ជាតិ
×![]()
ភ្នំពេញ៖ សម្ដេចនាយករដ្ឋមន្ត្រី ហ៊ុន សែន នឹងចូលរួមតាំងពិព័រណ៍ចិន-អាស៊ាន លើកទី១៥ ចាប់ពីថ្ងៃទី១០ ដល់ថ្ងៃទី១២ ខែកញ្ញា នៅក្នុងទីក្រុងណាននីង ខេត្តក្វាងស៊ី ។
ពិព័រណ៍ចិន-អាស៊ានលើកទី១៥នេះ ធ្វើឡើងក្រោមប្រធានបទ «រួមគ្នាកសាងវិថីសូត្រសមុទ្រសតវត្សទី២១ និងនវានុវត្តសហគមន៍ចិន-អាស៊ាន»។ ពិព័រណ៍នេះ មានការដាក់បង្ហាញនូវផលិតផលផ្សេងៗគ្នាជាច្រើនពីអាស៊ាន និងចិន ដើម្បីជម្រុញកិច្ចសហប្រតិបត្តិការរបស់វិស័យឯកជន នៅក្នុងផ្នែកពាណិជ្ជកម្ម ធុរកិច្ច វិនិយោគ និងទេសចរណ៍ឲ្យកាន់តែប្រសើរឡើង។
ដំណើរទស្សនកិច្ចផ្លូវការដំបូងនៃនីតិកាលទី៦នេះ ត្រូវបានអមដំណើរដោយលោក ហោ ណាំហុង ឧបនាយករដ្ឋមន្ត្រី លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម និងលោក ថោង ខុន រដ្ឋមន្ត្រីក្រសួងទេសចរណ៍។
នៅក្នុងនាមជាប្រទេសកិត្តិយសនៅក្នុងពិព័រណឆ្នាំនេះសម្ដេច ហ៊ុន សែន និងលោក ហាន់ ចឹង ឧបនាយករដ្ឋមន្ត្រីចិន និងធ្វើជាអធិបតីក្នុងពិធីកាត់ខ្សែបូ ដើម្បីសម្ភោធព្រះពន្លាជាតិកម្ពុជា ស្របពេលដែលទស្សនាសាលពិព័រណ៍ពាណិជ្ជកម្មកម្ពុជា។ មិនតែប៉ុណ្ណោះសម្ដេចនាយករដ្ឋមន្ត្រី នឹងជួបពិភាក្សាការងារជាមួយឥស្សរជនជន ថ្នាក់ដឹកនាំខេត្តក្វាងស៊ី និងធុរកិច្ចសំខាន់ៗនៃក្រុមហ៊ុននានារបស់ចិនទៀតផង។
ពិព័រណ៍ចិន-អាស៊ាន ត្រូវបានប្រារព្ធឡើងជារៀងរាល់ឆ្នាំ ក្នុងគោលបំណងសំខាន់ គឺដើម្បីពង្រឹង និងពង្រីកបន្ថែមទៀតនូវកាលានុវត្តភាពធុរកិច្ច និងពាណិជ្ជកម្មឲ្យកាន់តែស៊ីជម្រៅ ដើម្បីសម្រេចឲ្យបាននូវគោលដៅវិនិយោគទុនទំហំទឹកប្រាក់១ទ្រីលានដុល្លារអាមេរិក ពីប្រទេសចិនមកកាន់តំបន់អាស៊ាន និង១៥០ពាន់លានដុល្លារអាមេរិក ពីតំបន់អាស៊ានទៅកាន់ប្រទេសចិននៅត្រឹមឆ្នាំ២០២០។ នេះបើតាមសេចក្ដីប្រកាសព័ត៌មានរបស់ក្រសួងការបរទេស និងសហប្រតិបត្តិការអន្តរជាតិ ចេញផ្សាយនៅថ្ងៃទី៧ ខែកញ្ញា ឆ្នាំ២០១៨៕
Tag:
នយោបាយ
នីតិកាលទី៦
© រក្សាសិទ្ធិដោយ thmeythmey.com
