អាមេរិកចំណាយលុយ ១,៥ ទ្រីលានដុល្លារលើសង្គ្រាមនៅបរទេស ចាប់ពីការវាយប្រហារថ្ងៃ ១១ ខែកញ្ញា

អន្តរជាតិ

អាមេរិកចំណាយលុយ ១,៥ ទ្រីលានដុល្លារលើសង្គ្រាមនៅបរទេស ចាប់ពីការវាយប្រហារថ្ងៃ ១១ ខែកញ្ញា

11, Sep 2018 , 5:50 pm

រូបភាព

ដោយ: ថ្មីៗ

ថ្ងៃទី ១១ ខែកញ្ញាឆ្នាំនេះជាខួប ១៧ ឆ្នាំនៃការវាយប្រហារលើអាគារពាណិជ្ជកម្មពិភពលោកដោយក្រុមភេរវជនអាល់កៃដា។ រាប់ចាប់ពីឆ្នាំ ២០០១ មកដល់បច្ចុប្បន្ននេះសហរដ្ឋអាមេរិកបានចំណាយលុយប្រហែលរាប់ទ្រីលានដុល្លារលើសង្គ្រាមប្រឆាំងភេរវកម្មនៅអាហ្វហ្គានីស្ថាន។

របាយការណ៍ក្រសួងការពារជាតិអាមេរិកនៅថ្ងៃអង្គារទី ១១ ខែកញ្ញានេះបានបង្ហាញថា សហរដ្ឋអាមេរិកបានចំណាយលុយប្រហែល ១,៥ ទ្រីលានដុល្លារចាប់ពីការវាយប្រហារថ្ងៃ ១១ ខែកញ្ញាឆ្នាំ ២០០១ មកនេះដើម្បីធ្វើសង្គ្រាម។

យោងតាមសារព័ត៌មាន CNBC របាយការណ៍ក្រសួងខាងលើបានបញ្ជាក់ថា ប្រតិបត្តិការយោធាធំៗបីនាពេលបច្ចុប្បន្នមានដូចជា ប្រតិបត្តិការនៅអាហ្វហ្គានីស្ថាន, ស៊ីរី និងអ៊ីរ៉ាក់ រួមទាំងប្រតិបត្តិការពង្រឹងសមត្ថភាពសន្តិសុខក្នុងស្រុក (Operation Noble Eagle) ត្រូវចំណាយលុយអស់ ១៨៥,៥ពាន់លានដុល្លារឯណោះ។

របាយការណ៍ដដែលនេះបានបន្ថែមថា ថវិកាទាំងនោះត្រូវបានប្រើប្រាស់លើការបំពាក់បំប៉នសមត្ថភាព សម្ភារៈយោធា និងជួសជុលអាវុធ រួមទាំងចំណីអាហារ សម្លៀកបំពាក់ សេវាសុខាភិបាល និងប្រាក់បៀវត្សរ៍កងទ័ព។

តាមពិតទៅ ក្រោយការវាយប្រហារលើអាគារពាណិជ្ជកម្មពិភពលោក អាមេរិកចាប់ផ្តើមប្រកាសង្គ្រាមប្រឆាំងភេរវកម្ម ហើយការចំណាយលើសង្គ្រាមចាប់ផ្តើមពីពេលនោះដែរ។ អាហ្វហ្គានីស្ថានកាលនោះក្លាយជាគោលដៅឈ្លានពានរបស់អាមេរិកដោយសាររដ្ឋាភិបាលក្រុងកាប៊ុលស្ថិតក្រោមការដឹកនាំរបស់ក្រុងតាលីបង់បដិសេធប្រគល់ អូសាម៉ា ប៊ិនឡាដិនឲ្យអាមេរិកនោះ។

ចាប់ពីពេលនោះមកអាមេរិកបន្តលង់ខ្លួនក្នុងសង្គ្រាមនេះរហូតមក។ មកដល់បច្ចុប្បន្ន អាហ្វហ្គានីស្ថានជាសង្គ្រាមយូរជាងគេក្នុងប្រវត្តិសាស្ត្រអាមេរិក ដោយវាមានអាយុកាល ១៧ឆ្នាំហើយ។ ទោះមានចេតនាចង់ដកកងទ័ពចេញក៏ដោយ បច្ចុប្បន្នអាមេរិកនៅសល់ទប់ប្រហែល ១៤ពាន់នាក់ដែលពួកគេភាគច្រើនដើរតួជាទីប្រឹក្សាយោធាសម្រាប់ទាហានអាហ្វហ្គានីស្ថាន។

យ៉ាងណាមិញ រដ្ឋបាលលោក ដូណាល់ត្រាំ បានបញ្ជាក់ពីគោលជំហរក្នុងការគាំទ្រការចរចាបង្កើតសន្តិភាពរវាងរដ្ឋាភិបាលអាហ្វហ្គានីស្ថានជាមួយក្រុមតាលីបង់ដែរដើម្បីបញ្ចប់សង្គ្រាមដ៏រ៉ាំរ៉ៃនេះ។

មុនដំណើរទស្សនកិច្ចមកកាន់អាហ្វហ្គានីស្ថានកាលពីថ្ងៃសុក្រសប្តាហ៍មុន រដ្ឋមន្ត្រីការពារជាតិអាមេរិក James Mattis បានបង្ហើបប្រាប់អ្នកសារព័ត៌មានថា លោកមានសង្ឃឹមថា កិច្ចសន្ទនាស្វែងរកសន្តិភាពជាមួយតាលីបង់ដើម្បីបញ្ចប់សង្គ្រាម។ កន្លងមកមន្ត្រីក្រសួងការបរទេសអាមេរិកក៏បានជួបពិភាក្សាជាមួយមន្ត្រីក្រុមតាលីបង់ដែរនៅប្រទេសកាតាដើម្បីធ្វើយ៉ាងណារៀបចំការងារស្នូលសម្រាប់ការឈានទៅចរចាសន្តិភាពទ្រង់ទ្រាយធំ៕