អន្តរជាតិ
×![]()
ដោយ: តន ចាន់រិទ្ធារ៉ា
ប្រធានាធិបតីហ្វីលីពីន រ៉ូឌ្រីហ្គោ ឌូទើតេ នៅថ្ងៃទី២ ខែកញ្ញា បានចេញមុខសុំទោសអតីតប្រធានាធិបតីអាមេរិក បារ៉ាក់ អូបាម៉ា ជុំវិញការប្រើប្រាស់ពាក្យអសុរោះកាលពីឆ្នាំ២០១៦ ។ កាលនោះ លោក អូបាម៉ា បានបង្ហាញជំហរលើកឡើងករណីសិទ្ធិមនុស្សនៅហ្វីលីពីនដែលធ្លាក់ចុះខ្លាំងក្នុងសង្គ្រាមគ្រឿងញៀនក្នុងជំនួបជាមួយលោក ឌូទើតេ នៅឡាវ។ ការអធិប្បាយរបស់លោក អូបាម៉ា ធ្វើឲ្យលោក ឌូទើតេ ក្ដៅស្លឹកត្រចៀកខ្លាំង ហើយក៏ប្រើពាក្យមិនសមរម្យតបវិញតែម្ដង។
ចំពោះមុខប្រជាជនហ្វីលីពីននៅទឹកដីអ៊ីស្រាអែល លោកប្រធានាធិបតី រ៉ូឌ្រីហ្គោ ឌូទើតេ បានប្រកាសសុំទោសអតីតប្រធានធិបតីប្រធានាធិបតីអាមេរិក បារ៉ាក់ អូបាម៉ា ជាសាធារណៈ។ មិនត្រឹមសុំទោសឡើយ លោក ឌូទើតេ ថែមទាំងប្រកាសអត់ឱនឲ្យលោក អូបាម៉ា ទៀតផងជុំវិញការរិះគន់លោកយុទ្ធនាការបង្ក្រាបគ្រឿងញៀនដែលសម្លាប់មនុស្សជាច្រើនពាន់នាក់ ហើយធ្វើឲ្យលោក ឌូទើតេ រំលោភសិទ្ធិមនុស្សធ្ងន់ធ្ងរទៀតផង។
ផ្ដើមចេញពីសម្ដីរបស់លោក អូបាម៉ា នោះហើយ ដែលធ្វើឲ្យលោក ឌូទើតេ ទ្រាំមិនបាន ហើយក៏ពន្លះលោក អូបាម៉ា វិញ។ គេអាចចាំបានថា ប្រធានាធិបតីដែលមានរហស្សនាមមេដឹកនាំមាត់អត់គម្របរបស់ហ្វីលីពីន បានហៅអតីតប្រធានាធិបតីអាមេរិកជា កូនស្រីសំផឹង តែម្ដងទៅ ហើយប្រាប់ឲ្យលោក អូបាម៉ា គោរពលោកផង។ ក្រោយលោក អូបាម៉ា ចប់អាណត្តិទៅ មេដឹកនាំហ្វីលីពីនរូបនេះបានសុំទោសជាចំហ។
«វាជារឿងសក្តិសមដែលត្រូវនិយាយពេលនេះ ព្រោះលោក អូបាម៉ា ក្លាយជាជនស៊ីវិលហើយ។ ខ្ញុំសុំទោសចំពោះពាក្យមិនសមរម្យទាំងនោះ»។ នេះជាការលើកឡើងរបស់លោក ឌូទើតេ នៅថ្ងៃទី២ ខែកញ្ញា នាដំណើរទស្សនកិច្ចលើកដំបូងនៅអ៊ីស្រាអែល។ បើតាមសារព័ត៌មាន Rappler ប្រធានាធិបតីហ្វីលីពីនដដែលនេះ ក៏បានស្នើឲ្យលោក អូបាម៉ា លើកលែងទោសឲ្យលោកវិញផង បើលោក អូបាម៉ា ពេញចិត្តនឹងធ្វើបែបនោះ។
តាមពិតទៅ មួយរយៈខ្លីក្រោយបានជេរលោក អូបាម៉ា លោក ឌូទើតេ ក៏បានបង្ហាញការសោកស្ដាយវិញដែរ។ លោកធ្លាប់បានពន្យល់វិញថា លោកគ្រាន់តែខឹងនៅពេលដែលសារព័ត៌មានលើកឡើងថាលោក អូបាម៉ា នឹងបង្រៀនលោកពីរឿង«ការសម្លាប់មនុស្សក្រៅប្រព័ន្ធតុលាការ» ប៉ុណ្ណោះ។ យ៉ាងណាមិញ លោកក៏មិននឹកស្មានថា សម្តីរបស់លោកផ្តល់ឲ្យអ្នកសារព័ត៌មាន បែរក្លាយទៅជារឿងចម្រូងចម្រាសឡើយ។
លោក អូបាម៉ា មិនមែនជាមេដឹកនាំពិភពលោកតែម្នាក់ដែលត្រូវលោក ឌូទើតេ ប្រើប្រាស់ពាក្យពេជន៍ធ្ងន់ៗដាក់ឡើយ។ ប្រមុខសិទ្ធិមនុស្សអង្គការសហប្រជាជាតិ ប្រទេសនៅអឺរ៉ុប សុទ្ធតែធ្លាប់ត្រូវលោក ឌូទើតេ ពន្លះគ្មានប្រណីមាត់ឡើយ។ ឯរឿងវិញ គឺដូចគ្នា។ មេដឹកនាំទាំងនោះ បានរិះគន់សង្គ្រាមបោសសម្អាតគ្រឿងញៀនរបស់លោក ឌូទើតេ ដែលសម្លាប់មនុស្សជាច្រើន៕
Tag:
ហ្វីលីពីន
អាមេរិក
រ៉ូឌ្រីហ្គោ ឌូទើតេ
បារ៉ាក់ អូបាម៉ា
© រក្សាសិទ្ធិដោយ thmeythmey.com
