Lionel Messi មិនមានឈ្មោះក្នុងបញ្ជីដណ្តើមពានរង្វាន់កីឡាករឆ្នើមបំផុតប្រចាំឆ្នាំ (Best Fifa Football Awards 2018) ជាលើកដំបូង ខណៈគូប្រជែងរបស់គេ Cristiano Ronaldo ជាប់ឈ្មោះ៣នាក់ចុងក្រោយជាមួយ Luka Modric និង Mohamed Salah។
Messi ខ្សែប្រយុទ្ធសញ្ញាតិអាហ្សង់ទីនតែងតែមានឈ្មោះប្រជែងនឹង Ronaldo ខ្សែប្រយុទ្ធចំណូលថ្មីរបស់ Juventus ក្នុងរយៈពេលជាងមួយទសវត្សរ៍ចុងក្រោយនេះសម្រាប់ពានដែលរៀបចំដោយសហព័ន្ធកីឡាបាល់ទាត់អន្តរជាតិ FIFA ពោលគឺចាប់ពីឆ្នាំ២០០៦មក។ ប៉ុន្តែសម្រាប់ការប្រជែង៣នាក់ចុងក្រោយឆ្នាំ២០១៨នេះ តារាឆ្នើមរបស់ Barcelona វ័យ៣១ឆ្នាំមិនមានឈ្មោះក្នុងបញ្ជីនោះឡើយ។
សម្រាប់បេក្ខភាព៣រូបចុងក្រោយដែលជ្រើសរើសដោយ FIFA ឆ្នាំ២០១៨នេះ រួមមាន Modric ខ្សែបម្រើឆ្មើម Real Madrid រួមទាំងអតីតមិត្តរួមក្រុមចាស់ Ronaldo និង Salah ខ្សែប្រយុទ្ធក្រុមហង្សក្រហម Liverpool។
Ronaldo ដែលបច្ចុប្បន្នមានវ័យ៣៣ឆ្នាំ បានជួយ Real Madrid ឈ្នះពាន Champions League ៣រដូវកាលជាប់គ្នាមុនផ្លាស់ទៅចូលរួមក្រុមជើងឯកអ៊ីតាលី Juventus កាលពីខែកក្កដាកន្លងទៅ។ ខ្សែប្រយុទ្ធសញ្ជាតិព័រទុយហ្គាល់រូបនេះធ្លាប់ឈ្នះពាន កីឡាករល្អបំផុតប្រចាំតំបន់អឺរ៉ុបនេះ៣ដងរួចមកហើយ ហើយក៏ជាអ្នកការពារតំណែងនេះផងដែរ។
Modric វ័យ៣២ឆ្នាំ បានជួយក្រុមជម្រើសជាតិក្រូអាស៊ីឈានដល់វគ្គផ្តាច់ព្រ័ត្រ World Cup លើកដំបូង និងជាផ្នែកមួយដែលជួយក្រុមស្តេចសឈ្នះពាន Champions League សម្រាប់រដូវកាល ២០១៧-២០១៨។
ដោយឡែក Salah បានបង្ហាញខ្លួនយ៉ាងអស្ចារ្យសម្រាប់រដូវកាលដំបូងក្នុងក្របខណ្ឌ Premier League និងជួយ Liverpool ឡើងទៅកាន់វគ្គផ្តាច់ព្រ័ត្រ Champions League ថែមទៀតផង។
ចំណែកបេក្ខភាពគ្រូបង្វឹកល្អប្រចាំ៣រូប (The Best FIFA Men’s Coach) រួមមាន លោក DalicZlatko គ្រូរបស់ក្រូអាស៊ី លោក Didier Deschamps គ្រូបារាំង និង Zinedine Zidane អតីតគ្រូ Real Madrid ។
អ្នកចាំទីល្អបំផុត៣រូបចុងក្រោយ (Best FIFA Goalkeeper) មាន Thibaut courtois អ្នកចាំទីបែលហ្ស៊ិក និង Real Madrid Hugo Lloris របស់បារាំង និង Spurs និង Kasper Schmeichel របស់ដាណឺម៉ាក និងក្លិប Leicester City។
សម្រាប់ពាន FIFA Puskas Award (គ្រាប់បាល់បញ្ចូលទីល្អដាច់គេ) មានដល់ទៅ១០រូបចុងក្រោយដែលពួកគេបានស៊ុតបញ្ចូលទីដ៏អស្ចារ្យសម្រាប់ជម្រើសជាតិ ឬក្លិបកាលពីរដូវកាលមុន ក្នុងនោះរួមមាន៖
Cristiano Ronaldo (Real Madrid)
Gareth Bale (Real Madrid)
Lionel Messi (អាហ្សង់ទីន)
Denis Cheryshev (រុស្ស៊ី)
Lazaros Christodoulopoulos (AEK Athens)
Giorgian De Arrascaeta (Cruzeiro)
Riley McGree (Newcastle Jets)
Benjamin Pavard (បារាំង)
Ricardo Quaresma (ព័រទុយហ្គាល់)
Mohamed Salah (Liverpool)