ទីតាំងសំខាន់ៗជាង១០កន្លែងឆ្លុះបញ្ចាំងតម្លៃសិល្បៈអក្សរសិល្ប៍ខ្មែរនៅខេត្តបាត់ដំបង

ជាតិ

សង្គមជាតិ

ទីតាំងសំខាន់ៗជាង១០កន្លែងឆ្លុះបញ្ចាំងតម្លៃសិល្បៈអក្សរសិល្ប៍ខ្មែរនៅខេត្តបាត់ដំបង

29, Sep 2018 , 9:30 pm

រូបភាព

ដោយ: ប៉ូ សាគុន

បាត់ដំបង៖ ទីតាំងប្រវត្តិសាស្ត្រដែលមានក្នុងអក្សរសិល្ប៍ខ្មែរ ជាង១០កន្លែងនៅខេត្តបាត់ដំបង ទាំងឯកសារប្រវត្តិសាស្ត្រ ប្រលោមលោក ចម្រៀង និងកំណាព្យជាដើមនោះ ត្រូវបានមហោស្រពអក្សរសិល្ប៍ខ្មែរ រំលេចឱ្យឃើញក្នុងកម្មវិធីរបស់ខ្លួន។ មហោស្រពអក្សរសិល្ប៍ខ្មែរ ដែលបានរៀបចំនៅបាត់ដំបង ពីថ្ងៃទី២១ ដល់ថ្ងៃទី២៣ខែកញ្ញា។ មហោស្រពនេះទាក់ទាញអ្នកចូលរួម ទាំងចាស់ក្មេងប្រមាណជា១៥០០នាក់។

ជាមហោស្រពដែលលើកស្ទួយវិស័យតែងនិពន្ធ និងផ្សព្វផ្សាយពីអក្សរសាស្ត្រខ្មែរ។ មហោស្រពអក្សរសិល្ប៍ខ្មែរ បានរៀបចំកម្មវិធីសំខាន់ៗជាច្រើនដូចជា កម្មវិធីកង់ និងកំណាព្យ ពិព័រណ៍សៀវភៅ និងសិល្បៈចក្ខុទស្សន៍ កម្មវិធីអានតាមកន្លែង វេទិកាពិភាក្សាអក្សរសិល្ប៍ខ្មែរ សិក្ខាសាលាហ្វារពន្លឺសិល្បៈ ការសម្ដែងល្ខោននិយាយរឿងកុលាបប៉ៃលិន កម្មវិធីអានជាមួយកុមារ សិក្ខាសាលានិពន្ធបែបច្នៃប្រឌិត ទស្សនកិច្ចវប្បធម៌ ជួបជាមួយអ្នកនិពន្ធ និងការលក់បន្តនៅបាត់ដំបង ការប្រកាសជ័យលាភីប្រឡងស្នាដៃនិពន្ធ និងកំណាព្យ និងសិល្បៈទស្សនីយភាពកម្រ ដែលធ្វើនៅទីតាំងផ្សេងៗគ្នា។

ទីតាំង៣កន្លែង មានក្នុងបទចម្រៀងរបស់កវី គង្គ ប៊ុនឈឿន ដូចជាកន្លែងដើមដូងទី១០ ស្ពានថ្មចាស់ និងទីតាំងដើមអម្ពិលផ្អែម។ ការរៀបចំនេះ ដើម្បីរម្លឹកពីស្នាដៃរបស់កវីជំនាន់មុន ដែលផ្សារភ្ជាប់ជីវិត និងធម្មជាតិ។ ចំណែកទីតាំងប្រវត្តិសាស្ត្រពីសម័យលោកម្ចាស់វិញ មាននៅវិហារចិន វត្តដំរីស សាលាខេត្តចាស់ វត្តកំផែងជាដើម។ ទស្សនកិច្ចនេះ បានរៀបរាប់ប្រវត្តិខ្លះៗរបស់សំណង់ទាំងនេះផង។ តាមឯកសារស្រាវជ្រាវ សំណង់ទាំងនេះមានអាយុកាលជាង១០០ឆ្នាំមកហើយ។

ក្រៅពីទីតាំងប្រវត្តិសាស្ត្រ នៅមានកម្មវិធីជាច្រើនកន្លែងផ្សេងទៀត ដែលនិយាយពីអក្សរសាស្ត្រខ្មែរ ក្នុងពេលបច្ចុប្បន្ន និងអតីតកាល ព្រមទាំងការពិភាក្សាពីហេតុផលមួយចំនួន ធ្វើឱ្យខេត្តបាត់ដំបង ពោរពេញដោយកវី និងអ្នកនិពន្ធ។

សូមបញ្ជាក់ថា ឆ្នាំ២០១៨នេះ មហោស្រពអក្សរសិល្ប៍ខ្មែរ ត្រូវបានរៀបចំជាលើកទី២ នៅខេត្តបាត់ដំបង។ កាលពីមហោស្រពលើក១ ប្រារព្ធឡើងនៅខេត្តសៀមរាប។ នៅឆ្នាំ២០១៩ មហោស្រពអក្សរសិល្ប៍ខ្មែរ គ្រោងធ្វើនៅភ្នំពេញ៕