គន្ធបុប្ផានៅភ្នំពេញផ្តល់ឱកាសពលរដ្ឋគោរពវិញ្ញាណក្ខន្ធលោករីចឈ្នឺរ ដល់ថ្ងៃទី១៦កញ្ញា

ជាតិ

គន្ធបុប្ផានៅភ្នំពេញផ្តល់ឱកាសពលរដ្ឋគោរពវិញ្ញាណក្ខន្ធលោករីចឈ្នឺរ ដល់ថ្ងៃទី១៦កញ្ញា

11, Sep 2018 , 9:19 pm

រូបភាព

លោកវេជ្ជបណ្ឌិត ដេនីស ឡូរ៉ង់ (Denis Laurent) ជំនួយការលោកវេជ្ជបណ្ឌិត Beat Richner នៅខាងឆ្វេងដៃ និងលោក វេជ្ជបណ្ឌិត គី សន្ទី ប្រធានមន្ទីរពេទ្យគន្ធបុប្ផាភ្នំពេញ

ដោយ: អ៊ូ សុខមាន (OU Sokmean)

ភ្នំពេញ៖ មន្ទីរពេទ្យគន្ធបុប្ផាទី១ បានរៀបចំពិធីគោរពវិញ្ញាណក្ខន្ធសពលោកវេជ្ជបណ្ឌិត បេអាត រីចឈ្នឺរ( Beat Richner) ដល់ថ្ងៃទី១៦ ខែកញ្ញា ឆ្នាំ២០១៨ នៅមជ្ឈមណ្ឌលព័ត៌មានគន្ធបុប្ផា (ក្បែរវត្ដភ្នំ) ដើម្បីផ្តល់ឱកាសដល់ប្រជាពលរដ្ឋគ្រប់រូប ចូលរួមរំលែកទុក្ខលោក រីចឈ្នឺរ ។ នេះបើតាមការបញ្ជាក់របស់លោកសាស្ត្រាវេជ្ជបណ្ឌិត គី សន្ទី ប្រធានមន្ទីរពេទ្យគន្ធបុប្ផាភ្នំពេញ។

លោក គី សន្ទី បានថ្លែងក្នុងពិធីគោរពវិញ្ញាណក្ខន្ធសពលោក បេអាត រីចឈ្នឺរ នៅមជ្ឈមណ្ឌលព័ត៌មានគន្ធបុប្ផាថា ៖«នៅថ្ងៃចុងក្រោយនៃការរក្សាពិធីបុណ្យសព លោក រីចឈ្នឺរ នឹងមានធ្វើពិធីបុណ្យ៧ថ្ងៃ តាមបែបព្រះពុទ្ធសាសនា ព្រមទាំងនិមន្តព្រះសង្ឃចំនួន៧២អង្គ ដើម្បីធ្វើពិធីរាប់បាតផងដែរ»។

ចំណែកក្រសួងសុខាភិបាល ក៏មានការរៀបចំពិធីគោរពវិញ្ញាណក្ខន្ធសពលោកវេជ្ជបណ្ឌិត បេអាត រីច រហូតដល់ថ្ងៃទី១២ ខែកញ្ញាផងដែរ។

លោកវេជ្ជបណ្ឌិត បេអាត រិចឈ្នឺរ ជាស្ថាបនិកមូលនិធិមន្ទីរពេទ្យគន្ធបុប្ផា បានទទួលមរណភាពដោយសារជំងឺក្នុងវ័យ៧១ឆ្នាំ នៅក្នុងទីក្រុង Zurich ប្រទេសស្វីស នាថ្ងៃទី៩ខែកញ្ញា។ លោកវេជ្ជបណ្ឌិត បេអាត រិចឈ្នឺរ មានឈ្មោះល្បីមួយទៀត គឺ Beattocello ដែលជាឈ្មោះសម្រាប់ហៅពេលដែលលោកប្រគំឧបករណ៍ Cello រៃអង្គាសថវិកាដើម្បីឧបត្ថម្ភមន្ទីរពេទ្យគន្ធបុប្ជាដែលបានជួយកុមារកម្ពុជារាប់លាននាក់ ចាប់តាំងពីឆ្នាំ១៩៩២មក៕