ជាតិ
យុវជន ណៃ ម៉ាណេត ទទួលបានពានរង្វាន់ឆ្នើមលើការតស៊ូមតិក្នុងតំបន់អាស៊ាន
× ភ្នំពេញ៖ យុវជនកម្ពុជាមួយរូប បានទទួលពានរង្វាន់អ្នកតស៊ូមតិ និងវោហាស័ព្ទជាសាធារណៈឆ្នើម ក្នុងចំណោមបេក្ខជនឆ្នើម៥នាក់ ដែលមកប្រទេសក្នុងតំបន់អាស៊ាន ក្នុងការចូលរួមជជែកដេញដោលពីបញ្ហាសិទ្ធមនុស្ស ឆ្នាំ២០១៨ (AICR Youth Debate On Human Rights 2018)។គណៈកម្មការអន្តររដ្ឋាភិបាលអាស៊ានស្ដីពីសិទ្ធមនុស្ស បានរៀបចំកម្មវិធីជជែកដេញដោលគ្នានេះឡើង ដើម្បីលើកម្ពស់ការយល់ដឹង និងការបញ្ចេញមតិរបស់យុវជន ជុំវិញបញ្ហាសិទ្ធមនុស្ស ។
បេក្ខជនចំនួន៥ក្រុម (មួយក្រុម៦ប្រទេស) មកពីបណ្ដាប្រទេសសមាជិកអាស៊ានរួមមាន កម្ពុជា ព្រុយណេ ឥណ្ឌូនេស៊ី វៀតណាម មីយ៉ាន់ម៉ា សិង្ហបុរី ឡាវ ម៉ាឡេស៊ី ថៃ និង ហ្វីលីពីន បានបង្ហាញសមត្ថភាពតស៊ូមតិ លើប្រធានបទចំនួន៥ ដែលទាក់ទងទៅនឹងបញ្ហាសិទ្ធិមនុស្ស។ ប្រធានបទទាំង៥នោះ រួមមាន សិទ្ធិមនុស្សគួរជាមុខវិជ្ជាចាំបាច់សម្រាប់គ្រិះស្ថានសិក្សាក្នុងបណ្ដាប្រទេសអាស៊ាន, កុមារជាកូនរបស់ពលករចំណាកស្រុកគួរមានសិទ្ធិទទួលបានការអប់រំ ,តារាល្បីមិនមានសិទ្ធិឯកជនភាព, ការបំពុលបរិយាកាសគួរតែចាត់ទុកជាបទល្មើសឆ្លងដែន និងការរំលោភសេពសន្ថវៈគួរតែចាត់ទុកជាបទល្មើសប្រហាជីវិត។
ក្នុងកម្មវិធីជជែកដេញដោលគ្នានេះ យុវជនឆ្នើម៥រូប បានជាប់ពានរង្វាន់តស៊ូមតិ និងវោហាស័ព្ទជាសាធារណៈ ដែលក្នុងនោះមានយុវជនកម្ពុជាម្នាក់ ។ លោក ណៃ ម៉ាណេត មកពីសាកលវិទ្យាល័យភូមិន្ទភ្នំពេញ បានដណ្តើមបានជ័យលាភីអ្នកតស៊ូមតិដែលមានថ្វីមាត់ល្អជាងគេ ក្នុងចំណោម ៥នាក់ (២នាក់មកពី ហ្វីលីពីន ១នាក់មកពីម៉ាឡេស៊ី និង១នាក់ទៀតមកពីឥណ្ទូនេស៊ី)។
ថ្លែងក្នុងបទសម្ភាសដល់សាព័ត៌មានថ្មីៗយុវជន ណៃ ម៉ាណេត បានបញ្ជាក់ដូច្នេះថា៖«សម្រាប់ខ្ញុំគឺយើងត្រូវយល់ច្បាស់ប្រធានបទរបស់យើង។ ហេតុអ្វីថ្ងៃនឹងយើងត្រូវមកឈ្លោះគ្នាក្នុងប្រធានបទមួយហ្នឹង តើយើងនៅផ្នែកមួយណា ហេតុអ្វីបានខាងក្រុមយើងធ្វើសកម្មភាពមួយដែលត្រឹមត្រូវ ហើយធ្វើអ្វីមួយដែលល្អ។ អ៊ីចឹងនៅពេលនឹង ពេលដែលយើងរកអ្វីដែលត្រឹមត្រូវ នឹងល្អឃើញ ពេលនឹងយើងអាចទាក់ទាញចំណាប់អារម្មណ៍ពីទស្សនិកជនបាន»។
ក្រៅពីទទួលបានលទ្ធផលជោគជ័យហើយ យុវជន ម៉ាណេត ក៏បានរៀនសូត្រច្រើន ទាក់ទងទៅនឹងចំណេះដឹងពីមនុស្សជាទូទៅក្នុងអាស៊ានទាំងមូល និងវិធីប្រើវោហាស័ព្ទជាសារធារណៈ និងតស៊ូមតិជាមួយបរទេស។ ជាពិសេសក៏បានស្គាល់មិត្តភក្តិច្រើន ដែលមកពីបណ្ដាប្រទេសក្នុងតំបន់អាស៊ាន។ នេះជាការបន្ថែមរបស់យុវជន ម៉ាណេត។
កម្ពុជា ជាម្ចាស់ផ្ទះក្នុងកម្មវិធីតស៊ូមតិលើកទី៥នេះ ( AICR Youth Debate On Human Rights 2018) ដែលមាននិស្សិតមកពី៣០សកលវិទ្យាល័យក្នុងប្រទេសសមាជិកអាស៊ាន។ យុវជនមកពី១០ប្រទេសក្នុងតំបនអាស៊ានបានចូលរួមជជែកដេញដោលពីបញ្ហាសិទ្ធមនុស្សឆ្នាំ២០១៨ (AICR Youth Debate On Human Rights 2018) ដើម្បីលើកកម្ពស់ការយល់ដឹង និងការបញ្ចេញមតិរបស់យុវជនអំពីសិទ្ធមនុស្ស និងបង្កើនទំនាក់ទំនងល្អរវាងយុវជនក្នុងប្រទេសនីមួយៗ ៕
© រក្សាសិទ្ធិដោយ thmeythmey.com