ជាតិ
នយោបាយជាតិ
អ្នកកាសែត និងសកម្មជនរង់ចាំជួបលោក កឹម សុខា បន្ទាប់ពីទទួលបានដំណឹងនៃការដោះលែងនៅព្រឹកថ្ងៃទី១០ កញ្ញា
×![]()
ដោយ: ថ្មីៗ
ភ្នំពេញ៖ លោក កឹម សុខា បានមកដល់គេហដ្ឋានរបស់លោកវិញហើយ។ តែនៅមានសំណួរដែលសាធារណជនចោទសួរខ្លួនឯង ថាតើលោក កឹម សុខា ត្រូវបានដោះលែងទាំងស្រុង ឬត្រូវដោះលែងបណ្តោះអាសន្ន? ឬត្រូវឃុំខ្លួននៅក្នុងផ្ទះវិញ?
ដីការបស់ចៅក្រមស៊ើបសួរ លោក គី ឬទ្ធី បានបង្គាប់ឲ្យប្រធានមណ្ឌលអប់រំកែប្រែ «ម៣» (ត្រពាំងផ្លុង) ដោះលែងលោក កឹម សុខា។ ប៉ុន្តែ បើយោងតាមលិខិតដោះលែងរបស់ប្រធានមណ្ឌលកែប្រែ ម៣ លោក កឹម សុខា ត្រូវបានដោះលែងឲ្យនៅក្រៅឃុំបណ្តោះអាសន្ន ដើម្បីទៅរស់នៅមូលដ្ឋានដើមវិញ (គេហដ្ឋានរបស់លោក)។
ភ្លាមៗក្រោយពីការដោះលែងលោក កឹម សុខា អ្នកនាំពាក្យសាលាដំបូងរាជធានីភ្នំពេញ បានចេញផ្សាយសេចក្តីប្រកាសព័ត៌មានដើម្បីពន្យល់ថា អំពីលក្ខខណ្ឌនៃការដោះលែងដ៏គួរឲ្យភ្ញាក់ផ្អើលនេះ។
សេចក្តីប្រកាសរបស់អ្នកនាំពាក្យសាលាដំបូងរាជធានីភ្នំពេញសរសេរយ៉ាងដូច្នេះ៖«ចៅក្រមស៊ើបសួរនៃសាលាដំបូងរាជធានីភ្នំពេញបានសម្រេចបង្គាប់ឲ្យដោះលែងលោក កឹម សុខា ឲ្យនៅក្រៅឃុំ ហើយបានសម្រេចជំនួសមកវិញនូវវិធានការនៃការដាក់ឲ្យស្ថិតនៅក្រោមការត្រួតពិនិត្យតាមផ្លូវតុលាការដោយភ្ជាប់នូវកាតកិច្ចតាមផ្លូវច្បាប់មួយចំនួន»។
អ្នកនាំពាក្យដដែលបន្តថា ការដោះលែងលោក កឹម សុខា ពីការឃុំខ្លួនក្នុងពន្ធនាគារ ត្រូវបានយោងទៅលើមូលហេតុសុខភាព និងការធានាផ្នែកនីតិវិធីច្បាស់លាស់ដែលថា «ជនត្រូវចោទឈ្មោះ កឹម សុខា នឹងមិនអាចរត់គេចខ្លួនពីនីតិវិធីតុលាការឡើយ»។
លោក កឹម សុខា ត្រូវបានសមត្ថកិច្ចចាប់ខ្លួននៅគេហដ្ឋានទាំងពាក់កណ្តាលអាធ្រាត្រថ្ងៃទី២ចូលថ្ងៃទី៣ខែកញ្ញាឆ្នាំ២០១៧ ក្រោមបណ្តឹងរបស់រដ្ឋាភិបាលពីបទ សន្និដ្ឋិភាពជាមួយបរទេស (សមគំនិតជាមួយបរទេស) តាមមាត្រា៤៤៣នៃក្រមព្រហ្មទណ្ឌ៕
Tag:
កឹម សុខា
© រក្សាសិទ្ធិដោយ thmeythmey.com
