្នកស្រី ទេព វន្នី ត្រូវបានឃុំខ្លួនកាលពីថ្ងៃទី១៥ ខែសីហា ឆ្នាំ២០១៦ និងត្រូវបានព្រះមហាក្សត្រត្រាស់បង្គាប់ឲ្យលើកលែងទោស នៅថ្ងៃទី២០ ខែសីហា ឆ្នាំ២០១៨។ បន្ទាប់ពីជាប់ពន្ធនាគាររយៈពេល២ឆ្នាំ ៥ថ្ងៃ ពីបទហិង្សារដោយចេតនាមានស្ថានទម្ងន់ទោសលើសន្តិសុខសណ្ដាប់ធ្នាប់សាលាខណ្ឌដូនពេញ កាលពីឆ្នាំ២០១៣។ អ្នកស្រីត្រូវបានតុលាការកាត់ទោសឲ្យជាប់ពន្ធនាគាររយៈពេល២ឆ្នាំកន្លះ និងពិន័យជាប្រាក់ចំនួន៥លានរៀលចូលរដ្ឋ និង៩លានរៀលសងទៅកាន់អាជ្ញាធររងរបួស៕