ជាតិ
ទំនប់បង្ហៀរ ១មករា ស្ទឹងជីនិត បានក្លាយជារមណីយដ្ឋានដ៏ទាក់ទាញ រូបភាពពីលើអាកាស នៃទំនប់បង្ហៀរ ១មករា ស្ទឹងជីនិត មានប្រវែង ៧៥០ម៉ែត្រ។ រូបភាព៖ ឈុត ឈាណា
× រមណីយដ្ឋាន ១មករា ស្ទឹងជីនិត ស្ថិតនៅក្នុងភូមិព្រៃស្រង៉ែ ឃុំបល្ល័ង្គ ស្រុកបារាយណ៍ ខេត្តកំពង់ធំ។ ភ្ញៀវទេសចរអាចធ្វើដំណើរទៅកាន់តំបន់រមណីយដ្ឋានទេសចរណ៍ធម្មជាតិនេះ ដោយធ្វើដំណើរពីភ្នំពេញតាមផ្លូវជាតិលេខ ៦ ដល់គល់ស្ពានកំពង់ថ្ម បត់ស្តាំ ប្រមាណជា ៤ គីឡូម៉ែត្រ។ បើគិតពីចម្ងាយផ្លូវពីភ្នំពេញទៅស្ទឹងជីនិត ប្រមាណ ១៣០ គីឡូម៉ែត្រ។ ទំនប់នេះគេកសាងឡើងក្នុងគោលបំណង ផ្តោតទៅលើប្រព័ន្ធស្រោចស្រពដំណាំកសិកម្មនៅក្នុងស្រុកសន្ទុក និងស្រុកបារាយណ៍ ខេត្តកំពង់ធំ ដោយមានទំនប់បង្ហៀរប្រវែង ៧៥០ ម៉ែត្រ។
ស្ទឹងជីនិត គឺជាដៃបឹងទន្លេសាបដ៏ធំ ដែលតភ្ជាប់ទៅទន្លេសាបនៅផ្នែកខាងក្រោម។ ខុសពីស្ទឹងនានា ទឹកស្ទឹងជីនិត បានហូរត្រឡប់ចូលទៅប្រព័ន្ធទន្លេសាបវិញ។ ស្ទឹងនេះ មានប្រវែងបណ្តោយប្រមាណ ២៦៤គីឡូម៉ែត្រ ទទឹងចាប់ពី ៦០ ទៅ ៩០ម៉ែត្រ។ ហូរចេញពីបឹងទន្លេសាប និងហូរត្រឡប់ចូលទៅក្នុងប្រព័ន្ធទន្លេសាបវិញ នាផ្នែកខាងក្រោម។
ក្នុងឆ្នាំ ១៩៧១ មានគម្រោងសាធារណៈពហុបំណងមួយ ដែលគិតដល់អត្ថប្រយោជន៍នៃប្រព័ន្ធធារាសាស្ដ្រ ការគ្រប់គ្រងទឹកជំនន់ ការនេសាទ និងការបង្កើតថាមពលវារីអគ្គិសនី ត្រូវបានគ្រោងទុក ដោយគ្របដណ្តប់លើផ្ទៃដីចំនួន ៤៨០០០ ហិកតា។ គម្រោងនេះ គ្របដណ្តប់ស្រុកសន្ទុក និងស្រុកបារាយណ៍ ក្នុងខេត្តកំពង់ធំ។
គម្រោងសាងសង់ទំនប់ ស្ទឹងជីនិត ត្រូវបានអនុវត្តជាបណ្តើរៗចាប់តាំងពីទស្សវត្យទី៧០ ដល់ ៨០ ដោយមានរចនាសម្ព័ន្ធបង្វែរសំខាន់ និងប្រឡាយមេ ត្រូវបានកសាងឡើង។ ប៉ុន្តែក្នុងរបបខ្មែរក្រហម កម្ពុជាប្រជាធិបតេយ្យ (ប៉ុល ពត) គម្រោងមួយ ដែលគេដាក់ឈ្មោះថា ទំនប់ ១មករា ស្ទឹងជីនិត ត្រូវបានអនុវត្តដោយប្រើកម្លាំងមនុស្សដោយបង្ខំ និងមានប្រជាជនជាច្រើន បានស្លាប់ដោយសារកសាងទំនប់នេះ។ ក្រោយមក សំណង់មួយចំនួនដែលត្រូវបានសាងសង់រួចហើយនោះ ក៏ត្រូវបានបំផ្លិចបំផ្លាញស្ទើរគ្មានសល់។
ក្នុងឆ្នាំ២០០៣ គម្រោងថ្មីមួយត្រូវបានបង្កើតឡើង ដែលអនុវត្តអស់រយៈពេល៦ឆ្នាំ ដើម្បីដាក់ឲ្យដំណើរការវិញ ដោយមានសមាសធាតុបច្ចេកទេស និងហិរញ្ញវត្ថុស្មើគ្នាចំនួន ២៣.៨ លានដុល្លារ ពីរដ្ឋាភិបាលកម្ពុជា និងធនាគារអភិវឌ្ឍន៍អាស៊ី (ADB) និងទីភ្នាក់ងារ Agence Française de Développement and the beneficiaries។
ក្រោយពីបានស្តារ និងដាក់ឲ្យដំណើរការឡើងវិញ ទំនប់១មករា ស្ទឹងជីនិត បានក្លាយទៅជារមណីយដ្ឋានដ៏ទាក់ទាញមួយ ប្រចាំឃុំបល្ល័ង្គ ស្រុកបារាយណ៍ ខេត្តកំពង់ធំ ដោយមានអ្នកទេសចរណ៍ចេញ-ចូលកម្សាន្តជាហូរហែ៕ © រក្សាសិទ្ធិដោយ thmeythmey.com