លោក ស៊ី មិនទៅកូរ៉េខាងជើងតាមការអញ្ជើញ និងឲ្យតំណាងទៅជំនួស

អន្តរជាតិ

លោក ស៊ី មិនទៅកូរ៉េខាងជើងតាមការអញ្ជើញ និងឲ្យតំណាងទៅជំនួស

05, Sep 2018 , 11:48 am

រូបភាព

ដោយ: តន ចាន់រិទ្ធារ៉ា

ប្រធានធិបតីចិន ស៊ី ជិនភីង បានសម្រេចចិត្តមិនទៅកូរ៉េខាងជើងតាមការអញ្ជើញរបស់មេដឹកនាំកូរ៉េខាងជើងឡើយ។ តំណាងឲ្យលោក ស៊ី គឺប្រធានសភាប្រជាជនចិន លី ចាន់ស៊ូ ដែលជាមនុស្សជំនិតរបស់លោកផងដែរ។ មិនមានមូលហេតុអ្វីត្រូវបានបញ្ចេញឡើយ តែទំនងជាមកពីកាលវិភាគដ៏មមាញឹករបស់លោក ស៊ី ដែលត្រូវទទួលមេដឹកនាំអាហ្វ្រិកជាច្រើនរូប។ ម្យ៉ាងទំនងជាមេដឹកនាំចិនមិនចង់ឲ្យអាមេរិកយល់ខុសផង ដោយសារកំពុងខឹងចិនព្រោះមិនជួយដោះស្រាយបញ្ហាកូរ៉េខាងជើងផង។

ទីភ្នាក់ងារព័ត៌មានរដ្ឋចិន Xinhua ផ្សាយថា ប្រធានសភាប្រជាជនលោក លី ចាន់ស៊ូ នឹងធ្វើដំណើរទៅកាន់កូរ៉េខាងជើងនៅថ្ងៃទី៨ ខែកញ្ញា ដើម្បីចូលរួមក្នុងខួបទី៧០ ថ្ងៃបង្កើតកូរ៉េខាងជើងដែលត្រូវរៀបចំនៅថ្ងៃបន្ទាប់។ លោក លី ត្រូវធ្វើជាតំណាងរបស់ប្រធានាធិបតីចិន ស៊ី ជិនភីង ដែលមិនអាចទៅក្រុងព្យុងយ៉ាងតាមការអញ្ជើញរបស់របបដឹកនាំកូរ៉េខាងជើង។ ប្រព័ន្ធផ្សព្វផ្សាយចិនមិនបានផ្សាយពត៌មានលម្អិតទាក់ទងបញ្ហានេះឡើយ។

លោក លី ដែលគេស្គាល់ថា ជាដៃស្ដាំរបស់លោក ស៊ី នឹងក្លាយជាមន្ត្រីថ្នាក់ខ្ពស់ជាងគេរបស់ចិនដែលទៅទស្សនកិច្ចនៅកូរ៉េខាងជើង ចាប់តាំងពីលោកក្ដាប់អំណាចនៅឆ្នាំ២០១២ មក។ កាលពីឆ្នាំ២០១៥ មន្ត្រីជាន់ខ្ពស់ចិនមួយរូប គឺលោក លីវ យុនសាន ដែលពេលនោះជាសមាជិកគណៈកម្មាធិការអចិន្ត្រៃយ៍គណៈកម្មាធិការមជ្ឈិមបក្សកុម្មុយនីស្តចិន ក៏បានទៅកូរ៉េខាងជើងម្ដងដែរ តែឋានៈរបស់លោកទាបជាងលោក លី នៅពេលនេះ។

អាចមានមូលហេតុពីរដែលលោក ស៊ី មិនទៅកូរ៉េខាងជើងដោយផ្ទាល់ ហើយបញ្ជូនមនុស្សទី៣ក្នុងជួរបក្សទៅជាតំណាងវិញ។ មូលហេតុទីមួយ គឺលោក ស៊ី ត្រូវទទួលដំណើរទស្សនកិច្ចរបស់មេដឹកនាំអាហ្វ្រិកមួយចំនួនដែលចូលរួមវេទិកាស្ដីពីកិច្ចសហប្រតិបត្តិការចិន-អាហ្វ្រិក។ ទោះជាជំនួបនេះបានបញ្ចប់ក្ដី មេដឹកនាំអាហ្វ្រិកខ្លះមិនទាន់ចាកចេញឡើយ និងមានគម្រោងបន្តទស្សនកិច្ចផ្លូវការរហូតដល់ចុងសប្ដាហ៍នេះ។ លោក ស៊ី ក៏ត្រូវទួលប្រមុខរដ្ឋម៉ូណាកូដែលទស្សនកិច្ចនៅចិនផង។

មូលហេតុទីពីរ ជារឿងសំខាន់ និងជាសំណុំរឿងចាស់ គឺបញ្ហានុយក្លេអ៊ែរកូរ៉េខាងជើង។ ថ្មីៗនេះ ប្រធានាធិបតីអាមេរិក ដូណាល់ ត្រាំ បានចោទចិនដោយចំៗថា ធ្វើឲ្យទំនាក់ទំនងអាមេរិក-កូរ៉េខាងជើងរកាំរកូស ហើយមិនជំរុញឲ្យកូរ៉េខាងជើងរំសាយនុយក្លេអ៊ែរអ្វីឡើយ។ មានន័យថា បើលោក ស៊ី ទៅកូរ៉េខាងជើងពេលនេះ វាប្រៀបដូចជាចិនពិតជាធ្វើទង្វើដូចអាមេរិកចោទមែន ហើយអាមេរិកនឹងរឹតតែមិនសប្បាយចិត្តមិនខាន។

ការបញ្ជូនលោក លី ទៅជំនួសបែបនេះ ជាផ្លូវដោះខ្លួនមួយដ៏ប្រសើរសម្រាប់លោក ស៊ី ។ ម្យ៉ាងវាបង្ហាញជាឆន្ទៈល្អរបស់ចិនទៅកាន់កូរ៉េខាងជើងក្នុងនាមជាមិត្តភក្តិម៉ឺនឆ្នាំធ្លាប់ប្រកៀកស្មាប្រយុទ្ធជាមួយទាហានអាមេរិក។ ហើយម្យ៉ាងទៀត វាក៏អាចរក្សាទំនាក់ទំនងជាមួយអាមេរិក កុំឲ្យយ៉ាប់យ៉ឺនខ្លាំងជាងបច្ចុប្បន្នផង។ បើលោក ត្រាំ ស្រែកផង រិះគន់ចំៗផងនោះ លោក ស៊ី ត្រូវលៃលកប្រយោជន៍ចិនសិនហើយ ចាំគិតរឿងកូរ៉េខាងជើងទៀត៕