ប្រធានាធិបតីអាមេរិក ដូណាល់ ត្រាំ បានសម្រេចដំឡើងពន្ធជំហានទីពីរដែលដាក់លើទំនិញរបស់ចិនមានទំហំប្រហែល ២០០ពាន់លានដុល្លារ ធ្វើឲ្យសង្គ្រាមពាណិជ្ជកម្មឆេះកាន់តែសន្ធោសន្ធៅឡើងទៀត។ មេដឹកនាំរូបនេះគំរាមទៀតថា បើចិនហ៊ានតបត ខ្លួននឹងដាក់ដំឡើងពន្ធជំហានទីបីទៀតភ្លាមៗដែរ។
ដូចការរំពឹងទុកមែនសង្គ្រាមពាណិជ្ជកម្មរវាងមហាអំណាចសេដ្ឋកិច្ចទីមួយ និងទីពីរឆាបឆេះកាន់តែខ្លាំងថែមទៀតនៅសប្តាហ៍នេះ ជាមួយនឹងការប្រកាសដំឡើងពន្ធលើទំនិញរបស់ចិនមានទំហំ ២០០ពាន់លានដុល្លារទៀត។
ពេលប្រកាសដំឡើងពន្ធនេះ ប្រធានាធិបតីអាមេរិក ដូណាល់ ត្រាំ បាន បញ្ជាក់ថា វិធានការដែលដាក់ចេញនេះជាជំហានទីពីរ ហើយវានឹងចូលជាធរមានចាប់ពីថ្ងៃ ២៤ ខែកញ្ញាឆ្នាំ ២០១៨ខាងមុខ។ លោកបន្ថែមថា វាចាប់ផ្តើមដោយការដំឡើងពន្ធ ១០ភាគរយរហូតដល់ដំណាច់ឆ្នាំ ២០១៨នេះ។ ចាប់ពីដើមឆ្នាំក្រោយ កម្រិតពន្ធដែលដាក់ចេញនោះនឹងឡើងដល់ ២៥ភាគរយ។
លោក ត្រាំ បានបញ្ជាក់ក្នុងសេចក្តីថ្លែងការណ៍របស់ខ្លួនដូច្នេះ៖« ខ្ញុំបានបញ្ជាឲ្យមន្ត្រីតំណាងផ្នែកពាណិជ្ជកម្មអាមេរិកចាប់ផ្តើមដំណើរការដំឡើងពន្ធលើទំនិញរបស់ចិនដែលមានទំហំ ២០០ពាន់លានដុល្លារត្រឹមកម្រិត ១០ភាគរយ។ ចាប់ពីថ្ងៃ ១ ខែមករាឆ្នាំ ២០១៩កម្រិតពន្ធទាំងនោះនឹងកើនឡើងដល់ ២៥ភាគរយ»។
លោក ត្រាំ ពន្យល់ថា អ្វីដែលលោកកំពុងធ្វើជាវិធានការទប់ទល់នឹងការប្រកួតប្រជែងមិនស្មោះត្រង់ និងបំពានប្រយោជន៍អាមេរិក។ ក្នុងនាមលោកជាប្រធានាធិបតី តួនាទីសំខាន់បំផុតរបស់លោកគឺ ការពារប្រយោជន៍របស់ប្រជាជន កសិករ កម្មករ អ្នកជំនួញ និងប្រទេសជាតិទាំងមូល។ ដូច្នេះហើយ វាគ្មានហេតុផលណាមួយដែលរដ្ឋបាលលោក ត្រាំ នៅស្ងៀមទុកឲ្យគេកេងប្រវ័ញ្ច ឬ បំពានលើប្រយោជន៍ដោយស្រួលៗឡើយ។
លោក ត្រាំ ក៏កត់សម្គាល់ផងដែរថា រដ្ឋាភិបាលចិនគ្មានឆន្ទៈក្នុងការប្តូរឥរិយាបថ និងការអនុវត្តកន្លងមកដែលមិនស្មោះត្រង់និងប៉ះពាល់ប្រយោជន៍អាមេរិកឡើយ។ ផ្ទុយទៅវិញ ចិនបែជាបន្តដាក់ចេញវិធានការដំឡើងពន្ធតបតនឹងអាមេរិកទៅវិញ ក្រោយលោក ប្រកាសដំឡើងពន្ធលើទំនិញចិនមានទំហំ ៥០ពាន់លានដុល្លារកាលពីខែមិថុនានោះ។
បន្ថែមពីប្រកាសដំឡើពន្ធជំហានទីពីរ ប្រធានាធិបតីអាមេរិកដែលតែងប្រកាស«តម្កល់ប្រយោជន៍អាមេរិកជាធំ» នោះបានគំរាមថា រដ្ឋបាលរបស់លោក ត្រៀមខ្លួនរួចជាស្រេចហើយដើម្បីចាត់វិធានការបន្ថែមទៀតដើម្បីប្រឆាំងចិន បើសិនជាចិនហ៊ានសងសឹកអាមេរិកដោយដំឡើងពន្ធលើទំនិញអាមេរិកវិញនោះ។
«ប្រសិនជាចិនហ៊ានចាត់វិធានការសងសឹកលើកសិករ និងឧស្សាហកម្មរបស់យើង យើងនឹងដាក់វិធានការជំហានទីបីភ្លាមៗតែម្តង ដោយចាប់ផ្តើមដំឡើងពន្ធថ្មីទៀតប្រឆាំងទំនិញចិនដែលមានទំហំ២៦៧ពាន់លានដុល្លារទៀត»។ លោក ត្រាំ បានប្រកាសដូច្នេះ។
ប្រធានាធិបតីអាមេរិកនៅតែបន្តដំឡើងពន្ធប្រឆាំងចិន ថ្វីបើបច្ចុប្បន្ននេះរដ្ឋមន្ត្រីសេដ្ឋកិច្ចអាមេរិកលោក Steven Mnuchin បន្តស្វះស្វែងរកឱកាសចរចាជាមួយសមភាគីចិនដើម្បីដោះស្រាយសង្គ្រាមពន្ធនេះដែរ ព្រោះវាកំពុងប៉ះពាល់ដល់ទីផ្សារហិរញ្ញវត្ថុសកលខ្លាំងដែរ។
តាមពិតទៅ សង្គ្រាមពាណិជ្ជកម្មរវាងមហាអំណាចសេដ្ឋកិច្ចធំទាំងពីរអាមេរិក និងចិនបន្តធ្វើឲ្យពិភពលោកភ័យបារម្ភ និងបង្កើតផលប៉ះពាល់ខ្លាំងដល់ក្រុមក្រុមហ៊ុននៃប្រទេសទាំងពីរ។ សមរភូមិនេះចាប់ផ្តើមដោយការដំឡើងពន្ធ ២៥ ភាគរយជំហានដំបូងរបស់អាមេរិកប្រឆាំងទំនិញចិនដែលមានទំហំ ៥០ ពាន់លានដុល្លារដែលទំនិញទាំងនោះមានយ៉ាងតិច ៨០០ មុខផ្សេងគ្នារួមបញ្ចូលទាំងគ្រឿងម៉ាស៊ីនឧស្សាហកម្ម, គ្រឿងបរិក្ខារសុខាភិបាល និងគ្រឿងបន្លាស់រថយន្តជាដើម។
សូមបញ្ជាក់ថា អាមេរិក និងចិនមានទំនាក់ទំនងពាណិជ្ជកម្មទ្រង់ទ្រាយធំរួមគ្នា។ យោងតាមរបាយការណ៍ការិយាល័យស្ថិតិអាមេរិក កាលពីឆ្នាំមុន អាមេរិកបាននាំចូលទំនិញដែលមានតម្លៃប្រហែល ៥០៥ពាន់លានដុល្លារអាមេរិកពីចិន ប៉ុន្តែទំហំនៃទំនិញនាំចូលនេះកើនឡើងរហូតដល់ ៩ ភាគរយក្នុងឆ្នាំ ២០១៨ គិតត្រឹមខែកក្កដានេះ៕