ណាហ្គាវើល ក្លាយជាម្ចាស់ជើងឯកខេមបូឌានលីគជាលើកទី៣ ក្រោយរង់ចាំ៩ឆ្នាំ

កីឡាជាតិ

ជាតិ

ណាហ្គាវើល ក្លាយជាម្ចាស់ជើងឯកខេមបូឌានលីគជាលើកទី៣ ក្រោយរង់ចាំ៩ឆ្នាំ

23, Sep 2018 , 7:53 pm

រូបភាព

ដោយ: ថ្មីៗ

ជ័យជម្នះ ២-១ លើវិសាខា បន្ទាប់ លទ្ធផលស្មើ ២-២ រវាងបឹងកេត និងម្ចាស់ផ្ទះអង្គរថាយហ្គឺរ បាននាំឲ្យណាហ្គាវើល ក្លាយជាម្ចាស់ជើងឯកមិត្តហ្វូនខេមបូឌានលីគ ជាលើកទី៣ក្នុងប្រវត្តិសាស្ត្រខ្លួន បន្ទាប់ពីពួកគេរង់ចាំអស់រយៈពេល៩ឆ្នាំ។

ការទទួលបីពីន្ទុបន្ថែមពីវិសាខា នាជំនួបនៅល្ងាចថ្ងៃអាទិត្យ នៅកីឡដ្ឋានកងយោធពលខេមរភូមិន្ទ នាំឲ្យណាហ្គាវើល មានពិន្ទុសរុប៥៣ពិន្ទុ ខណៈបឹងកេត ដែលត្រូវបានម្ចាស់ផ្ទះអង្គរថាយហ្គឺរ តាមស្មើ ២-២ នោះ មាន៤៩ពិន្ទុ។ លទ្ធផលនេះ បង្ហាញថា ណាហ្គាវើល ក្លាយជាម្ចាស់ជើងឯកមិត្តហ្វូនខេមបូឌានលីគឆ្នាំ២០១៨ ដោយស្វ័យប្រវត្តិ នៅមុនជំនួបមួយប្រកួតទៀតដែលនៅសេសសល់។

ខណៈដែលបឹងកេត ខកខានឱកាសលើកពាន៣ឆ្នាំជាប់ៗគ្នា ណាហ្គាវើល ឈ្នះពានសារជាថ្មីឡើងវិញ បន្ទាប់ពីពួកគេធ្លាប់បានឈ្នះ កាលពីឆ្នាំ២០០៧ និងឆ្នាំ២០០៩ កន្លងមក។ ក្នុងការប្រមាញ់យកពានរយៈពេល៩ឆ្នាំ ណាហ្គាវើល បានបញ្ចប់ក្នុងចំណាត់ថ្នាក់លេខ២ដល់ទៅ៣លើកផងដែរ៕