ហែលទឹកបញ្ជូនកីឡាករទៅហ្វឹកហាត់នៅជប៉ុន ក្នុងថ្ងៃរៀបចំពានរង្វាន់សម្តេច ស ខេង

កីឡាជាតិ

ជាតិ

ហែលទឹកបញ្ជូនកីឡាករទៅហ្វឹកហាត់នៅជប៉ុន ក្នុងថ្ងៃរៀបចំពានរង្វាន់សម្តេច ស ខេង

14, Sep 2018 , 8:59 am

រូបភាព

កីឡាការិនី ហែម ថុន វិទិនី បង្ហាញមេដាយមាសដែលខ្លួនឈ្នះក្នុងព្រឹត្តិការណ៍កីឡាជាតិលើកទី១។ រូបថត ហ្វេសប៊ុក វិទិនី

ដោយ:

សហព័ន្ធខ្មែរកីឡាហែលទឹក នឹងបញ្ជូនកីឡាករជាច្រើនរូបទៅហ្វឹកហាត់ដកស្រង់បច្ចេកទេសរយៈពេលខ្លីនៅប្រទេសជប៉ុន នាថ្ងៃទី២៤ ខែកញ្ញា ឆ្នាំ២០១៨ ខាងមុខ។ ក្រៅពីការហ្វឹកហាត់ ការសិក្សាពីវប្បធម៌ ប្រពៃណី ទំនៀបទម្លាប់ និងរបៀបរបបរស់នៅរបស់ប្រជាជនជប៉ុន ក៏ជាគោលបំណងផងដែរ។ ក្នុងថ្ងៃនោះដែរ សហព័ន្ធ នឹងរៀបចំការប្រកួតពានរង្វាន់សម្តេច ស ខេង ប្រចាំឆ្នាំ២០១៨។

កីឡាករ គ្រូបង្វឹក និងថ្នាក់ដឹកនាំចំនួន២១រូប នឹងចេញទៅហ្វឹកហាត់ដកស្រង់បច្ចេកទេស និងបទពិសោធ១សប្តាហ៍នៅទីក្រុងតូក្យូ និងខេត្តតូស៊ីម៉ាប្រទេសជប៉ុន។ ការសិក្សាពីវប្បធម៌ ប្រពៃណី ទំនៀបទម្លាប់ និងរបៀបរបបរស់នៅរបស់ប្រជាជនជប៉ុន ក៏ជាគោលបំណងនៃបេសកកម្មនេះដែរ។ នេះបើតាមការអះអាងរបស់លោក ហែម គីរី អគ្គលេខាធិការសហព័ន្ធខ្មែរកីឡាហែលទឹក។

លោកបន្ថែមថា ការហ្វឹកហាត់រយៈពេលខ្លីនេះ គ្រាន់តែជាជំហានដំបូងក្នុងការដកស្រង់បច្ចេកទេស និងបង្កើនទំនាក់ទំនងឲ្យកាន់តែជិតស្និតរវាងកីឡាករនៃប្រទេសទាំងពីរ មុនឈានដល់ការបញ្ជូនកីឡាករទៅហ្វឹកហាត់រយៈពេលវែងនាថ្ងៃអនាគត។ កីឡាករកម្ពុជាត្រូវហ្វឹកហាត់រយៈពេល២ថ្ងៃនៅទីក្រុងតូក្យូ និង៥ថ្ងៃនៅខេត្តតូស៊ីម៉ា(Toshima)។

ក្រុមកីឡាករ និងគ្រូបង្វឹក ដែលដឹកនាំដោយលោក នាង សុរិទ្ធិយ៉ា អគ្គលេខាធិការរងសហព័ន្ធ ចេញពីកម្ពុជាទៅកាន់ប្រទេសជប៉ុននៅថ្ងៃទី២៤ ខែកញ្ញា ឆ្នាំ២០១៨។ សម្រាប់ការចេញទៅលើកនេះ កីឡាករទាំងអស់មិនស្នាក់នៅសណ្ឋាគារនោះទេ គឺស្នាក់នៅតាមផ្ទះប្រជាពលរដ្ឋជប៉ុន ដើម្បីងាយស្រួលក្នុងការសិក្សាពីការរស់នៅរវាងប្រជាជនកម្ពុជានិងជប៉ុន។

នៅថ្ងៃទី២៤ ខែកញ្ញានោះដែរ សហព័ន្ធខ្មែរកីឡាហែលទឹកនឹងរៀបចំការប្រកួតកីឡាហែលទឹកដណ្តើមពានរង្វាន់សម្តេច ស ខេង ប្រចាំឆ្នាំ២០១៨។ លោក ហែម គីរី អះអាងថា ការប្រកួតនេះមិនប៉ះពាល់ដល់ការចាកចេញរបស់កីឡាករទៅជប៉ុននោះទេ។ ពោលគីការប្រកួតរៀបចំនៅពេលព្រឹក ខណៈកីឡាករចេញទៅនៅពេលល្ងាច។

ការចេញទៅហ្វឹកហាត់តាមការអញ្ជើញរបស់ភាគីជប៉ុននេះ លោក ស៊ុន ចាន់ថុល ប្រធានសហព័ន្ធខ្មែរកីឡាហែលទឹកបានឧបត្ថម្ភថវិកាម្នាក់ៗចំនួន២០០ដុល្លារអាមេរិក៕