សម្តេចព្រះវររាជមាតា៖ វេជ្ជបណ្ឌិត បេអាត រីចឈ្នឺរ ជាវីរបុរសកម្ពុជាតាំងពីឆ្នាំ១៩៩២មក

ជាតិ

សុខភាព

សម្តេចព្រះវររាជមាតា៖ វេជ្ជបណ្ឌិត បេអាត រីចឈ្នឺរ ជាវីរបុរសកម្ពុជាតាំងពីឆ្នាំ១៩៩២មក

12, Sep 2018 , 2:02 pm

រូបភាព

ដោយ: ថ្មីៗ

ពីរដ្ឋធានីប៉េកាំង សម្តេចព្រះវររាជមាតាជាតិខ្មែរ នរោត្តម មុនិនាថ សីហនុ បានផ្ញើរព្រះរាជរំលែកទុក្ខចំពោះការបាត់បង់លោកវេជ្ជបណ្ឌិត បេអាត រីចឈ្នឺរ ស្ថាបនិកមូលនិធិគន្ធបុប្ផា ដែលព្រះអង្គចាត់ទុកថា ជាវីរបុរសរបស់កម្ពុជាមួយ។

ក្នុងព្រះរាជសារចុះថ្ងៃទី១២ ខែកញ្ញា ទៅកាន់លោក Rene Schwartzenbach និងលោក Peter Studer ដែលជាប្រធាន និងអនុប្រធានមូលនិធិមន្ទីរពេទ្យ សម្តេចព្រះរវរាជមាតា បានសំដែងព្រះទ័យសោកស្តាយចំពោះ ដំណឹងមរណភាពលោក បេអាត រីចឈ្នឺរ ក្នុងអាយុ៧១ឆ្នាំ។

សម្តេចម៉ែ មានព្រះរាជចំណារថា៖ «វេជ្ជបណ្ឌិត បេអាត រីចឈ្នឺរ គឺជាវីរបុរសម្នាក់របស់កម្ពុជា ចាប់តាំងពីឆ្នាំ១៩៩២មក។ លោកបានផ្តួចផ្តើមបង្កើតមូលនិធិមន្ទីរពេទ្យគន្ធបុប្ផានៅភ្នំពេញ បន្ទាប់មកនៅសៀមរាប។ អស់រយៈពេលជាង២០ឆ្នាំ ហើយបន្តដល់បច្ចុប្បន្ននេះ កុមាររាប់ម៉ឺននាក់រស់រានមានជីវិត និងរាប់លាននាក់ផ្សេងទៀត ទទួលការព្យាបាលជាមួយនឹងការលះបង់ និងក្តីស្រឡាញ់ខ្ពស់»។

សម្តេចព្រះមហាក្សត្រី ព្រះវររាជមាតា ទ្រង់បានបន្ថែមថា បុរសដែលមានរហស្សនាមថា «Beatocello» ជាមនុស្សដែលព្រះអង្គ និងសម្តេចព្រះវររាជបិតា នរោត្តម សីហនុ តែងតែកោតសរសើរ។ គាត់នឹងស្ថិតក្នុងបេះដូងពលរដ្ឋខ្មែរជារៀងដរាប ពីព្រោះគាត់គឺជាទេវតាដែលបានសង្គ្រោះកុមារកម្ពុជា៕