លោក ផេន ថា គ្មានការជជែកជាមួយគណៈរដ្ឋមន្ត្រីដើម្បីដកតំណែងលោក ត្រាំ ឡើយ

អន្តរជាតិ

លោក ផេន ថា គ្មានការជជែកជាមួយគណៈរដ្ឋមន្ត្រីដើម្បីដកតំណែងលោក ត្រាំ ឡើយ

10, Sep 2018 , 10:19 pm

រូបភាព

ដោយ: តន ចាន់រិទ្ធារ៉ា

អនុប្រធានាធិបតីអាមេរិក ម៉ៃ ផេន នៅថ្ងៃទី៩ ខែកញ្ញា បានអះអាងថា លោកមិនបានជជែកជាមួយសមាជិកគណៈរដ្ឋមន្ត្រីផ្សេងទៀតលើលទ្ធភាពដកតំណែងប្រធានាធិបតី ដូណាល់ ត្រាំ នៅឡើយ។ លោក ផេន និយាយបែបនេះក្នុងកិច្ចសម្ភាសជាមួយទូរទស្សន៍ CBS ដើម្បីឆ្លើយតបទៅនឹង Op-ed របស់កាសែត The New York Times ដែលសរសេរដោយមន្ត្រីសេតវិមានមិនបញ្ចេញមុខម្នាក់ជុំវិញការដកហូតតំណែងពីលោក ត្រាំ វិសោធនកម្មទី២៥ ។

Op-ed របស់មន្ត្រីសេតវិមានលាក់មុខដែលផ្សាយលើកាសែត The New York Times ធ្វើឲ្យរំជើបរំជួលពេញនយោបាយអាមេរិក រហូតលោកប្រធានាធិបតី ដូណាល់ ត្រាំ ប្រកាសវែកមុខម្ចាស់អត្ថបទទៀតផង។ អ្វីធ្វើឲ្យរំជើបរំជួលនោះ គឺត្រង់ថា អ្នកសរសេរបានបញ្ចេញពីការជជែកផ្ទៃក្នុងរបស់មន្ត្រីជាន់ខ្ពស់អាមេរិកដើម្បីអនុវត្តវិសោធនកម្មទី២៥ រដ្ឋធម្មនុញ្ញ សំដៅដកតំណែងប្រធានាធិបតីរបស់លោក ត្រាំ ។

យ៉ាងណាមិញ លោកអនុប្រធានាធិបតី ម៉ៃ ផេន បានបដិសេធព័ត៌មាននេះ ខណៈលោក គឺជាអ្នកទទួលប្រយោជន៍ខ្លាំងជាងគេ បើវិសោធនកម្មទី២៥ ត្រូវអនុវត្តមែននោះ ព្រោះលោកនឹងត្រូវស្នងតំណែងពីលោក ត្រាំ មិនខាន។ ក្នុងកិច្ចសម្ភាសជាមួយទូរទស្សន៍ CBS ដែលផ្សាយនៅថ្ងៃទី៩ ខែកញ្ញា លោក ផេន បានឆ្លើយថា «ទេ! មិនដែលឡើយ» ទៅនឹងសំណួររបស់ពិធីការិនី Margaret Brennan ដែលថា លោកបានពិភាក្សាពីវិសោធនកម្មទី២៥ ឬអត់។

វាក្យខណ្ឌមួយវិសោធនកម្មទី២៥ នេះបានចែងពីការដកហូតតំណែងពីប្រធានាធិបតី។ ពោល គីបើអនុប្រធានាធិបតី និងរដ្ឋមន្ត្រីភាគច្រើនជូនដំណឹងជាលាយលក្ខណ៍អក្សរទៅកាន់ប្រធានបណ្ដោះអាសន្នព្រឹទ្ធសភា និងប្រធានរដ្ឋសភាថា ប្រធានាធិបតីមិនអាចអនុវត្តអំណាច និងតួនាទីរបស់ខ្លួនបាន អនុប្រធានាធិបតីនឹងស្នងអំណាច និងតួនាទីរបស់ប្រធានាធិបតីក្នុងនាមជាប្រធានាធិបតីស្ដីទី។ តែបើប្រធានាធិបតីជូនដំណឹងទៅថ្នាក់ដឹកនាំស្ថាប័ននីតិបញ្ញត្តិថា ខ្លួននៅតែអាចដឹកនាំបាន នោះប្រធានាធិបតីអាចបន្តអំណាចដដែល។

លោក ត្រាំ ខឹងសម្បារយ៉ាងខ្លាំងចំពោះអត្ថបទរបស់មន្ត្រីក្នុងសេតវិមានរបស់លោក ហើយលោកក៏បានប្រកាសរកមុខមន្ត្រីជាន់ខ្ពស់នោផង។ ប្រធានាធិបតីអាមេរិករូបនេះក៏ទទូចឲ្យក្រសួងយុត្តិធម៌ស្វែងរកអត្តសញ្ញាណមន្ត្រីរូបនេះផង។ សំណើរបស់លោក ត្រាំ បង្កជាការព្រួយបារម្ភថា លោកចង់ប្រើប្រព័ន្ធអនុវត្តច្បាប់ជាឧបករណ៍ផ្ដល់រង្វាន់ និងដាក់ពិន័យផ្នែកនយោបាយ។

បក្សប្រជាធិបតេយ្យអាមេរិក ក៏បានរិះគន់លោក ត្រាំ ដែលបញ្ជាឲ្យក្រសួងយុត្តិធម៌វែកមុខមន្ត្រីដែលសរសេរ Op-ed នេះ ហើយចាត់ទុកការទទូចរបស់លោកថា ទៅហួសពីព្រំដែនទៅហើយ។ សមាជិកព្រឹទ្ធសភាបក្សប្រជាធិបតេយ្យ Mark R Warner បានលើកជាសំណួរក្នុងបទសម្ភាសជាមួយទូរទស្សន៍ CNN ថា៖ «តើប្រធានាធិបតីរូបនេះមិនយល់ឬទេថា ក្រសួងយុត្តិធម៌មិនមែនជាឧបករណ៍នយោបាយរបស់ខ្លួនឡើយ?»