ជាតិ
សង្គមជាតិ
អ្នកនាំពាក្យ៖បេក្ខជនប្រឡងច្រើន ទើបធ្វើឲ្យក្រុមការងារបង្កើតកំហុសលើវិញ្ញាបនបត្រ ប៉ុន្តែក្រសួងដោះស្រាយហើយ
× ភ្នំពេញ៖ ជាថ្មីម្ដងទៀត បញ្ហាវិញ្ញាបនបត្របណ្ដោះអាសន្ន របស់បេក្ខជនប្រឡងសញ្ញាបត្រមធ្យមសិក្សាទុតិយសភូមិ (បាក់ឌុប) ឆ្នាំ២០១៨នេះ នៅបង្កការឈឺក្បាលដល់ក្រសួងអប់រំ យុវជន និងកីឡា។ បញ្ហាចោទនោះ គឺត្រង់ថា វិញ្ញាបនបត្របណ្តោះអាសន្នរបស់បេក្ខជនមួយចំនួន មានអ្នកខ្លះខុសឈ្មោះ និងថ្ងៃខែឆ្នាំកំណើតជាដើម។ ក្រសួងអប់រំ បានដោះស្រាយបញ្ហានេះ ជូនបេក្ខជនប្រឡង។
ពិតជាមានករណីខុសឈ្មោះ ,ភេទ, អាយុ, ថ្ងៃខែឆ្នាំកំណើត និងខុសរូបថតបេក្ខជនប្រឡងបាក់ឌុបមែន។ បញ្ហាទាំងនេះ កើតចេញពីបច្ចេកទេសរបស់ក្រុមការងារក្រសួង។ នេះជាការបញ្ជាក់របស់លោក ឌី ខាំបូលី អ្នកនាំពាក្យក្រសួងអប់រំ ដែលបានបន្ថែមថា ក្រសួងអប់រំ បានដោះស្រាយចំពោះបញ្ហាប្រក្រតីលើវិញ្ញាបនបត្របណ្តោះអាសន្នមធ្យមសិក្សាទុតិយភូមិ ជូនបេក្ខជនរួចរាល់ហើយ។
ថ្លែងប្រាប់សារព័ត៌មានថ្មីៗ អ្នកនាំពាក្យរូបនេះ បញ្ជាក់ថា៖ «បញ្ហាដែលបានកើតឡើងនេះ ដោយសារតែមានចំនួនបេក្ខជនប្រឡងច្រើន ទើបធ្វើឲ្យក្រុមការងារយើង បង្កើតកំហុសយ៉ាងដូច្នេះ»។
បើតាមលោក ឌី ខាំបូលី ក្រសួងអប់រំ នឹងត្រួតពិនិត្យ និងដោះស្រាយឲ្យទាន់ពេលវេលា ប្រសិនបើមានករណីផ្សេងទៀតកើតឡើង។
សូមបញ្ជាក់ថា បេក្ខជនដែលបានប្រលងជាប់បាក់ឌុបទូទាំងប្រទេសសម្រាប់ឆ្នាំ២០១៨នេះ មានចំនួន ៧៦,០៣៤នាក់ ដែលនិទ្ទេសA មាន៤០៨នាក់,និទ្ទេសB មាន២,២២២នាក់,និទ្ទេសC មាន៦,០៤១នាក់,និទ្ទេសD មាន១៥,១៨០នាក់ និងនិទ្ទេស E មាន៥២,១៨៣នាក់។ បេក្ខជនដែលទើបតែប្រឡងជាប់បាក់ឌុប អាចដកវិញ្ញាបនបត្របណ្តោះអាសន្ន។ នេះបើតាមសេចក្តីប្រកាសរបស់ក្រសួងអប់រំ យុវជន និងកីឡា កាលពីថ្ងៃទី២៤ ខែកញ្ញា ៕
© រក្សាសិទ្ធិដោយ thmeythmey.com