ជំនួបកំពូលរដ្ឋប៉ាស៊ីហ្វិក៖ ម្ចាស់ផ្ទះណូរូ រងការរិះគន់ព្រោះរើសអើងប្រតិភូចិន

អន្តរជាតិ

ជំនួបកំពូលរដ្ឋប៉ាស៊ីហ្វិក៖ ម្ចាស់ផ្ទះណូរូ រងការរិះគន់ព្រោះរើសអើងប្រតិភូចិន

05, Sep 2018 , 8:39 pm

រូបភាព

មន្រ្តីចិនចូលរួមក្នុងវេទិកាកោះសមុទ្រប៉ាស៊ីហ្វិកនៅណូរូ (រូបភាព AFP)

ដោយ: ថ្មីៗ

វេទិកាកោះមហាសមុទ្រប៉ាស៊ីហ្វិក ដែលកោះណូរូជាម្ចាស់ផ្ទះ ប៊ិះតែនឹងមិនអាចកើតមានទៅហើយ ខណៈដែលកោះណូរូបានប្រទាំងប្រទើសជាមួយចិនរឿងផ្ដល់ទិដ្ឋាការ។ កោះណូរូ ដែលទទួលស្គាល់ឯករាជ្យរបស់តៃវ៉ាន់ បានបដិសេធបោះត្រាទិដ្ឋាការលើលិខិតឆ្លងដែនការទូតរបស់ប្រតិភូចិនដែលត្រូវចូលរួមជំនួបដ៏ធំប្រចាំប៉ាស៊ីហ្វិក។ ការណ៍នេះធ្វើឲ្យសមាជិកវេទិកាផ្សេងទៀតដែលមានទំនាក់ទំនងជាមួយចិនមិនពេញចិត្ត ហើយគំរាមដកខ្លួនចេញពីវេទិកានេះផង។

ការទាស់ទែងផ្នែកទិដ្ឋាការរវាងកោះណូរូ និងចិន សឹងធ្វើឲ្យជំនួបមេដឹកនាំប្រទេសនៅតំបន់មហាសមុទ្រប៉ាស៊ីហ្វិកជួបបញ្ហា ក្រោយអាជ្ញាធរណូរូមិនព្រមបោះត្រាលើលិខិតឆ្លងដែនរបស់មន្ត្រីចិន។ ចិនមិនមែនជាសមាជិកនៃវេទិកាកោះមហាសមុទ្រប៉ាស៊ីហ្វិក តែតែងបានចូលរួមជំនួបនេះរហូតមក ស្របពេលដែលឥទ្ធិពលរបស់ខ្លួនក៏កើនឡើងជាលំដាប់នៅតំបន់មួយនេះ រហូតធ្វើឲ្យប្រទេសមួយចំនួនបារម្ភក្នុងចិត្ត។

ចិន និងណូរូ គ្មានទំនាក់ទំនងការទូតនឹងគ្នាឡើយ ព្រោះណូរូទទួលស្គាល់តៃវ៉ាន់ជាតំណាងស្របច្បាប់របស់ចិន មិនមែនចិនដីគោកឡើយ។ តៃវ៉ាន់បានជួយឧបត្ថម្ភមិត្តរបស់ដើម្បីរៀចំវេទិកាមួយនេះ។ ដោយសារហេតុនេះ អាជ្ញាធរណូរូបានបដិសេធផ្ដល់ទិដ្ឋាការឲ្យប្រតិភូចិនដែលកាន់លិខិតឆ្លងដែនការទូត តែនឹងដំណើរឲ្យតែលិខិតឆ្លងដែនធម្មតាប៉ុណ្ណោះ។ នេះបើតាមការផ្សាយរបស់ទីភ្នាក់ងារព័ត៌មាន AFP ផ្សាយនៅថ្ងៃទី៤ ខែកញ្ញា។

អាចថា នេះជាបញ្ហាតិចតួចក្នុងការរៀបចំជំនួបនេះក្ដី ប៉ុន្តែសមាជិកវេទិកាដទៃទៀតដែលជាសម្ព័ន្ធមិត្តនិងបានទទួលជំនួយ ឬកម្ចីជាច្រើនពីចិន បានប្រតិកម្មយ៉ាងខ្លាំង។ នាយករដ្ឋមន្ត្រីកោះសាម័រ Tuilaepa Sailele Malielegaoi បានផ្ញើលិខិតមួយទៅកាន់មេដឹកនាំណូរូ Baron Waqa ដោយបានគំរាមដកខ្លួនចេញពីកិច្ចប្រជុំ និងបានព្រមានទៀតថា មេដឹកនាំកោះប៉ាស៊ីហ្វិកផ្សេងទៀត ក៏អាចធ្វើតាមសាម័រដែរ។

ក្នុងលិខិតរបស់ខ្លួន លោកនាយករដ្ឋមន្ត្រីសាម័រប្រាប់លោក Waqa ថា សកម្មភាពជាឯកតោភាគីរបស់លោកក្នុងនាមជាប្រធានាធិបតីណូរូ គឺជាគ្រោះថ្នាក់មិនធ្លាប់មាន។ លោក Malielegaoi ជឿថា មេដឹកនាំប្រទេសនៅតំបន់ប៉ាស៊ីហ្វិកផ្សេងទៀត ក៏ទំនងជាមិនអាចទទួលបានយកបានដែរ។ មេដឹកនាំសាម័របន្តថា ការសម្រេចចិត្តរបស់ណូរូ បង្កើតជាសំណួរលើសុចរិត ភាពគួរឲ្យទុកចិត្ត និងមូលដ្ឋានគ្រឹះរបស់អង្គការតំបន់មួយនេះ។

ចុងក្រោយបញ្ហាក៏ត្រូវបានដោះស្រាយវិញ ដោយណូរូបានយល់ព្រមបោះត្រាលើលិខិតស្នើសុំទិដ្ឋាការរបស់មន្ត្រីចិន ជំនួសឲ្យការបោះត្រាលើលិខិតឆ្លងដែន។ បញ្ហាមួយនេះ ក៏បានបង្ហាញឥទ្ធិពលចិនក្នុងចំណោមប្រទេសនៅតំបន់ប៉ាស៊ីហ្វិក ដែលបានទទួលជំនួយយ៉ាងច្រើនពីចិននាពេលកន្លងមក។ មិនបាច់និយាយឆ្ងាយ កោះសាម័រនេះក៏ទទួលបានជំនួយ និងកម្ចីយ៉ាងច្រើនពីចិនរហូតដល់ជំពាក់បំណុលច្រើនដែរ៕