អាមេរិកថា រុស្ស៊ីប្រុងជ្រៀតជ្រែកប្រជាមតិនៅម៉ាសេដ្វាន

អន្តរជាតិ

អាមេរិកថា រុស្ស៊ីប្រុងជ្រៀតជ្រែកប្រជាមតិនៅម៉ាសេដ្វាន

17, Sep 2018 , 5:13 pm

រូបភាព

រដ្ឋមន្រ្តីការពារជាតិអាមេរិក ជេម ម៉ាធីស (រូបភាព AFP)

ដោយ: តន ចាន់រិទ្ធារ៉ា

រដ្ឋមន្ត្រីការពារជាតិអាមេរិក ជេម ម៉ាធីស នៅថ្ងៃទី១៧ ខែកញ្ញា បានចោទរុស្ស៊ីថា កំពុងជ្រៀតជ្រែកគម្រោងប្រជាមតិនៅម៉ាសេដ្វានដើម្បីប្ដូរឈ្មោះប្រទេស តាមរយៈការចែករំលែកព័ត៌មានមិនពិត។ ការប្ដូរឈ្មោះប្រទេសនេះ នឹងបើកផ្លូវឲ្យរដ្ឋមួយនេះក្លាយជាសមាជិកសហភាពអឺរ៉ុប និងសម្ព័ន្ធយោធាណាតូ។ បើតាមលោក ម៉ាធីស ក្រុងមូស្គូមិនសប្បាយចិត្តនឹងប្រជាមតិនេះឡើយព្រោះធ្វើឲ្យបាត់ឥទ្ធិពលខ្លួន ទើបរៀបផែនការកកូរកកាយផ្ទៃក្នុងម៉ាសេដ្វានតែម្ដង។

គ្មានអ្វីដែលត្រូវសង្ស័យឡើយដែលរុស្ស៊ីកំពុងឲ្យលុយក្រុមគាំទ្រខ្លួនដើម្បីជះឥទ្ធិពលដល់ប្រជាមតិប្ដូរឈ្មោះប្រទេសនៅម៉ាសេដ្វាននោះ។ នេះជាសម្ដីរដ្ឋមន្ត្រីការពារជាតិអាមេរិក ជេម ម៉ាធីស ទៅកាន់អ្នកសារព័ត៌មាននៅថ្ងៃទី១៧ ខែកញ្ញា ក្នុងដំណើរទៅកាន់រដ្ឋធានីស្កុបជេ ទឹកដីម៉ាសេដ្វាន។ លោក ម៉ាធីស ចោទរុស្ស៊ីថា កំពុងសាយភាយព័ត៌មានក្លែងក្លាយ សំដៅលូកលាន់ប្រជាមតិដែលគ្រោងធ្វើនៅថ្ងៃទី៣០ ខែកញ្ញា។

ប្រជាមតិនៅម៉ាសេដ្វាន ធ្វើឡើងបន្ទាប់ពីរដ្ឋាភិបាលក្រុងស្កុបជេ បានឯកភាពជាមួយរដ្ឋាភិបាលក្រិកដើម្បីប្ដូរឈ្មោះទៅជាសាធារណរដ្ឋម៉ាសេដ្វានខាងជើងវិញ។ កិច្ចព្រមព្រៀងខែមិថុនា ក៏នឹងបញ្ចប់ជម្លោះរវាងប្រទេសជិតខាងទាំងពីរនេះ ដែលធ្លាប់តែមិនត្រូវគ្នាព្រោះម៉ាសេដ្វានមានឈ្មោះដូចតំបន់មួយរបស់ក្រិក។

យ៉ាងណាមិញ គម្រោងប្ដូរឈ្មោះធ្វើឲ្យរុស្ស៊ីមិនសប្បាយចិត្តឡើយ ហើយដែលលោក ម៉ាធីស ជឿថា ជាមូលហេតុដែលនាំឲ្យក្រុងមូស្គូលូកដៃចូលរឿងនេះ។ បើតាមទីភ្នាក់ងារព័ត៌មាន AFP ប្រមុខការពារជាតិអាមេរិករូបនេះនិយាយថា អាមេរិកមិនចង់ឃើញរុស្ស៊ីធ្វើសកម្មភាពដូចដែលធ្លាប់ធ្វើនៅប្រទេសផ្សេងឡើយ។ លោកទម្លាយថា រុស្ស៊ីបានផ្ទេរលុយទៅឲ្យអង្គការដែលគាំទ្រខ្លួននៅម៉ាសេដ្វាន និងកំពុងធ្វើយុទ្ធនាការកកូរកកាយទ្រង់ទ្រាយធំផង។

នេះមិនមែនជាលើកទីមួយឡើយដែលរុស្ស៊ីទទួលរងការចោទថា លូកលាន់ការប្ដូរឈ្មោះប្រទេសនោះ។ កាលពីខែកក្កដា ក្រុងអាថែនបានបណ្ដេញមន្ត្រីការទូតរុស្ស៊ីពីរនាក់ និងហាមមន្ត្រីពីរនាក់ទៀតចូលទឹកដីខ្លួន ដោយចោទថា ព្យាយាមសូកប៉ាន់មន្ត្រីក្រិក និងជំរុញឲ្យមានការតវ៉ាប្រឆាំងកិច្ចព្រមព្រៀងរវាងម៉ាសេដ្វាន និងក្រិក។

តាមពិតទៅ ក្រុងស្កុបជេសម្លឹងឃើញការប្ដូរឈ្មោះនេះ ដើម្បីឈានទៅចូលរួមជាមួយសហភាពអឺរ៉ុប និងសម្ព័ន្ធយោធាណាតូ។ អង្គការតំបន់ទាំងពីរនេះក៏បាននិយាយរួចហើយដែរថា ម៉ាសេដ្វានអាចចាប់ផ្ដើមដំណើរការជាសមាជិកភាព ប្រសិនបើកិច្ចព្រមព្រៀងជាមួយក្រិកត្រូវបានអនុវត្ត។ បើម៉ាសេដ្វានក្លាយជាសមាជិកអឺរ៉ុប ឬណាតូមែននោះ រុស្ស៊ីនឹងបាត់បង់ឥទ្ធិពលខ្លួន ដែលនេះទំនងជាហេតុផលដែលមូស្គូអាចធ្វើសកម្មភាពដូចលោក ម៉ាធីសចោទមែន៕