កីឡាជាតិ
ជាតិ
ក្រុមសូហ្វតិន្នីសកម្ពុជា ត្រៀមខ្លួនចេញទៅការពារជើងឯក SEA Soft Tennis នៅម៉ានីល
×![]()
សហព័ន្ធកីឡាសូហ្វតិន្នីសកម្ពុជា នឹងបញ្ជូនអត្តពលិកទៅចូលរួមប្រកួតក្នុងព្រឹត្តិការណ៍ SEA Soft Tennis 2018 នៅទីក្រុងម៉ានីលប្រទេសហ្វីលីពីន នាដើមខែតុលាខាងមុខនេះ។ កម្ពុជា ទោះបីមិនរំពឹង១០០ភាគរយ តែប្តេជ្ញាប្រឹងប្រែងឲ្យអស់ពីសមត្ថភាពក្នុងការការពារតំណែងជើងឯក ទោះបីឆ្នាំនេះមានវត្តមានជើងខ្លាំងទាំងពីរនៅអាស៊ីអាគ្នេយ៍ក៏ដោយ។
វត្តមានជើងខ្លាំងទាំងពីរប្រចាំតំបន់អាស៊ីអាគ្នេយ៍ ថៃ និងឥណ្ឌូណេស៊ី បានក្លាយជាក្តីបារម្ភសម្រាប់កម្ពុជា ក្នុងការការពារតំណែងជើងឯកក្នុងព្រឹត្តិការណ៍ប្រកួតកីឡាសូហ្វតិន្នីសជ្រើសរើសជើងឯកកម្រិតអាស៊ាន SEA Soft Tennis 2018 នៅទីក្រុងម៉ានីលប្រទេសហ្វីលីពីន ចន្លោះពីថ្ងៃទី៥-៧ ខែតុលា ឆ្នាំ២០១៨។
«នៅតំបន់អាស៊ីអាគ្នេយ៍ជើងខ្លាំងមាន៤ក្រុម ឥណ្ឌូណេស៊ី ថៃ ហ្វីលីពីន និងកម្ពុជា។ ឆ្នាំ២០១៧ យើងបានយកឈ្នះម្ចាស់ផ្ទះហ្វីលីពីនយ៉ាងប្រផិតប្រផើយនៅវគ្គផ្តាច់ព្រ័ត្រ។ យើងមិនប្រាកដថា អាចការពារតំណែងជើងឯកបានឬយ៉ាងណានោះទេ ព្រោះក្រុមខ្លាំងពីរចូលរួមដែរនៅឆ្នាំនេះ។ ឆ្នាំមុនយើងបាំងហ្វីលីពីន តែលើកនេះយើងត្រូវតតាំងជាមួយថៃ និងឥណ្ឌូណេស៊ី»។ នេះជាកង្វល់របស់លោក ជា ប៊ុនហេង អនុប្រធានទី១សហព័ន្ធកីឡាសូហ្វតិន្នីសកម្ពុជា។
លោកបន្ថែមថា៖«ថ្វីដ្បិតឆ្នាំនេះយើងត្រូវប្រជែងជាមួយថៃ និងឥណ្ឌូណេស៊ីក៏ដោយ តែយើងប្តេជ្ញាតតាំងការពារតំណែងជើងឯកមេដាយមាសក្រុមបុរស។ ប៉ុន្តែលទ្ធផលយ៉ាងណា យើងមិនហ៊ានសន្យាទុកមុននោះទេ គ្រាន់តែជឿជាក់ នឹងទទួលបានមេដាយណាមួយក្នុងចំណោមមេដាយទាំងបី»។
កម្ពុជាធ្លាប់ចូលរួមព្រឹត្តិការណ៍នេះពីរលើករួចមកហើយ នៅឆ្នាំ២០១៧ពេលហ្វីលីពីនធ្វើជាម្ចាស់ផ្ទះ កម្ពុជាឈ្នះមេដាយមាសលើវិញ្ញាសាវាយជាក្រុមបុរស ក្រោយយកឈ្នះម្ចាស់ផ្ទះហ្វីលីនយ៉ាងប្រផិតប្រផើយនៅវគ្គផ្តាច់ព្រ័ត្រ។ ប៉ុន្តែលើកនោះ គ្មានវត្តមានថៃ និងឥណ្ឌូណេស៊ីនោះទេ។ ឆ្នាំ២០១៦ នៅម៉ាឡេស៊ី កម្ពុជាទទួលបានមេដាយប្រាក់លើវិញ្ញាសាវាយជាក្រុមនារី។
ក្រៅពីព្រឹត្តិការណ៍នេះ អត្តពលិកសូហ្វតិន្នីសកម្ពុជាត្រៀមចូលរួមក្នុងព្រឹត្តិការណ៍ធំៗចំនួនពីរផ្សេងទៀតនៅឆ្នាំនេះ គឺព្រឹត្តិការណ៍ Korean Cup និងជើងឯកយុវជនពិភពលោកនៅប្រទេសកូរ៉េ។ នៅចុងខែតុលា ខាងមុខ កម្ពុជានឹងបញ្ជូនអត្តពលិកអាយុក្រោម១៨ឆ្នាំចំនួន៥នាក់ ទៅហ្វឹកហាត់នៅប្រទេសកូរ៉េ ហើយពួកគេនៅបន្តរហូតដល់ព្រឹត្តិការណ៍ Korean Cup តែម្តង៕
Tag:
សូហ្វតិន្នីស
ជា ប៊ុនហេង
SEA Soft Tennis Championship
© រក្សាសិទ្ធិដោយ thmeythmey.com
