មន្ត្រីកំពូលទី៣របស់ចិនទទូចឲ្យលោក គីម ជុងអ៊ុន ធ្វើតាមការសន្យាជាមួយលោក ត្រាំ

អន្តរជាតិ

មន្ត្រីកំពូលទី៣របស់ចិនទទូចឲ្យលោក គីម ជុងអ៊ុន ធ្វើតាមការសន្យាជាមួយលោក ត្រាំ

10, Sep 2018 , 9:19 pm

រូបភាព

ប្រធានសភាប្រជាជនចិន-លី-ចាន់ស៊ូ-ចាប់ដៃមេដឹកនាំកូរ៉េខាងជើង-គីម-ជុងអ៊ុន-(រូបភាព-Xinhua)

ដោយ: តន ចាន់រិទ្ធារ៉ា

មន្ត្រីជាន់ខ្ពស់លំដាប់ទី៣ របស់ទីក្រុងប៉េកាំង បានស្នើដោយផ្ទាល់ទៅកាន់មេដឹកនាំកូរ៉េខាងជើង គីម ជុងអ៊ុន ឲ្យធ្វើតាមការឯកភាពជាមួយប្រធានាធិបតីអាមេរិក ដូណាល់ ត្រាំ ស្ដីពីការរំសាយនុយក្លេអ៊ែរកាលពីជំនួបនៅសិង្ហបុរី។ ការស្នើនេះ ធ្វើឡើងខណៈការចរចារវាងក្រុងព្យុងយ៉ាង និងក្រុងវ៉ាស៊ីនតោនដើម្បីឈានដល់ការរំសាយនុយក្លេអ៊ែរនេះ បានជាប់គាំងមិនដំណើរការ។ ក្រុងវ៉ាស៊ីនតោនចោទក្រុងប៉េកាំងថា ជាអ្នកធ្វើឲ្យរាំងស្ទះ។

ប្រធានសភប្រជាជនចិនលោក លី ចាន់ស៊ូ នៅថ្ងៃទី៩ ខែកញ្ញា បានជួបជជែកជាមួយមេដឹកនាំកំពូលកូរ៉េខាងជើង គីម ជុងអ៊ុន នាឱកាសចូលរួមខួបទី៧០ឆ្នាំ ថ្ងៃកំណើតកូរ៉េខាងជើង។ នាជំនួបក្នុងទីក្រុងព្យុងយ៉ាង លោក លី ដែលជាតំណាងពិសេសរបស់ប្រធានាធិបតី ស៊ី ជិនភីង បាននិយាយដល់ការរំសាយនុយក្លេអ៊ែរនៅឧបទ្វីបកូរ៉េ ដែលកំពុងរាំងស្ទះមិនទៅមុខ ព្រោះអាមេរិក និងកូរ៉េខាងជើងនិយាយមិនត្រូវគ្នាពីដំណើរការលុបបំបាត់អាវុធនេះ។

បើតាមការផ្សាយរបស់ទូរទស្សន៍រដ្ឋចិន CCTV លោក លី ដែលជាមេដឹកនាំលំដាប់ទី៣ ក្នុងជួរថ្នាក់ដឹកនាំក្រុងប៉េកាំង បានសង្កត់ធ្ងន់ទៅកាន់ប្រមុខដឹកនាំវ័យក្មេងកូរ៉េខាងជើងពីភាពចាំបាច់ដែលអាមេរិក និងកូរ៉េខាងជើងត្រូវអនុវត្តឲ្យបានម៉ត់ចត់នូវកុងសង់ស៊ីសដែលឯកភាពគ្នាកាលពីជំនួបនៅសិង្ហបុរី។ កាលពីជំនួបលើកនោះ លោក គីម និងប្រធានាធិបតីអាមេរិក ដូណាល់ ត្រាំ បានយល់ព្រមរំសាយនុយក្លេអ៊ែរទាំងស្រុង តែមិនបាននិយាយពីវិធីសាស្ត្រឡើយ។

មន្ត្រីក្រុងព្យុងយ៉ាង និងក្រុងវ៉ាស៊ីនតោនបានជួបជជែកគ្នាជាច្រើនលើកដើម្បីអនុវត្តតាមការយល់ព្រមរបស់មេដឹកនាំ ប៉ុន្តែមិនអាចស្វែងរកចំណុចរួមបានទេ។ អាមេរិកចង់ឲ្យកូរ៉េខាងជើងរំសាយនុយក្លេអ៊ែរឲ្យបានជាក់ស្ដែងសិន មុននឹងខ្លួនធ្វើសកម្មភាពតាមក្រោយដូចជាការព្យួរទណ្ឌកម្មជាដើម។ ប៉ុន្តែកូរ៉េខាងជើងវិញ មិនសប្បាយចិត្តឡើយចំពោះការទាមទាររបស់អាមេរិក ព្រោះខ្លួនក៏បានកម្ទេចទីតាំងសាកល្បងនុយក្លេអ៊ែរ និងផ្អាកសាកល្បងនុយក្លេអ៊ែរយូរដែរហើយ ខណៈអាមេរិកនៅស្ងៀមដដែល។

អំឡុងជំនួបជាមួយលោក លី ដែលជាមនុស្សជំនិតរបស់លោក ស៊ី ដែរនោះ លោក គីម លើកឡើងថា កូរ៉េខាងជើងបានធ្វើសកម្មភាពច្រើនណាស់ហើយសំដៅលុបបំបាត់នុយក្លេអ៊ែរ។ លោកចង់ឲ្យអាមេរិកធ្វើសកម្មភាពដូចគ្នានេះដែរដើម្បីដោះស្រាយបញ្ហានៅឧបទ្វីបកូរ៉េតាមផ្លូវការទូត។ ជាងនេះទៅទៀត លោក គីម ក៏ប្រាប់លោក លី ទៀតថា កូរ៉េខាងជើងចង់រៀនសូត្រពីបទពិសោធអភិវឌ្ឍន៍សេដ្ឋកិច្ចរបស់ចិនផង។

សូមរំឭកថា នៅថ្មីៗនេះ លោកប្រធានាធិបតី ត្រាំ បានចោទចិនដោយចំៗថា ធ្វើឲ្យទំនាក់ទំនងអាមេរិក និងកូរ៉េខាងជើងរកាំរកូស ហើយចិនមិនបានជំរុញឲ្យកូរ៉េខាងជើងរំសាយនុយក្លេអ៊ែរអ្វីឡើយ ទោះជាចិនមានទឹកមាត់ប្រៃលើកូរ៉េខាងជើងក៏ដោយចុះ។ យ៉ាងណាមិញ ការលើកទទូចរបស់លោកមន្ត្រីជាន់ខ្ពស់ចិនពេលនេះ អាចជាយុទ្ធសាស្ត្ររបស់ក្រុងប៉េកាំងដើម្បីបង្ហាញអាមេរិកថា ខ្លួនពិតមានឆន្ទៈជួយដោះស្រាយបញ្ហាកូរ៉េខាងជើងមែន៕