អន្តរជាតិ
ឌូទើតេ សង្ឃឹមអ៊ីស្រាអែលក្លាយជាអ្នកផ្គត់ផ្គង់អាវុធថ្មី ក្រោយងាកចេញសម្ព័ន្ធមិត្តចាស់អាមេរិក
× ប្រធានាធិបតីហ្វីលីពីន រ៉ូឌ្រីហ្គោ ឌូទើតេ (Rodrigo Duterte) ស្ថិតក្នុងដំណើរទស្សនកិច្ចនៅប្រទេសអ៊ីស្រាអែលរយៈពេលបួនថ្ងៃចាប់ផ្តើមពីថ្ងៃអាទិត្យទី ២ ខែកញ្ញា។ ក្រៅពីពង្រឹងចំណងមិត្តភាព ហ្វីលីពីនក៏សង្ឃឹមបង្កើតកិច្ចព្រមព្រៀងទិញអាវុធពីអ៊ីស្រាអែលដែរ ស្របពេលដែលរដ្ឋអាស៊ីអាគ្នេយ៍នេះបានងាកចេញពីអាមេរិកដែលជាសម្ព័ន្ធមិត្ត និងអ្នកជួយផ្គត់ផ្គង់អាវុធចាស់របស់ខ្លួន។
បន្ទាប់ពីជាន់ដីអ៊ីស្រាអែលនៅថ្ងៃអាទិត្យ លោក ឌូទើតេ ត្រូវជួបពិភាក្សាជាមួយនាយករដ្ឋមន្ត្រី បេនចាមិន ណេតាន់យ៉ាហ៊ូ នៅថ្ងៃចន្ទ និងបន្តជួបជាមួយសមភាគីអ៊ីស្រាអែលលោក Reuven Rivlin នៅថ្ងៃអង្គារផងដែរ។ គេរំពឹងថា កិច្ចព្រមព្រៀងមួយចំនួនពាក់ព័ន្ធនឹងវិស័យការពារជាតិ និងពលករនឹងត្រូវចុះរួមគ្នាក្នុងពេលនោះថែមទៀតផង។
វាជាទស្សនកិច្ចលើកដំបូងបំផុតនៅអ៊ីស្រាអែលរបស់មេដឹកនាំហ្វីលីពីនដែរ គិតចាប់ពីប្រទេសទាំងពីរនេះ បានភ្ជាប់ទំនាក់ទំនងការទូត កាលពីជាង៦០ឆ្នាំមុននោះ។
ជុំវិញដំណើរទស្សនកិច្ចនេះ លោកបណ្ឌិត Henelito Sevilla អ្នកជំនាញផ្នែកទំនាក់ទំនងអន្តរជាតិនៃសកលវិទ្យាល័យហ្វីលីពីនថ្លែងប្រាប់ ទីភ្នាក់ងារព័ត៌មាន AFP ថា ទស្សនកិច្ចនៅអ៊ីស្រាអែលគឺសម្រាប់ឲ្យលោក ឌូទើតេ ស្វែងទីផ្សារអាវុធថ្មី ដើម្បីធ្វើទំនើបកម្មកងទ័ព និងប៉ូលីសហ្វីលីពីន។
កន្លងមក ម្ចាស់អាណានិគមហ្វីលីពីន អាមេរិក ជាអ្នកផ្គត់ផ្គង់សម្ភារៈយោធានិងសព្វាវុធទៅឲ្យហ្វីលីពីន ប៉ុន្តែទំនាក់ទំនងរវាងសម្ព័ន្ធមិត្តទាំងពីរបានធ្លាក់ចុះយ៉ាងខ្លាំង ចាប់តាំងពីលោក ឌូទើតេ ឡើងកាន់តំណែងនាខែមិថុនា ឆ្នាំ២០១៦កន្លងទៅ។ នៅពេលនោះ លោក ឌូទើតេ ប្រកាសសង្គ្រាមប្រឆាំងនឹងគ្រឿងញៀន ដែលធ្វើឲ្យមានមនុស្សស្លាប់រាប់ពាន់នាក់។ ប្រធានាធិបតីរូបនេះ បានរងការរិះគន់យ៉ាងចាស់ដៃពីសំណាក់រដ្ឋបាលអាមេរិកជាពិសេសជំនាន់លោក បារ៉ាក់ អូបាម៉ា ជុំវិញការរំលោភសិទ្ធិមនុស្ស។
ជាលទ្ធផល លោក ឌូទើត ដែលគេស្គាល់ថាជាបុរសកណ្ដាប់ដៃដែកនេះ បានសម្រេចលុបចោលកិច្ចព្រមព្រៀងទិញអាវុធរាប់លានដុល្លារជាមួយអាមេរិក និងកាណាដា ព្រមទាំងបង្វិលចង្កូតហ្វីលីពីនឲ្យឃ្លាតឆ្ងាយពីអាមេរិកផង។ អ្វីដែលគួរឲ្យបារម្ភ ហ្វីលីពីនងាកទៅចងសម្ព័ន្ធភាពយ៉ាងកក់ក្ដៅទាំងផ្នែកជំនួញ និងការទូតជាមួយ ចិន និងរុស្ស៊ីថែមទៀតផង។
តាមពិតទៅ អ៊ីស្រាអែល ជាប្រទេសផលិតអាវុធដ៏ធំមួយ ចំណោមប្រទេសនាំចេញអាវុធធំៗបំផុតក្នុងពិភពលោក។ បើតាមទិន្នន័យរបស់ក្រសួងការពារជាតិអ៊ីស្រាអែល អ៊ីស្រាអែល នាំចេញអាវុធប្រមាណ៦០% ទៅកាន់តំបន់អាស៊ី-ប៉ាស៊ីហ្វិក។
ចំណែកហ្វីលីពីន ធ្លាប់ទិញសម្ភារៈ និងអាវុធពីអ៊ីស្រាអែលខ្លះរួចមកហើយ។ កាលពីឆ្នាំ ២០១៧កន្លងទៅ ហ្វីលីពីន បានបញ្ជាអាវុធប្រឆាំងរថក្រោះ និងប្រព័ន្ធរ៉ាដា ដែលគិតជាទឹកប្រាក់ប្រមាណ ២១ លានដុល្លារឯណោះ៕
Tag:
អ៊ីស្រាអែល
ហ្វីលីពីន
អាមេរិក
ឌូទើតេ រ៉ូឌ្រីហ្គោ
© រក្សាសិទ្ធិដោយ thmeythmey.com