ជាតិ
ពីនេះ ពីនោះ
២៥ខេត្ត/រាជធានី
កវីកំណាព្យវ័យក្មេង សំ នឿន ឆ្លងឆ្លើយកំណាព្យជាមួយ«សេ្តច»កំណាព្យ ជ័យ ចាប និងបណ្ឌិត ច័ន្ទ សំណព្វ
×![]()
ភ្នំពេញ៖ ក្រោយពេលដែលលោកសាស្ត្រាចារ្យអក្សសាស្ត្រខ្មែរ និងជាកវីកំណាព្យជើងចាស់ ជ័យ ចាប ជូនពរលោកបណ្ឌិតអក្សរសាស្ត្រខ្មែរ ច័ន្ទ សំណព្វ ជាកំណាព្យ ហើយលោក ច័ន្ទ សំណព្វ តបវិញភ្លាមៗជាកំណាព្យរួចមក, លោក សំ នឿន កវីកំណាព្យជំនាន់ថ្មី ឬកវីបន្តវេនផ្នែកកំណាព្យបានតាក់តែងកំណាព្យលើកសរសើរថ្វីដៃលោក ជ័យ ចាប (ចាប ពូកឈ្មោះនិពន្ធកំណាព្យ) និងលោក ច័ន្ទ សំណព្វ ជាមួយនឹងខ្លឹមសារស៊ីជម្រៅ។ ខាងក្រោមនេះ គឺជាកំណាព្យរបស់លោក សំ នឿន សូមអញ្ជើញអានដូចតទៅ៖
បទ ពាក្យ៧
-ណែងណងចងន័យលៃឡើងលង់ លង់នឹងទម្រង់កាព្យពរជ័យ
ថ្ងៃខួបបណ្ឌិតដ៏មានន័យ ស្តេចកាព្យវាងវៃវាសវាចា។
-ចាបពូកកវីថ្វីគំនិត អ្នកថែកាព្យពិតកេរខេមរា
ស្មេរស្ម័គ្រហៅស្មោះថាគ្រូតា ឃ្វាងខ្វះយ៉ាងណាលោកខន្តី។
-កាព្យចួនរណ្តំផ្សំផ្គូផ្គង គ្មានទាស់ទំនងទេកវី
បួនល្បះបើអានគិតថាខ្លី ន័យវិញគ្មានអ្វីវាស់វែងបាន។
-រីលោកបណ្ឌិតពិតប្រសប់ គ្រូច័ន្ទ សំណព្វ ច្បាស់មិនស្មាន
ផ្ទៀងផ្ទេរចំណេះតាមលម្អាន ត្រួសត្រាយត្រាប់ដានកេរកាព្យខ្មែរ។
-លោកចែកចំណេះមិនចេះណាយ សប្បាយនៅពេលសិស្សពូកែ
ជ័យ ចាប សំណព្វសមអ្នកថែ ថួនកំណាព្យខ្មែរស្មេរហ៊ានថា៕
ខាងក្រោមនេះ គឺជាការជូនពររបស់សេ្តចកំណាព្យ ចាប ពូក (ជ័យ ចាប) ជាកំណាព្យទៅកាន់លោក ច័ន្ទ សំណព្វ កាលពីថ្ងៃទី១៧ខែកញ្ញាឆ្នាំ២០១៨កន្លងមក។
+ថ្ងៃនេះ ពិសេសជាងធម្មតា
ថ្ងៃនេះ អស្ចារ្យជុំញាតិមិត្ត
ថ្ងៃនេះ កំណើតនៃជីវិត
ថ្ងៃនេះ កើតពិតនិត្យអ្នកម៉ែ ។
+ ជូនពរ សូមមានសុខសួស្ដី
ជូនពរ សិរី រយឆ្នាំខែ
ជូនពរ សុខភាពល្អហូរហែ
ជូនពរ ជួបតែស្នេហ៍ភក្ដី !!!
+ ខួបដ៏ បវរសែនសប្បាយ
ខួបដ៏ ក្អាកក្អាយក្អែសំដី
ខួបខាំ នំ Cake ខួបឆ្នាំថ្មី
ខួបឱ មេឃដីតាមថែថួន ។
+ សូម ពុទ្ធពរដ៏ប្រត្យក្ស
សូម ឈ្នះឧបស័គ្គទិសទាំងបួន
សូម មានយសស័ក្ដិជាក់មាំមួន
សូម ឲ្យហំហួនរហូតហោង !!!
(ចាបពូក)
មួយរំពេចក្រោយមក លោក បណ្ឌិតអក្សរសាស្ត្រខ្មែរ ច័ន្ទ សំណព្វ ក៏ថ្លែងអំណរគុណបែបកំណាព្យជូនទៅលោក ជ័យ ចាប វិញយ៉ាងដូច្នេះថា៖
អរគុណលោកគ្រូលោកកវី
ចំពោះពរជ័យដ៏បវរ
ឱនកាយទទួលដោយអំណរ
ដោយចិត្តស្មោះសចិត្តជ្រះថ្លា។
កំណាព្យចុងចួនផ្ទួនរណ្ដំ
ន័យធៀបន័យចំល្អអស្ចារ្យ
ពិតជាកវីជាគ្រូតា
ខ្ញុំសុំហៅថាស្ដេចកំណាព្យ។
បណ្ឌិតសភាចារ្យ ច័ន្ទ សំណព្វ
Tag:
កំណាទ្យ
ThmeyThmey25
© រក្សាសិទ្ធិដោយ thmeythmey.com
