នៅថ្ងៃទី ២០ កញ្ញា រដ្ឋបាលលោកត្រាំ បានដាក់ទណ្ឌកម្មលើយោធាចិន ដែលបានទិញយន្តហោះចម្បាំង និងប្រព័ន្ធការពារមីស៊ីលពីរុស្ស៊ី។ ចំណាត់ការចុងក្រោយរបស់សហរដ្ឋអាមេរិកនេះគឺធ្វើឡើង ស្របពេលដែលសង្គ្រាមពាណិជ្ជកម្មរវាងប្រទេសទាំងពីរ កាន់តែឡើងកម្ដៅខ្លាំងទៅៗ ជាក់ស្តែងគឺបន្ទាប់ពីមេដឹកនាំចិន ព្រមានវាយបកលើការដំឡើងពន្ធរបស់អាមេរិកលើទំនិញខ្លួន។
ក្រុងវ៉ាស៊ីនតោន បាននិយាយថា ទណ្ឌកម្មថ្មីដែលបង្កើតឡើងដោយក្រសូងការបរទេស ចូលរួមពិភាក្សាជាមួយក្រសួងរតនាគារអាមេរិក ត្រូវបានអនុវត្តលើនាយកដ្ឋានអភិវឌ្ឍសម្ភារៈ (EDD) របស់ចិន។ ស្ថាប័នដែលជាផ្នែកមួយនៃកងទ័ពរំដោះប្រជាជនចិននេះ ត្រូវបានបង្កើតឡើងក្នុងឆ្នាំ២០១៦ ដោយប្រធានាធិបតីចិន ស៊ី ជិនភីង។ អគ្គនាយកដ្ឋានយោធាចិននេះ មានទំនួលខុសត្រូវផ្គត់ផ្គង់សព្វាវុធ និងសម្ភារៈយោធាដល់កងទ័ពចិន។
យោងតាមរបាយការណ៍របស់សហរដ្ឋអាមេរិក ក្រុងប៉េកាំង កាលពីខែធ្នូ ឆ្នាំ២០១៧ ទទួលបានយន្តហោះចម្បាំង Su-35s ចំនួន១០គ្រឿង និងប្រព័ន្ធខែលការពារមីស៊ីល S-400 មួយចំនួនទៀតក្នុងឆ្នាំ២០១៨ ពីក្រុមហ៊ុននាំចេញអាវុធធំបំផុតរបស់រុស្ស៊ី Rosoboronexport។
ទណ្ឌកម្មប្រឆាំងនឹងអគ្គនាយកដ្ឋាននេះ គឺរួមមានដូចជា ហាមឃាត់មិនឲ្យបញ្ជាទិញអាវុធរបស់សហរដ្ឋអាមេរិក, មិនអនុញ្ញាតឲ្យមានការជួញដូររូបិយប័ណ្ណបរទេសក្នុងក្របខ័ណ្ឌអាមេរិក ឬបដិសេធរាល់ការជួញដូររូបិយវត្ថុក្នុងប្រព័ន្ធហិរញ្ញវត្ថុអាមេរិក។ លើសពីនេះ ក្រុងវ៉ាស៊ីនតោន ក៏មានសមត្ថកិច្ចរឹបអូសទ្រព្យសម្បត្តិនានារបស់ EDD ដែលមានក្នុងទឹកដីអាមេរិកផងដែរ។
ខណៈទណ្ឌកម្មត្រូវបានដាក់ប្រឆាំងនឹង EDD និងប្រធានស្ថាប័ននេះ គឺលោក Li Shangfu យោងតាមទីភ្នាក់ងារព័ត៌មាន AFP មន្ត្រីជាន់ខ្ពស់អាមេរិក បានពន្យល់ថា «គោលដៅធំបំផុតរបស់ទណ្ឌកម្មនេះ គឺផ្តោតទៅលើរុស្ស៊ី ហើយវាមិនត្រូវបានដាក់ចេញ ដើម្បីបំផ្លាញវិស័យការពាររបស់ប្រទេសណាមួយឡើយ»។
ជាមួយគ្នានេះ ក្រសួងការបរទេសអាមេរិក នៅថ្ងៃដដែលនេះ ក៏បានប្រកាសដាក់មន្ត្រីភ្នាក់ងារសម្ងាត់ និងយោធារុស្ស៊ី ចំនួន៣៣រូបក្នុងបញ្ជីខ្មៅរបស់ខ្លួន ដោយអនុលោមតាមច្បាប់ CAATSA ។ ច្បាប់ CAATSA ដែលត្រូវបានអនុម័តកាលពីឆ្នាំ២០១៧ ត្រូវបានប្រើប្រាស់ដើម្បីដាក់ទណ្ឌកម្មប្រឆាំងរុស្ស៊ី ដែលបានលេបត្របាក់តំបន់ក្រីមៀរ កាលពីឆ្នាំ២០១៤ និងលូកលាន់ការបោះឆ្នោតអាមេរិកក្នុងឆ្នាំ២០១៦។ តួយ៉ាងច្បាប់នេះ បានទប់ស្កាត់ការនាំចេញអាវុធរបស់រុស្ស៊ី ដែលគិតជាទឹកប្រាក់ប្រមាណរាប់ពាន់លានដុល្លារទៅហើយ។
ម្យ៉ាងវិញទៀត រដ្ឋបាលលោកត្រាំ សង្ឃឹមថា ទណ្ឌកម្មប្រឆាំងចិននេះ នឹងផ្ញើសារមួយទៅកាន់ម៉ូយអាវុធរបស់រុស្ស៊ីផ្សេងៗទៀត។ គេមើលឃើញថា ក្រុងវ៉ាស៊ីនតោន ព្រួយបារម្ភថា ឥណ្ឌា និងតូកគី ដែលជាសម្ព័ន្ធមិត្តរបស់ខ្លួន អាចសម្រេចចិត្តបញ្ជាទិញអាវុធពីរុស្ស៊ី ជាពិសេសនោះ គឺប្រព័ន្ធខែលមីស៊ីល S-400 ជាដើម។ ជាក់ស្តែងឥណ្ឌា និងតួកគី ធ្លាប់បានបញ្ជាក់ថា រដ្ឋាភិបាលរបស់ពួកគេមានបំណងបញ្ជាទិញប្រព័ន្ធខែលមីស៊ីល S-400 ពីរុស្ស៊ី ដែលអ្នកជំនាញជាច្រើនអះអាងថា ប្រព័ន្ធខែលមីស៊ីលនេះមានលទ្ធភាពបាញ់កម្ទេចយន្តហោះចម្បាំងគ្រប់ប្រភេទ តែលើកលែងយន្តហោះចម្បាំងអាមេរិកប៉ុណ្ណោះ។
បើពិតទៅ នេះជាលើកទីមួយហើយដែលក្រុងវ៉ាស៊ីនតោន បានដាក់ទណ្ឌកម្មលើប្រទេសទីបី ដោយអនុលោមតាមច្បាប់ CAATSA ដែលត្រូវបានអនុម័តដើម្បីប្រឆាំងរុស្ស៊ី។ ជុំវិញរឿងនេះ ក្រសួងការបរទេសអាមេរិក បានលើកឡើងថា៖ «យើងនឹងបន្តអនុវត្តច្បាប់ CAATSA ឲ្យបានខ្ជាប់ខ្ជួនបំផុត និងទទូចឲ្យប្រទេសទាំងអស់រឹតបន្តឹងទំនាក់ទំនងជាមួយរុស្ស៊ីក្នុងវិស័យការពារ ដែលជាប់ពាក់ព័ន្ធនឹងសកម្មភាពនានាដូចបានចែងក្នុងច្បាប់នេះ»។
គួរឲ្យកត់សម្គាល់ផងដែរថា ការប្រកាសឲ្យដាក់ទណ្ឌកម្មលើចិនគឺធ្វើឡើង ខណៈដែលជម្លោះពាណិជ្ជកម្មរវាងសហរដ្ឋអាមេរិក និងចិន កំពុងផ្ទុះឡើងយ៉ាងខ្លាំង។ ជាក់ស្តែងណាស់ ភាពតានតឹងចេះតែកើនឡើង ក្រោយលោកស៊ី ជិនពីង ចេញមុខព្រមានវាយបកសងសឹកលើការដំឡើងពន្ធរបស់អាមេរិកលើទំនិញចិន ដែលគិតជាទឹកប្រាក់ប្រមាណ២០០ពាន់លានដុល្លារ៕