អន្តរជាតិ
នយោបាយអន្តរជាតិ
នាយករដ្ឋមន្ត្រីជប៉ុន ប្តេជ្ញាលើកកម្ពស់ពាណិជ្ជកម្មសេរីដើម្បីជួយដល់ប្រទេសមានធនធានធម្មជាតិតិចតួច
× ប្រមុខរដ្ឋាភិបាលជប៉ុនលោកស៊ីនហ្សូ អាបេ បានប្តេជ្ញានៅចំពោះមុខមេដឹកពិភពលោកក្នុងការលើកកម្ពស់និងការពារគោលនយោបាយពាណិជ្ជកម្មសេរី ខណៈដែលពិភពលោក កំពុងតែជួបរឿងចម្រូងចម្រាស់នៃការវិលត្រលប់ទៅរកការអនុវត្តគោលនយោបាយពាណិជ្ជកម្មចង្អៀតចង្អល់ ឬពាណិជ្ជកម្មគាំពារនិយម។ លោក អាបេ ជឿថា មានតែពាណិជ្ជកម្មសេរីទេ ដែលធ្វើឲ្យប្រទេសមានធនធានធម្មជាតិតិចរស់បាន។
នាវេទិកាពិភពលោករបស់មហាសន្និបាតអង្គការសហប្រជាជាតិនៅថ្ងៃ២៧ កញ្ញា លោកនាយករដ្ឋមន្ត្រី ស៊ីនហ្សូ អាបេ បានលើកឡើងពីភាពអកុសលរបស់ជប៉ុនដែលមិនសូវមានធនធានធម្មជាតិដូចបណ្តាប្រទេសភាគច្រើនរបស់ពិភពលោក។ ក៏ប៉ុន្តែ លោកនាយករដ្ឋមន្ត្រី ក៏បានសង្កត់ធ្ងន់ថា នេះ មិនមែនជាឧបសគ្គក្នុងការអភិវឌ្ឍប្រទេស និងកំណើនសេដ្ឋកិច្ចឡើយ។
លោកនាយករដ្ឋមន្ត្រីថ្លែងថា ក្រៅពីធ្យូងថ្ម ដែលជាធនធានធម្មជាតិធ្វើឲ្យជាជប៉ុនក្លាយជាប្រទេសឧស្សាហូបនីយកម្ម ជប៉ុន គ្មានធនធានអ្វីផ្សេងទៀតឡើយ។ « ការប្រឹងប្រែង តាមរយៈការអនុវត្តគោលនយោបាយពាណិជ្ជកម្មសេរី បានធ្វើឲ្យជប៉ុនមានកំណើនដូចបច្ចុប្បន្ន ដែលនេះ ក៏ជាសារសម្រាប់បណ្តាប្រទេស ដែលមិនសូវមានធនធានធម្មជាតិផងដែរ»។ លោក បន្ថែមយ៉ាងដូច្នេះ។
នាឱកាសដដែលនោះ ប្រមុខរដ្ឋាភិបាលជប៉ុន បានលើកយកផែនការពាណិជ្ជកម្មសេរីមួយចំនួន ដែលជប៉ុន កំពុងតែយកចិត្តទុកដាក់ដែលរាប់បញ្ចូលទាំង កិច្ចព្រមព្រៀងភាពជាដៃគូអភិវឌ្ឍន៍ និងគ្រប់ជ្រុងជ្រោយអន្តរប៉ាស៊ីហ្វិក ឬ TPP11, កិច្ចព្រមព្រៀងភាពជាដៃគូជប៉ុន-សហភាពអឺរ៉ុប និងជាពិសេសនោះ លោក បានបង្ហាញការគាំទ្រយ៉ាងពេញទំហឹងចំពោះការចរចាលើសំណើកិច្ចព្រមព្រៀងពាណិជ្ជកម្មសេរី ភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់ (RCEP) ផងដែរ។
ឆ្លៀតឱកាស នៃការថ្លែងសុន្ទកថាប្រចាំឆ្នាំនៃមហាសន្និបាត ដែលជាកន្លែងលោក ផ្តល់យោបល់ក្នុងការដោះស្រាយបញ្ហាគំរាមកំហែងសន្តិសុខពិភពលោកនោះ លោកនាយករដ្ឋមន្ត្រី បានបញ្ជាក់ជាថ្មីពីចេតនារបស់ជប៉ុនក្នុងការទាមទារឲ្យមានការកែទម្រង់ក្រុមប្រឹក្សាសន្តិសុខ ដែលកំពុងតែគ្រប់គ្រងដោយមហាអំណាចប្រាំ រួមមាន ចិន បារាំង រុស្សី អង់គ្លេស និងអាមេរិកផងដែរ៕
Tag:
ជប៉ុន
ពាណិជ្ជកម្មសេរី
UN
© រក្សាសិទ្ធិដោយ thmeythmey.com