ចិន ផ្ដល់ជំនួយ២,៥លានដុល្លារ សម្រាប់ការធ្វើជំរឿននៅកម្ពុជា នៅឆ្នាំ២០១៩

ជាតិ

សង្គមជាតិ

ចិន ផ្ដល់ជំនួយ២,៥លានដុល្លារ សម្រាប់ការធ្វើជំរឿននៅកម្ពុជា នៅឆ្នាំ២០១៩

29, Sep 2018 , 9:53 am

រូបភាព

ដោយ: ថ្មីៗ

ភ្នំពេញ៖ ចិន ផ្ដល់ជំនួយដល់កម្ពុជា ជាង២លានដុល្លារអាមេរិក សម្រាប់ការធ្វើជំរឿន នៅឆ្នាំ២០១៩ខាងមុខ។ ជំនួយទាំងនេះ ត្រូវបានផ្ដល់ដោយតំណាងឯកអគ្គរដ្ឋទូតចិនប្រចាំនៅកម្ពុជា លោក លី អាន មកលោក ឆាយ ថន រដ្ឋមន្ត្រីក្រសួងផែនការ។

ជំនួយភាគីចិន ដែលផ្ដល់មកកម្ពុជា មានជាសម្ភារមួយចំនួន រួមមាន៖ រថយន្ត៥២គ្រឿង ម៉ូតូ ៣០០គ្រឿង កុំព្យូទ័រលើតុ៤៥០គ្រឿង កុំព្យូទ័រយួរដៃ៥០គ្រឿង ម៉ាស៊ីនបោះពុម្ពឯកសារ៣០គ្រឿង ម៉ាស៊ីនបញ្ចាំងSlide៣០គ្រឿង ម៉ាស៊ីនថតចម្លង១០គ្រឿង Tablet ២០០គ្រឿង និងម៉ាស៊ីន Server។ ជំនួយនេះ គិតជាទឹកប្រាក់មានទំហំ២,៥លានដុល្លារអាមេរិក។

តំណាងឯកអគ្គរដ្ឋទូតចិនប្រចាំនៅកម្ពុជា លោក លី អាន បាននិយាយថា ការផ្ដល់ជំនួយនេះ គឺក្នុងគោលបំណងរួមចំណែក ជួយដល់ការធ្វើជំរឿននៅកម្ពុជា ឲ្យទទួលបានភាពល្អប្រសើរ។

លោក ឆាយ ថន រដ្ឋមន្ត្រីក្រសួងផែនការ និងជាអនុប្រធានគណៈកម្មាធិការជាតិជំរឿនទូទៅ ប្រជាជនកម្ពុជា នៅឆ្នាំ២០១៩ បាននិយាយថា ទិន្នន័យស្ថិតិដែលប្រមូលបានតាមរយៈការធ្វើជំរឿន អង្កេត និងពីប្រភពរដ្ឋបាលផ្សេងៗ គឺជាមូលដ្ឋានទិន្នន័យយ៉ាងសំខាន់សម្រាប់ការអភិវឌ្ឍ និងត្រួតពិនិត្យ វាយតម្លៃផែនការយុទ្ធសាស្ត្រអភិវឌ្ឍន៍។ ជាពិសេសវាយតម្លៃការសម្រេចបាន រាល់ការអនុវត្តយុទ្ធសាស្ត្រកាត់បន្ថយភាពក្រីក្រ និងគោលដៅអភិវឌ្ឍន៍ប្រកបដោយចីរភាព។ លោក ឆាយ ថន បានបន្ថែមថា ទិន្នន័យដែល ទទួលបានមកការជំរឿននេះ ក៏ជាប្រយោជន៍ដល់អ្នកសិក្សាស្រាវជ្រាវជាតិ និងអន្តរជាតិ ។ ជាពិសេសសម្រាប់លេខាធិការដ្ឋានអាស៊ាន ក្នុងការតាមដានត្រួតពិនិត្យការអភិវឌ្ឍគ្រប់វិស័យរបស់បណ្តាប្រទេសសហគមន៍អាស៊ាន។

បន្ថែមពីនេះលោក សន ស៊ីថន រដ្ឋលេខាធិការក្រសួងផែនការ បានបញ្ជាក់ថា កិច្ចការជំរឿនទូទៅសម្រាប់ឆ្នាំ២០១៩ខាងមុខនេះ គឺមានលក្ខណទំនើបជាងការធ្វើជំរឿនកន្លងទៅ ដោយក្រុមការងារនឹងដាក់ប្រព័ន្ធសម្រាប់វាយតម្លៃភាពសុក្រឹត្យរបស់ជំរឿន ដោយប្រើប្រាស់ Tablet PDA និងបច្ចេកទេស NBS ៕