បទយកការណ៍ / បទសម្ភាសន៍
សិលាចារឹកភាសាចាមនៅអង្គរវត្ត៖ កូនបាឡាត់កំពង់សៀមជាអ្នកមកចារ
×
ភ្នំពេញ៖ អ្នកស្រាវជ្រាវភាសាចាមមួយរូបលោក ឡឹប កើ បានធ្វើបទបង្ហាញមួយទាក់ទងនឹងសិលាចារឹកភាសាចាមនៅប្រាសាទអង្គរវត្ត និងនៅប្រាសាទខ្លះទៀតនៅរមណីយដ្ឋានអង្គរ ដែលធ្វើឡើងនៅពុទ្ធសាសនបណ្ឌិត្យ នៅព្រឹកថ្ងៃទី២៨ កញ្ញា ឆ្នាំ២០១៨។ វត្តមានសិលាចារឹកភាសាចាមនៅអង្គរវត្ត បានបង្ហាញឱ្យដឹងថា អ្នកដែលមកចារនោះជាជនជាតិចាម មិនបញ្ជាក់ឈ្មោះទេ តែប្រាប់ថាជាកូនបាឡាត់ខេត្តកំពង់សៀមនៅសម័យនោះ។
តាមការបកស្រាយរបស់លោក ឡឹប កើ អ្នកដែលចារនោះជាកម្មករសម័យបារាំង ដែលត្រូវបានជួលឱ្យមកចម្លងសិលាចារឹកនៅតាមប្រាសាទនានា។ លោកបញ្ជាក់ថា កម្មករទាំងនោះមានចំនួន ១២នាក់ ក្នុងនោះមានជនជាតិចាម ២នាក់។
តាមន័យនៃសិលាចារឹក វាត្រូវបានចារនៅឆ្នាំ ១៨៨១ ជាប្រភេទអក្សរចាមបុរាណ។ អ្វីដែលធ្វើឱ្យអ្នកស្រាវជ្រាវកាន់តែភ្ញាក់ផ្អើលទៀតនោះ គឺអ្នកដែលមកចារនោះជាអ្នកខេត្តកំពង់ចាមបច្ចុប្បន្ន ដោយមិនមែនអ្នកនៅតំបន់កំពង់ឆ្នាំង ដែលបច្ចុប្បន្ននៅប្រើប្រាស់អក្សរចាមច្រើនជាងគេនោះទេ។ ក្នុងសិលាចារឹកនេះ ក៏បានបង្ហាញថា អ្នកកំពង់ចាមមានចំណេះផ្នែកអក្សរ និងនៅប្រើប្រាស់អក្សរចាមនៅឡើយ មុនសម័យខ្មែរក្រហម។ តែក្រោយមក ស្រុកកំពង់សៀម ដែលបច្ចុប្បន្នជាផ្នែកមួយនៃខេត្តកំពង់ចាម លែងមានជនជាតិចាមរស់នៅទៀតហើយ។ ក្រោយសម័យ ប៉ុល ពត ពួកគេបានប្តូរទៅរស់នៅភូមិកោះក្របី កោះប៉ែន និងភូមិរកា តែនៅសល់ស្លាកស្នាមគ្រឹះសំណង់វិហារចាស់ៗដែលបន្សល់ទុកនៅសម័យក្រោយមក៕
ព័ត៌មានលម្អិត សូមស្ដាប់បទសម្ភាសរវាងអ្នកសារព័ត៌មានថ្មីៗ និងលោក ឡឹប កើ ដូចតទៅ
Tag:
សិលាចារឹកភាសាចាម
ឡឹប កើ
© រក្សាសិទ្ធិដោយ thmeythmey.com