កូរ៉េខាងជើងប្រកាសបិទទីតាំងបាញ់មីស៊ីលមួយកន្លែង និងចង់បិទមជ្ឈមណ្ឌលនុយក្លេអ៊ែរមួយទៀត

អន្តរជាតិ

កូរ៉េខាងជើងប្រកាសបិទទីតាំងបាញ់មីស៊ីលមួយកន្លែង និងចង់បិទមជ្ឈមណ្ឌលនុយក្លេអ៊ែរមួយទៀត

19, Sep 2018 , 8:39 pm

រូបភាព

ប្រធានាធិបតីកូរ៉េខាងត្បូង មូន ចេអ៊ីន ចាប់ដៃមេដឹកនាំកូរ៉េខាងជើង គីម ជុងអ៊ុន ក្រោយសន្និសីទសារព័ត៌មានរួមគ្នា។ (រូបភាព Joint Press Corps)

ដោយ: តន ចាន់រិទ្ធារ៉ា

នៅក្រោយជំនួបមេដឹកនាំអន្តរកូរ៉េថ្ងៃទី១៩ ខែកញ្ញា កូរ៉េខាងជើងបានយល់ព្រមចាត់វិធានការបន្ថែមទៀតដើម្បីធ្វើឲ្យឧបទ្វីបគ្មានអាវុធនុយក្លេអ៊ែរ និងគ្មានការគំរាមដោយជម្លោះប្រដាប់អាវុធ។ ការប្រកាសរបស់កូរ៉េខាងជើង អាចសញ្ញាវិជ្ជមានដើម្បីចាប់ផ្ដើមការចរចាស្ដីពីការរំសាយនុយក្លេអ៊ែរជាមួយអាមេរិកឡើងវិញ។ យ៉ាងណាមិញ កូរ៉េខាងជើងក៏បានដាក់លក្ខខណ្ឌដែរ មុននឹងខ្លួនចាត់វិធានការថ្មីទៀត គឺការឆ្លើយតបរបស់អាមេរិកចំពោះអ្វីដែលខ្លួនបានធ្វើកន្លងមក។

ប្រធានាធិបតីកូរ៉េខាងត្បូង មូន ចេអ៊ីន និងមេដឹកនាំកូរ៉េខាងជើង គីម ជុងអ៊ុន នៅថ្ងៃទី១៩ ខែកញ្ញា បានចុះហត្ថលេខាលើកិច្ចព្រមព្រៀងមួយ នៅក្រោយជំនួបកំពូលនៅទីក្រុងព្យុងយ៉ាង។ ជំនួបចរចាលើកនេះ ទទួលបានផ្លែផ្កាគួរឲ្យកត់សម្គាល់ទាក់ទងការរំសាយនុយក្លេអ៊ែរនៅឧបទ្វីបកូរ៉េ ហើយជាលើកដំបូង មេដឹកនាំកូរ៉េទាំងពីរបានជជែកពីសកម្មភាពជាក់ស្ដែងដើម្បីឈានដល់ការលុបបំបាត់នុយក្លេអ៊ែរទៀតផង។

នាសន្និសីទសារព័ត៌មានបន្ទាប់ពីជំនួបទល់មុខជាមួយលោក គីម នៅផ្ទះសំណាក់រដ្ឋ Paekhwawon លោក មូន ប្រកាសថា កូរ៉េខាងជើងយល់ព្រមបិទទីតាំងបាញ់មីស៊ីល Dongchang-ri និងជើងទម្រសម្រាប់បាញ់មីស៊ីល ហើយកូរ៉េខាងជើងនឹងអញ្ជើញអ្នកជំនាញពីប្រទេសពាក់ព័ន្ធឲ្យធ្វើជាសាក្សីផង។ ការបិទទីតាំងនេះ ធ្វើឡើងបន្ទាប់ពីកូរ៉េខាងជើងបានកម្ទេចទីតាំងសាកល្បងនុយក្លេអ៊ែរដ៏ធំរបស់ខ្លួននៅ Punggye-ri រួចមក។

ក្រៅពីសុខចិត្តបិទកន្លែងបាញ់មីស៊ីលនេះ កូរ៉េខាងជើងក៏ចង់បន្តអនុវត្តជំហានផ្សេងដើម្បីសម្រេចឲ្យបានការរំសាយនុយក្លេអ៊ែរ ប៉ុន្តែអាមេរិកក៏ត្រូវឆ្លើយតបនឹងទង្វើរបស់ខ្លួនសិនដែរ។ ក្នុងកិច្ចព្រមព្រៀងដែលចុះហត្ថលេខាដោយលោក មូន និងលោក គីម ក្រុងព្យុងយ៉ាងអាចបិទទីតាំងនុយក្លេអ៊ែរ Yongbyon ជាអចិន្ត្រៃយ៍ បើក្រុងវ៉ាស៊ីនតោនចាត់វិធានការតបវិញក្រោមស្មារតីកិច្ចព្រមព្រៀងថ្ងៃទី១២ ខែមិថុនា នៅសិង្ហបុរី។

តាមពិតទៅ លក្ខខណ្ឌខាងលើរបស់កូរ៉េខាងជើង ជាមូលហេតុដែលនាំឲ្យការចរចារវាងអាមរិក និងកូរ៉េខាងជើងនាពេលកន្លងមកជាប់គាំង។ នេះក៏ព្រោះតែអាមេរិកចង់ឲ្យកូរ៉េខាងជើងធ្វើសកម្មភាពច្រើនជាងនេះទៀត មុននឹងខ្លួនអាចផ្ដល់រង្វាន់ឲ្យវិញតាមរយៈការព្យួរទណ្ឌកម្មសេដ្ឋកិច្ចក៏ច្រើនសន្ធឹកសន្ធាប់នោះ។ ប៉ុន្តែគេរំពឹងថា ការចរចានេះនឹងមានលទ្ធផលល្អច្រើន ព្រោះកូរ៉េខាងជើងសុខចិត្តបិទទីតាំងបាញ់មីស៊ីលមួយទៀតដោយគ្មានលក្ខខណ្ឌទៅហើយ។

ក្រៅពីសំណុំរឿងនុយក្លេអ៊ែរ មេដឹកនាំកូរ៉េទាំងពីរក៏បានជជែកពីបញ្ហាទំនាក់ទំនងអន្តរកូរ៉េផងដែរ។ អ្វីគួរឲ្យចាប់អារម្មណ៍នោះ លោក គីម ក៏បានយល់ទៅទស្សនកិច្ចនៅទីក្រុងសេអ៊ូលនៅពេលខ្លីខាងមុខដែរ។ បើកើតឡើងមែននោះ វានឹងក្លាយជាជំនួបទល់លើកទី៤ រវាងលោក មូន និងលោក គីម ហើយលោក គីម ក៏ក្លាយជាមេដឹកនាំកំពូលកូរ៉េខាងជើងដំបូងគេដែធ្វើដំណើរទៅកាន់រដ្ឋធានីកូរ៉េខាងត្បូង ខណៈកាលពីខែមេសា លោកបានជាន់ទឹកដីកូរ៉េខាងត្បូងម្ដងដែរនៅតំបន់គ្មានកងទ័ព។

អំឡុងពេលប្រកាសលទ្ធផលជំនួបពីរថ្ងៃ លោក គីម និយាយថា លោក និងលោក មូន បានឯកភាពគ្នាលុបបំបាត់អាវុធនុយក្លេអ៊ែរ និងការគំរាមកំហែងទាំងអស់ចេញពីឧបទ្វីបកូរ៉េ។ ប្រមុខដឹកនាំកូរ៉េខាងជើងរូបនេះចាត់ទុកកិច្ចព្រមព្រៀងនេះ ជាការបង្កើនទំនាក់ទំនងល្អប្រសើរថែមទៀតរវាងកូរ៉េទាំងពីរ និងការខិតជិតទៅរកសករាជនៃសន្តិភាព និងវិបុលភាពផងដែរ៕