ជាតិ
សម្ដេច ហ៊ុន សែន៖ អ្នកដែលមិនចូលចិត្តខ្ញុំ សូមចែកឲ្យដាច់រវាងមុខមាត់ និងប្រយោជន៍ជាតិ!
× ភ្នំពេញ៖ ស្របពេលកំពុងធ្វើដំណើរទៅកាន់សហរដ្ឋអាមេរិក ដើម្បីចូលរួមកិច្ចប្រជុំលើកទី៧៣ នៃមហាសន្និបាតអង្គការសហប្រជាជាតិនោះ សម្ដេច ហ៊ុន សែន នៅតែរំឭកពីការខិតខំប្រឹងប្រែងរបស់ខ្លួន ក្នុងការការពារប្រទេសជាតិឲ្យរួចផុតពីភ្លើងសង្គ្រាម។
បទចម្រៀង «លាទៅបម្រើជាតិ» ដែលរៀបរាប់ពីទឹកចិត្តកងទ័ព លះបង់ជីវិតដើម្បីការពារជាតិនេះ គឺជារឿងរ៉ាវដែលសម្ដេច ហ៊ុន សែន ធ្លាប់បានជួបប្រទះ ក្នុងសម័យសង្គ្រាម។ ប្រៀបធៀបបែបនេះហើយ ប្រមុខរដ្ឋាភិបាល ក៏បានសរសេរលើហ្វេសប៊ុក ក្នុងដំណើរទៅចូលរួមកិច្ចប្រជុំមហាសន្និបាតអង្គការសហប្រជាជាតិដូច្នេះថា៖« ថ្ងៃនេះខ្ញុំសូមលាទៅបម្រើជាតិជាថ្មីម្តងទៀតដោយប្រើនយោបាយការទូតនៅលើឆាកអន្តរជាតិ។ កម្ពុជា មិនអាចឱ្យគេបង្ខូចជាន់ឈ្លីទោះបីក្នុងរូបភាពណាមួយក៏ដោយ ។ ខ្ញុំចេញទៅលើកនេះក៍នឹងចូលរួមផងដែរនូវការងារជាកិច្ចការតំបន់ និងអន្តរជាតិដែលកំពុងវិវត្តន៍យ៉ាងតានតឹង និងស្មុគស្មាញ»។
ក្រៅពីចូលរួមក្នុងមហាសន្និបាតអង្គការសហប្រជាជាតិនេះ សម្តេចនាយករដ្ឋមន្ត្រីកម្ពុជា នឹងជួបពិភាក្សាទ្វេភាគីដាច់ដោយឡែកពីគ្នាជាមួយ លោក អង់តូនីញ៉ូ ហ្គូតេរ៉េស (António Guterres) អគ្គលេខាធិការអង្គការសហប្រជាជាតិ, លោក បូយកូ បូរីស្សូវ (Boyko Borissov) នាយករដ្ឋមន្ត្រីប៊ុលហ្គារី, លោក ខាដហ្កា ប្រ៉ាសាទ ស្សាម៉ា អូលី (Khadga Prasad Sharma Oli) នាយករដ្ឋមន្ត្រីនេប៉ាល់ និងជួបពិភាក្សាមិត្តភាពជាមួយប្រមុខរដ្ឋ និងរដ្ឋាភិបាលនៃប្រទេសមួយចំនួនទៀត ។
ជាមួយគ្នានេះ សម្តេច ហ៊ុន សែន ក៏នឹងជួបជាមួយសហគមន៍ខ្មែរដែលរស់នៅសហរដ្ឋអាមេរិក និងកាណាដាផងដែរ។ សម្ដេច នឹងរៀបរាប់ពីសភាពការណ៍ទូទៅ និងការអភិវឌ្ឍន៍នៅកម្ពុជា ដល់អ្នកគាំទ្រពលរដ្ឋខ្មែរទាំងនោះ។ និយាយត្រង់ចំណុចនេះ លោកនាយករដ្ឋមន្ត្រី ហ៊ុន សែន ក៏បានដឹងថា មានពលរដ្ឋមួយចំនួននៅក្រៅប្រទេសនោះ មិនពេញចិត្តនឹងការដឹកនាំរបស់រដ្ឋាភិបាល ហើយក៏ត្រៀមខ្លួនស្រែកតវ៉ា ប្រឆាំងនឹងវត្តមានសម្ដេច នៅលើទឹកដីអាមេរិកទៀតផង។
ដ្បិតមិនអាចហាមឃាត់ពលរដ្ឋទាំងនោះ តវ៉ាប្រឆាំងវត្តមានខ្លួនក្តី ប៉ុន្តែសម្ដេច ហ៊ុន សែន ក៏ចង់ឲ្យពួកគេពិចារណាឲ្យបានច្បាស់ពីផលប្រយោជន៍ប្រទេសជាតិ។ ប្រមុខរដ្ឋាភិបាល បាននិយាយដូច្នេះថា ៖«ចំពោះជនរួមជាតិនៅក្រៅប្រទេសដែលមិនចូលចិត្តខ្ញុំ ក៏សូមចែកឱ្យដាច់នូវអ្វីជាផលប្រយោជន៍មុខមាត់ ហ៊ុន សែន ពីអ្វីជាមុខមាត់ និងផលប្រយោជន៍ជាតិខ្មែរទាំងមូល ដោយសម្បជញ្ញៈ វិចារណញាណ និងមនសិការផ្ទាល់រៀងៗខ្លួនទៅចុះ»។
សម្តេច ហ៊ុន សែន នឹងទៅចូលរួមកិច្ចប្រជុំទូទៅលើកទី៧៣ នៃមហាសន្និបាតអង្គការសហប្រជាជាតិ នៅទីក្រុងញូវយ៉ក សហរដ្ឋអាមេរិក រយៈពេល៤ថ្ងៃ ចាប់ពីថ្ងៃទី២៧ ដល់៣០ ខែកញ្ញា ។ កម្ពុជា គឺជាអនុប្រធាននៃកិច្ចប្រជុំនេះ និងកិច្ចប្រជុំពាក់ព័ន្ធផ្សេងទៀត។ សម្តេចនាយករដ្ឋមន្ត្រី នឹងធ្វើសេចក្តីថ្លែងការណ៍មួយផ្តោតលើការវិវត្តនាពេលថ្មីៗ និងសមិទ្ធិផលសំខាន់ៗ ដែលរាជរដ្ឋាភិបាលសម្រេចបាន និងបញ្ហាតំបន់ និងអន្តរជាតិដែលជាការព្រួយបារម្ភរួម។
មហាសន្និបាតរបស់អង្គការសហប្រជាជាតិលើកនេះ នឹងប្រព្រឹត្តទៅក្រោមមូលបទ «ធ្វើឲ្យអង្គការសហប្រជាជាតិមានសារសំខាន់ពាក់ព័ន្ធជាមួយប្រជាជនទាំងអស់ (ភាពជាអ្នកដឹកនាំសកល និងការទទួលខុសត្រូវរួម សម្រាប់សង្គមប្រកបដោយសន្តិភាព សមធម៌ និងនិរន្តរភាព)»៕
© រក្សាសិទ្ធិដោយ thmeythmey.com