ជាតិ
×![]()
ភ្នំពេញ៖ ខេត្តចំនួន៧ នឹងប្រឈមមុខជាមួយជំនន់ទឹកភ្លៀងសារជាថ្មីនៅចុងសប្តាហ៍នេះ។ ខេត្តទាំងនោះ មាន ខេត្តឧត្តរមានជ័យ ព្រះវិហារ កំពង់ធំ បន្ទាយមានជ័យ បាត់ដំបង ពោធិ៍សាត់ និងខេត្តកំពង់ឆ្នាំង។ លោក កែវ វី អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយប្រាប់សារព័ត៌មានThmey Thmey ព្រឹកថ្ងៃទី១២កញ្ញា ថា បើភ្លៀងនៅតែបន្តធ្លាក់ ក្នុងកម្រិត៥០ ទៅ២០០មីលីម៉ែត្រ ខេត្តទាំងនោះនឹងរងនូវការលិចលង់ជាមិនខាន។ 
លោក កែវ វី បានបញ្ជាក់ដូច្នេះថា៖ «កម្រិតទឹកភ្លៀងនេះ គឺមិនបង្កអ្វីឲ្យមានភាពធ្ងន់ធ្ងរ ដូចជំនន់ទឹកភ្លៀង ក្នុងអំឡុងខែកក្កដាទេ។ ប៉ុន្តែក៏អាស្រ័យ ទៅលើអាកាសធាតុជាក់ស្តែងផងដែរ។ ថាតើកម្ពុជា ក្នុងរយៈពេលនេះ រងនូវឥទ្ធិពលសម្ពាសផ្សេងៗ ពីប្រទេសជិតខាង ដែរឬអត់»។
ក្នុងរយៈពេល៨ខែដើមឆ្នាំ២០១៨ គ្រោះទឹកជំនន់បានធ្វើឲ្យប៉ះពាល់២២រាជធានី-ខេត្ត លើកលែងខេត្តមណ្ឌលគីរី សៀមរាប និងខេត្តបន្ទាយមានជ័យ។ ចំនួន២២ខេត្តដែលប៉ះពាល់នោះ មានស្រុកចំនួន៩១ និងឃុំ-សង្កាត់ចំនួន៤១១ ត្រូវបានលិចលង់ ដោយសារជំនន់ទឹកភ្លៀង និងជំនន់ទន្លេមេគង្គ។
ប្រជាពលរដ្ឋដែលប៉ះពាល់មានជាង ១២ម៉ឺនគ្រួសារ។ ក្នុងនោះ ប្រជាពលរដ្ឋដែលជម្លៀសទៅទីទួលសុវត្ថិភាពមានជាង១១ពាន់គ្រួសារ និងមានមនុស្សស្លាប់ ដោយសារទឹកជំនន់ទន្លេមេគង្គមាន ៤៤នាក់។
ដោយឡែក ដំណាំស្រូវប៉ះពាល់ប្រមាណ ៨២ពាន់ហិកតា មានការខូចខាតជិត ៤ម៉ឺនហិកតា និងដំណាំរួមផ្សំ មានការខូចខាតទាំងស្រុងប្រមាណ ៥ពាន់ហិកតា៕
Tag:
ទឹកជំនន់
កែវ វី
© រក្សាសិទ្ធិដោយ thmeythmey.com
