ជាតិ
សេដ្ឋកិច្ច
«នាឡិ»ចង់បង្កើតនំខ្មែរឲ្យមានស្តង់ដារដូចនំបរទេស
× ភ្នំពេញ៖ នាឡិ គឺជាសិប្បកម្មផលិតនំខ្មែរគ្រប់ប្រភេទ ដែលទើបបង្កើតឡើងជាង១ឆ្នាំប៉ុណ្ណោះ។ លោក អ៊ិន ច័ន្ទធារ៉ា ម្ចាស់សិប្បកម្មនំខ្មែរ«នាឡិ» បានប្រាប់សារព័ត៌មានថ្មីៗថា លោកចង់ឲ្យនំខ្មែរមានស្តង់ដាររួមមួយ ដោយផ្តោតលើគុណភាព អនាម័យ ការវេចខ្ចប់ និងវត្ថុធាតុដើម ដូចនំបរទេសដែរ។ បំណងបង្កើតស្តង់ដាររួមនេះ ក៏ព្រោះតែលោក ច័ន្ទធារ៉ា ចង់រក្សាអត្តសញ្ញាណ និងបង្ហាញឧត្តមភាពនំខ្មែរ។
បច្ចុប្បន្ន «នាឡិ» បានជ្រើសររើសនំប្រពៃណីចំនួន១២មុខ ដើម្បីធ្វើជាមូលដ្ឋាននៃការបង្កើតស្តង់ដារនៃការផលិត ដែលរួមមាន នំអន្សម(ជ្រូក,ចេក,ខ្នុរ),នំគម,នំបត់,នំស្លឹកស្រស់,ត្រៀបបាយ នំកន្សែងស្រស់ និងចាហួយដូងជាដើម។ លោក អ៊ិន ច័ន្ទធារ៉ា បញ្ជាក់ដូច្នេះ៖«ការអភិវឌ្ឍនំខ្មែរឲ្យក្លាយជាស្តង់ដារថ្មីនេះ គឺឈរលើមូលដ្ឋានំប្រពៃណីដោយសំដៅដល់ការយកនំខ្មែរ មកកែច្នៃ ដើម្បីឈានដល់ការអភិវឌ្ឍមួយកម្រិតទៀតក្នុងវិស័យនំខ្មែរ»។
នំប្រពៃណីមួយចំនួនដែលនាឡិ បានយកមកកែច្នៃមាន នំអន្សមជ្រូក-ចេក នំគម នំបត់ជាដើម ដោយច្នៃចេញជារូបមន្តនំថ្មី សម្រាប់អ្នកមានជំងឺទឹកនោមផ្អែមក៏អាចពិសាបាន ដោយមានការវេចខ្ជប់ និងរក្សាអនាម័យ គុណភាពត្រឹមត្រូវ។
បើតាមលោក អ៊ិន ច័ន្ទធារ៉ា «នាឡិ» ក៏នឹងចងក្រងរូបមន្តធ្វើនំខ្មែរគ្រប់ប្រភេទ ទុកជាឯកសារសម្រាប់ប្រជាជនខ្មែរផងដែរ ដើម្បីជាការរួមចំណែកក្នុងការអភិរក្សនំខ្មែរ សម្រាប់កូនខ្មែរជំនាន់ក្រោយ។ លោក អ៊ិន ច័ន្ទធារ៉ា អះអាងថា៖«នាឡិធ្វើបែបនេះ គឺក្នុងបំណងតែមួយគត់ គឺចង់ឲ្យប្រជាជនខ្មែរទាំងអស់ ងាកមកចាប់អារម្មណ៍ និងប្រើប្រាស់អ្វីដែលជារបស់ខ្លួនឡើងវិញ។ ជាពិសេស គឺចៀសវាងឲ្យខាងតែបានការចម្លង ឬកែច្នៃពីរបស់គេធ្វើរបស់ខ្លួន ដែលធ្វើឲ្យបាត់អត្តសញ្ញាណពិតប្រាកដរបស់ខែ្មរ»។
បច្ចុប្បន្នសិប្បកម្មផលិតនំខ្មែរ«នាឡិ»មានអាយុជាង១ឆ្នាំ ដោយបានចងក្រងប្រភេទនំបែបប្រពៃណីខ្មែរ និងនំកែច្នៃជាច្រើនជិត៦០ប្រភេទ និងមានដៃគូចែកចាយលក់បន្ត ក្នុងរាជធានីភ្នំពេញ ៤២កន្លែង។ លោក អ៊ិន ចន្ទធារ៉ា មានក្តីរំភើបយ៉ាងខ្លាំង ដែលសិប្បកម្មផលិតនំខ្មែររបស់លោក អាចបញ្ច្រៀតខ្លួនទៅក្នុងទីផ្សារបានយ៉ាងរហ័យបែបនេះ៕
Tag:
នាឡិ
នំខ្មែរ
អ៊ិន ច័ន្ទធារ៉ា
© រក្សាសិទ្ធិដោយ thmeythmey.com