អន្តរជាតិ
មេដឹកនាំកូរ៉េខាងជើង គីម ជុងអ៊ុន ចាប់ដៃប្រធានាធិបតីអាមេរិក ដូណាល់ ត្រាំ នាជំនួបនៅសិង្ហបុរី (រូបភាព AFP)
×![]()
ដោយ: តន ចាន់រិទ្ធារ៉ា
មេដឹកនាំកំពូលកូរ៉េខាងជើង គីម ជុងអ៊ុន បានផ្ញើសំបុត្រទៅកាន់ប្រធានាធិបតីអាមេរិក ដូណាល់ ត្រាំ និងស្នើរៀបចំជំនួបទល់លើកទីពីរ។ សេតវិមាន នៅថ្ងៃទី១០ ខែកញ្ញា បានប្រកាសថា លោក ត្រាំ បានទទួលសំបុត្រនោះរួចហើយ ឯការរៀបចំជំនួបមេដឹកនាំអាមេរិក និងកូរ៉េខាងជើង ក៏កំពុងស្ថិតក្នុងការការរៀបចំដែរ។ ទីប្រឹក្សាសន្តិសុខរបស់លោក ត្រាំ និយាយថា មេដឹកនាំទាំងពីរអាចនឹងជួបគ្នាម្ដងទៀតនៅដំណាច់ឆ្នាំនេះ។
សំបុត្ររបស់ប្រធានគណៈកម្មការកិច្ចការរដ្ឋកូរ៉េខាងជើង គីម ជុងអ៊ុន បានទៅដល់ដៃប្រធានាធិបតីអាមេរិក ដូណាល់ ត្រាំ ហើយ។ លោក ត្រាំ ទំនងអន្ទះសាចង់ឃើញអត្ថន័យក្នុងសំបុត្ររបស់មេដឹកនាំកូរ៉េខាងជើងខ្លាំង ព្រោះលោកបានលើកឡើងម្ដងជាពីរដងពីសំបុត្រនេះ ស្របពេលដែលការដែលចរចារវាងអាមេរិក និងកូរ៉េខាងជើងលើការរំសាយនុយក្លេអ៊ែរបានជាប់គាំងមិនទៅមុខ។
អ្នកនាំពាក្យសេតវិមាន Sarah Sanders បានប្រកាសនៅថ្ងៃទី១០ ខែកញ្ញា ថា សំបុត្ររបស់លោក គឺម ជាលិខិតដ៏កក់ក្ដៅ និងវិជ្ជមាន។ មន្ត្រីអាមេរិករូបនេះបន្តថា សំបុត្ររបស់មេដឹកនាំកូរ៉េខាងជើងជាសារបង្ហាញពីការបន្តប្ដេជ្ញាចិត្តរបស់កូរ៉េខាងជើងក្នុងការរំសាយនុយក្លេអ៊ែរនៅឧបទ្វីបកូរ៉េ។ លោកស្រី Sanders បានបង្ហើបអត្ថន័យក្នុងសំបុត្រដែរថា មានគោលដៅចម្បងកំណត់កាលបរិច្ឆេទជំនួបមេដឹកនាំម្ដងទៀត។
ជាមួយនឹងសំបុត្ររបស់កូរ៉េខាងជើង អ្នកនាំពាក្យដដែលនេះក៏ប្រកាសជំហរអាមេរិកទៅវិញថា គឺបើកចំហរសម្រាប់ជំនួបកំពូលមេដឹកនាំ ឯការរៀបចំស្ថិតក្នុងការសម្របសម្រួលគ្នាអស់ហើយ។ សំបុត្រដដែលនេះ ក៏បង្ហាញពីការរីកចម្រើនថ្មីទៀតនៃទំនាក់ទំនងអាមេរិក និងកូរ៉េខាងជើង ដែលធ្លាប់តែមើលមុខគ្នាមិនចំ គំរាមកម្ទេចគ្នាទៅវិញទៅមក។ ជំនួបលើកទី១ នៅសិង្ហបុរី គឺជាចំណុចរបត់ថ្មីក្នុងទំនាក់ទំនងរវាងសត្រូវទាំងពីរ។
ការរីកចម្រើនដែលលោកស្រី Sanders មើលឃើញនោះ គឺការដោះលែងជនជាតិអាមេរិក ការធ្វើមាតុភូមិនិវត្តន៍គ្រោងឆ្អឹងដែលជឿថាជាទាហានអាមេរិក ព្រមទាំងការផ្អាកការបាញ់មីស៊ីល និងការសាកល្បងមីស៊ីលពីសំណាក់កូរ៉េខាងជើង។ ប៉ុន្តែបើនិយាយពីការលុបបំបាត់នុយក្លេអ៊ែរវិញនោះ គេមិនទាន់ឃើញមានសកម្មភាពជាដុំកំភួនអ្វីនៅឡើយទេ ដែលរឿងនេះធ្វើឲ្យអាមេរិកខកចិត្តខ្លាំង និងទាមទារឲ្យកូរ៉េខាងជើងធ្វើសកម្មភាពឲ្យច្រើនទៀត។
ជុំវិញកាលបរិច្ឆេទជំនួបលើកទី២ រវាងលោក ត្រាំ និងលោក គីម មន្ត្រីសេតវិមានខាងលើមិនបញ្ចេញព័ត៌មានលម្អិតឡើយទាំងពេលវេលាជាក់លាក់ និងទីកន្លែងជំនួប តែនឹងប្រកាសតាមក្រោយវិញ។ ដោយឡែកទីប្រឹក្សាសន្តិសុខជាតិអាមេរិក លោក ចន ប៊ូលតុន នៅថ្ងៃទី១០ បានលើកឡើងពីលទ្ធភាពលើសលប់ដែលប្រធានាធិបតីអាមេរិក និងមេដឹកនាំកំពូលកូរ៉េខាងជើង អាចជួបគ្នានៅចុងឆ្នាំ២០១៨ នេះតែម្ដង៕
Tag:
អាមេរិក
កូរ៉េខាងជើង
ដូណាល់ ត្រាំ
គីម ជុងអ៊ុន
© រក្សាសិទ្ធិដោយ thmeythmey.com
