អន្តរជាតិ
មីយ៉ាន់ម៉ា ទាត់ចោលយុត្តាធិការរបស់តុលាការព្រហ្មទណ្ឌអន្តរជាតិលើវិបត្តិរ៉ូហ៊ីងយ៉ា
× ដូចការរពឹងទុកមីយ៉ាន់ម៉ា មិនទទួលស្គាល់សេចក្តីសម្រេចរបស់តុលាការព្រហ្មទណ្ឌអន្តរជាតិ (ICC) លើការប្រកាសពីយុត្តាធិការជំនុំជម្រះសំណុំរឿងវិបត្តិជនភៀសខ្លួនរ៉ូហ៊ីងយ៉ានោះទេ។ សម្រាប់មីយ៉ាន់ម៉ា ការណ៍មិនស្ថិតក្នុងសមាជិកនៃភាគីរបស់លក្ខន្តិកៈក្រុងរ៉ូមរបស់តុលាការព្រហ្មទណ្ឌអន្តរជាតិ ជាសក្ខីកម្មគ្រប់គ្រាន់បំផុតហើយសម្រាប់ខ្លួនក្នុងការជំទាស់ពីយុត្តាធិការលើការជំនុំជម្រះ។
ក្រោយមួយថ្ងៃប៉ុណ្ណោះ នៃការចេញសេចក្តីសម្រេចរបស់អង្គជំនុំជម្រះរបស់តុលាការព្រហ្មទណ្ឌអន្តរជាតិពាក់ព័ន្ធនឹងយុត្តាធិការលើសំណុំរឿងវិបត្តិជនភៀសខ្លួនរ៉ូហ៊ីងយ៉ា ការិយាល័យប្រធានាធិបតីមីយ៉ាន់ម៉ា បានចេញសេចក្តីថ្លែងការណ៍ផ្លូវការមួយទាត់ចោល និងជំទាស់យ៉ាងដាច់ខាត។ ក្រុងណៃពិដោរ ចាត់ទុកសេចក្តីសេចសម្រេចនោះ ថាជាកង្វះខាត និងកំហុសផ្នែកច្បាប់មួយដ៏ធំ។
តាមការចុះផ្សាយរបស់ភ្នាក់ងារព័ត៌មាន Reuters សេចក្តីថ្លែងការណ៍ការិយាល័យប្រធានាធិបតី បានហៅសេចក្តីសម្រេចរបស់តុលាការថា មានកំហុសផ្នែកនីតិវិធី ដែលធ្វើឲ្យសេចក្តីសម្រេចនោះ មិនស្តែងចេញពីការពិតនោះទេ។ សម្រាប់មីយ៉ាន់ម៉ា កំហុសនីតិវិធីដ៏ធំរបស់តុលាការនោះគឺ ការប្រកាសយុត្តាធិការលើមីយ៉ាន់ម៉ា ដែលទាំងមីយ៉ាន់ម៉ា មិនមែនជាភាគីនៃលក្ខន្តិកៈក្រុងរ៉ូមផងនោះ។
សេចក្តីថ្លែងការណ៍របស់ក្រុងណៃពិដោរ ថែមទាំងចោទបណ្តឹងដែលធ្វើដោយអគ្គរដ្ឋអាជ្ញាតុលាការព្រហ្មទណ្ឌអន្តរជាតិ ថា ធ្វើឡើងតែតាមអារម្មណ៍ខ្លួនឯង ហើយកត្តានេះ ធ្វើឲ្យភស្តុតាងមិនមានភាពស្របច្បាប់នោះទេ។ សម្រាប់ប្រតិកម្មពីទីប្រឹក្សារដ្ឋ និងជាប្រមុខបក្សកាន់អំណាចមីយ៉ាន់ម៉ាបច្ចុប្បន្ន លោកស្រី អ៊ុងសាន ស៊ូជី មិនទាន់មានឡើយ ពោលគឺ លោកស្រី បន្តរក្សាភាពស្ងប់ស្ងាត់ដដែល។
សូមជម្រាបផងដែរ តុលាការព្រហ្មទណ្ឌអន្តរជាតិ នៅថ្ងៃ៦ កញ្ញា បានសម្រេចដោយសំឡេងភាគច្រើនថា តុលាការ មានយុត្តាធិការលើសំណុំរឿងជនភៀសខ្លួនរាប់សិបម៉ឺននាក់របស់មីយ៉ាន់ម៉ា ដែលកំពុងតែផ្ញើជីវិតលើទឹកដីបង់ក្លាដែស។
អង្គជំនុំជម្រះរបស់តុលាការព្រហ្មទណ្ឌអន្តរជាតិ បានរកឃើញថា តុលាការ មានអំណាចក្នុងការជំនុំជម្រះតាមរយៈបណ្តឹងរបស់អគ្គរដ្ឋអាជ្ញាតុលាការព្រហ្មទណ្ឌអន្តរជាតិ ដែលបានស្នើឲ្យចាត់ការមីយ៉ាន់ម៉ាលើករណីវិបត្តិជនភៀសខ្លួន ដែលអគ្គរដ្ឋអាជ្ញា បានរកឃើញពាក់ព័ន្ធនឹងសញ្ញាណនៃការប្រព្រឹត្តបទល្មើសប្រឆាំងនឹងមនុស្សជាតិ៕
Tag:
មីយ៉ាន់ម៉ា
ICC
អាស៊ាន
© រក្សាសិទ្ធិដោយ thmeythmey.com