ទ័ពអស់ឱកាសប្រជែងជើងឯក ក្រោយចាញ់ក្រុមណាហ្គាវើល ២-០

កីឡាជាតិ

ជាតិ

ទ័ពអស់ឱកាសប្រជែងជើងឯក ក្រោយចាញ់ក្រុមណាហ្គាវើល ២-០

16, Sep 2018 , 10:39 am

រូបភាព

ដោយ:

ក្រុមបាល់ទាត់ណាហ្គាវើល បានបន្តឈរកំពូលតារាងពានរង្វាន់ក្របខណ្ឌមិត្តហ្វូនខេមបូឌានលីគ សប្តាហ៍ទី២០បណ្តោះអាសន្ន ក្រោយយកឈ្នះក្រសួងការពារជាតិ(ទ័ព)ក្នុងលទ្ធផល ២-០។ ជ័យជម្នះនេះមានន័យថាណាហ្គាវើល បានទម្លាក់ក្រសួងការពារជាតិពីឱកាសប្រជែងដណ្តើមជើងឯកលីគកំពូលនៅឆ្នាំនេះ។ ជាមួយគ្នានេះ វិសាខាបានឡើងឈរលេខ២បណ្តោះអាសន្ន ក្រោយយកឈ្នះអគ្គស្នងការនគរបាលជាតិ ៤-១។

ក្រុមក្រសួងការពារជាតិ ដែលបានទម្លាក់ណាហ្គាវើលជាមួយជ័យជម្នះ ៣-១ នៅវគ្គពាក់កណ្តាលផ្តាច់ព្រ័ត្រពានរង្វាន់សម្តេច ហ៊ុន សែន ត្រូវបានណាហ្គាវើលទម្លាក់វិញម្តង ពីឱកាសប្រជែងដណ្តើមជើងឯកពានរង្វាន់ក្របខណ្ឌខេមបូឌានលីគឆ្នាំ២០១៨។ ការអស់ឱកាសប្រជែងជើងឯករបស់ទ័ព បន្ទាប់ពីពួកគេចាញ់ណាហ្គាវើល ២-០ នាជំនួបនៅកីឡដ្ឋានស្តាតចាស់កាលពីរសៀលថ្ងៃទី១៥ ខែកញ្ញា ឆ្នាំ២០១៨។

នាជំនួបដ៏ស្វិតស្វាញនោះ ខ្សែប្រយុទ្ធកូរ៉េខាងត្បូង Sung Chihoon បានរកសម្រេចគ្រាប់បាល់នាំមុខ ១-០ ឲ្យណាហ្គាវើលនៅ៣នាទីដំបូងនៃតង់ទី១ តាមរយៈការទាត់ពីចម្ងាយ ក្រោយការបញ្ជូនរបស់ សុះ ស៊ូហាណា។ កីឡាកររូបនេះ មានឱកាសល្អម្តងទៀតនៅនាទីទី៩ ប៉ុន្តែធ្វើមិនបានសម្រេចក្រោយទាត់បាល់ទៅប៉ះដៃអ្នកចាំ អ៊ុំ វិចិត្រ ផ្លាតឡើងលើរបាទី។

ឈានដល់នាទី៣៣ ខ្សែប្រយុទ្ធនីហ្សេរីយ៉ា Bisan George ដែលខកឱកាសក្រោយទាត់បាល់ទៅប៉ះបង្គោលទីពេលនៅ១ស្មើជាអ្នកចាំទីទ័ព បានតែតបាល់សម្រេចបាន១គ្រាប់បន្ថែមសម្រាប់ណាហ្គាវើល ក្រោយការលើចេញពីជ្រុងរបស់មិត្តរួមក្រុម ដើម្បីបង្កើនការនាំមុខ ២-០ ក្នុងតង់ទី១។ ក្រុមទាំងពីរបានរក្សាលទ្ធផលនេះរហូតចប់ការប្រកួត ទោះបីក្រុមទាំងពីរបានព្យាយាមដាក់សម្ពាធនិងបង្កើតឱកាសមាសទៅវិញទៅមកក៏ដោយ។ កាលជើងទី១ណាហ្គាវើល បានយកឈ្នះទ័ពក្នុងលទ្ធផល ២-០ ដូចគ្នា។

ជ័យជម្នះនេះ ជួយឲ្យណាហ្គាវើល បន្តឈរកំពូលតារាងពានរង្វាន់ក្របខណ្ឌខេមបូឌានលីគប្រចាំសប្តាហ៍ទី២០បណ្តោះអាសន្នដោយមាន៥០ពិន្ទុ។ សម្រាប់ពីរប្រកួតចុងក្រោយ ដែលការប្រកួតកំណត់ជោគវាសនា ណាហ្គាវើលត្រូវប្រជែងជាមួយវិសាខានៅសប្តាហ៍ទី២១ មុនប៉ះអគ្គស្នងការនគរបាលជាតិនៅសប្តាហ៍ទី២២ ដែលជាជំនួបចុងក្រោយ។

ការប្រកួតនៅកីឡដ្ឋានស្តាតចាស់កាលពីថ្ងៃសៅរ៍នោះដែរ ក្រុមវិសាខាបានយកឈ្នះអគ្គស្នងការនគរបាលជាតិក្នុងលទ្ធផល ៤-១ ដើម្បីឡើងឈរលេខ២បណ្តោះអាសន្នក្នុងតារាងមាន៤៥ពិន្ទុ។ នាជំនួបគ្មានការស៊ុតបញ្ចូលទីក្នុងតង់ទី១ ខ្សែប្រយុទ្ធ កែវ សុខផេង បានសម្រេចគ្រាប់បាល់នាំមុខ ១-០ សម្រាប់វិសាខានៅនាទី៦៧ មុនខ្សែប្រយុទ្ធ នួន បូរី វាយបកតាមស្មើ ១-១ ឲ្យប៉ូលិសនៅនាទី៧៥។

ឈានដល់នាទី៨៤ កីឡាករ ងយ ស្រ៊ីន បានសម្រេចគ្រាប់បាល់នាំមុខ ២-១ សាជាថ្មីសម្រាប់វិសាខា មុនខ្សែប្រយុទ្ធកូរ៉េខាងជើង Cheo Myong-ho ទាត់បាល់ពិន័យ១១ម៉ែត្រសម្រេចបាន១គ្រាប់បន្ថែមនៅនាទី៨៨។ ក្រោយមកកីឡាករកូរ៉េខាងជើង Song Chol Pak សម្រេចគ្រាប់ជ័យជម្នះ ៤-១ សម្រាប់វិសាខានៅនាទីបន្ថែមនៃតង់ទី២។

នៅកីឡដ្ឋានខេត្តស្វាយរៀង ម្ចាស់ផ្ទះព្រះខ័នរាជស្វាយរៀងបានលត់ភ្ញៀវសូលទីឡូអង្គរក្នុងលទ្ធផល ៥-២។ កីឡាករ ផាន មករា បានសម្រេចគ្រាប់បាល់នាំមុខ ១-០ សម្រាប់ភ្ញៀវនៅ៣នាទីដំបូងនៃតង់ទី១ បន្ទាប់មកកីឡាករ Debiro Dzarma Bata បន្ថែម១ទៀតនៅនាទី៣៦ ដើម្បីបង្កើនការនាំមុខ ២-០ សម្រាប់សូលទីឡូអង្គរ។ ៨នាទីក្រោយមក នេន សុធារ័ត្ន បានវាយបក ២-១ តាមពីក្រោយសម្រាប់ម្ចាស់ផ្ទះ មុនកីឡាករប្រេស៊ីល Sergio Barboza Da Silva Junior រកគ្រាប់បាល់តាមស្មើ ២-២ ឲ្យម្ចាស់ផ្ទះនៅនាទីបន្ថែមនៃតង់ទី១។

ក្រោយមកកីឡាករ សួន សុវណ្ណ, នុប តុលា និងខ្សែប្រយុទ្ធប្រេស៊ីលខាងលើសម្រេចបានម្នាក់១គ្រាប់ជាបន្តបន្ទាប់នៅនាទី៦២, ៦៦ និង៧៧ ដើម្បីនាំជ័យជម្នះ ៥-២ សម្រាប់ម្ចាស់ផ្ទះព្រះខ័នរាជស្វាយរៀង។ ជ័យជម្នះនេះ ជួយឲ្យស្វាយរៀងបន្តឈរលេខ៦ក្នុងតារាងមាន២៧ពិន្ទុ ខណៈសូលទីឡូអង្គរស្ថិតនៅលេខ១០មាន១៦ពិន្ទុ៕