បន្ទប់មេធាវី នឹងត្រូវសាងសង់នៅគ្រប់ពន្ធនាគារ ដើម្បីស្រួលជួបកូនក្តី

ជាតិ

បន្ទប់មេធាវី នឹងត្រូវសាងសង់នៅគ្រប់ពន្ធនាគារ ដើម្បីស្រួលជួបកូនក្តី

27, Sep 2018 , 7:59 am

រូបភាព

លោកស្រីមេធាវី លឹម ច័ន្ទលីដា ប្រធានគណកម្មការសាងសង់នៃគណៈមេធាវីកម្ពុជា

ដោយ: សារព័ត៌មានថ្មីៗ

គណៈមេធាវីកម្ពុជា កំពុងសាងសង់បន្ទប់មេធាវី នៅតាមពន្ធនាគារ ក្នុងរាជធានី-ខេត្តទាំង២៥។ នេះបើតាមលោកស្រីមេធាវី លឹម ច័ន្ទលីដា ប្រធានគណ:កម្មការសាងសង់នៃគណៈមេធាវីកម្ពុជា។

លោកស្រី លឹម ច័ន្ទលីដា បានប្រាប់សារព័ត៌មានថ្មីៗតាមទូរសព្ទថា ការសាងសង់បន្ទប់មេធាវីនៅតាមពន្ធនាគារ គឺជាគំនិតផ្តួចផ្តើមរបស់លោក សួន វិសាល ប្រធានគណៈមេធាវីកម្ពុជា។ លោកស្រី បញ្ជាក់បែបនេះថា៖«ការសាងសង់បន្ទប់នេះ គឺដើម្បីរក្សាសេចក្តីថ្លៃថ្នូររបស់មេធាវី និងរក្សាការសម្ងាត់ក្នុងការជួបគ្នារវាងមេធាវី និងកូនក្តី»។

លោកស្រី បន្តថា កន្លងមក មេធាវី តែងជួបការលំបាក ពេលចុះទៅជួបកូនក្តីក្នុងពន្ធនាគារ ព្រោះមិនមានបន្ទប់ត្រឹមត្រូវ។ លោកស្រី លើកឡើងថា៖«បច្ចុប្បន្ន តាមពន្ធនាគារ ក៏មានបន្ទប់និងកន្លែងសម្រាប់មេធាវីនិងកូនក្តីដែរ តែវា មិនពេញលក្ខណ។ បន្ទប់ក្នុងពន្ធនាគារខ្លះ ច្រហទ្វារ ដែលមិនអាចរក្សាការសម្ងាត់រវាងមេធាវីនិងកូនក្តី។ ពន្ធនាគារខ្លះទៀត មិនមានបន្ទប់តែម្តង ហើយពេលមេធាវីចុះទៅ គឺជួបកូនក្តីនៅក្រោមដើមឈើក៏មាន ដែលមើលទៅមិនសមរម្យសម្រាប់មេធាវី»។

លោកស្រី លឹម ច័ន្ទលីដា អះអាងថា មកដល់ពេលនេះ បន្ទប់មេធាវីនៅតាមពន្ធនាគារមួយចំនួន ដូចជានៅខេត្តតាកែវ និងខេត្តកំពត ត្រូវបានសាងសង់រួចរាល់ និងអាចប្រើប្រាស់បានហើយ ហើយតាមបណ្តាខេត្តផ្សេងៗទៀត ដូចជា ស្វាយរៀង ព្រៃវែង បាត់ដំបង និងព្រះសីហនុ ជាដើម កំពុងចាប់ផ្តើមសាងសង់។ លោកស្រី សង្កត់ធ្ងន់បែបនេះថា៖«មិនយូរជាងកន្លះឆ្នាំទៀតទេ យើង នឹងសាងសង់ឲ្យរួចរាល់ទាំង២៥រាជធានី-ខេត្ត»។

ការសាងសង់បន្ទប់មេធាវីនៅតាមពន្ធនាគារទូទាំងប្រទេស ត្រូវចំណាយថវិកាប្រមាណជា១៤ម៉ឺនដុល្លារ។ នេះជាការអះអាងរបស់លោកស្រី លឹម ច័ន្ទលីដា ដដែល ដោយលោកស្រី បន្ថែមចុងក្រោយថា សម្តេចនាយករដ្ឋមន្ត្រី ហ៊ុន សែន បានផ្តល់ថវិកា៧ម៉ឺនដុល្លារ ហើយ៧ម៉ឺនដុល្លារទៀត បានមកពីការរួមចំណែករបស់មេធាវី៕