ជាតិ
សង្គមជាតិ
សិស្សនិន្ទេសA ខេត្តសៀមរាប៣១នាក់ ទទួលបានម៉ូតូម្នាក់មួយគ្រឿងពីសម្តេច ទៀ បាញ់ រូបភាព៖ ហ្វេសប៊ុកអភិបាលខេត្ត សៀមរាប
× សៀមរាប៖ នៅរដ្ឋបាលខេត្តសៀមរាប នៅព្រឹកថ្ងៃទី២៩ កញ្ញា បានរៀបចំពិធីប្រគល់រង្វាន់ម៉ូតូដល់សិស្សានុសិស្សដែលប្រឡងជាប់និន្ទេសA សម្រាប់ឆ្នាំសិក្សា ២០១៧-២០១៨។ ពិធីធ្វើឡើងក្រោមវត្តមានសម្តេច ទៀ បាញ់ រដ្ឋមន្ត្រីក្រសួងការពារជាតិ និងជាប្រធានក្រុមការងារថ្នាក់ជាតិចុះជួយខេត្តសៀមរាប។
នៅឆ្នាំនេះ សិស្សជាប់និន្ទេសA ក្នុងខេត្តសៀមរាបមានចំនួន ៣១នាក់ ក្នុងនោះស្រី ១៨នាក់។ ពួកគេទទួលបានការលើកទឹកចិត្តនូវម៉ូតូម្នាក់មួយគ្រឿង និងសាំងចំនួន ៥២លីត្រ ដែលជាការឧបត្ថម្ភរបស់សម្តេច ទៀ បាញ់។
តាមរបាយការណ៍របស់ប្រធានមន្ទីរអប់រំ យុវជន និងកីឡា ខេត្តសៀមរាប លោក សយ ទិត្យាវង្ស ការប្រឡងសញ្ញាបត្រមធ្យមសិក្សាទុតិយភូមិនៅឆ្នាំនេះ ខេត្តសៀមរាបមាន១២មណ្ឌល ក្នុងនោះមាន ៣១៩បន្ទប់ ផ្នែកវិទ្យាសាស្ដ្រមាន ៦មណ្ឌល ស្មើ១៤២បន្ទប់ និងផ្នែកវិទ្យាសាស្ដ្រសង្គមមាន ៦មណ្ឌល ស្មើនឹង ១៧៧បន្ទប់។ ចំណែកបេក្ខជនប្រឡងសរុប ៧,៨៣០នាក់ ក្នុងនោះស្រី ៤,៣៨៣នាក់។
សម្រាប់លទ្ធផលនៃការប្រឡង បេក្ខជនជាប់ស្ថាពរមានចំនួន ៥,៩៧០នាក់ ស្រី ៣,៣៨០នាក់ ក្នុងនោះនិទ្ទេសA មាន៣១នាក់ និន្ទេសB ១៤៧នាក់ និន្ទេសC ៤៧៧នាក់ និន្ទេស D ១,៥៣៣នាក់ និងនិន្ទេស E ចំនួន ៣,៧៨២នាក់។
ក្នុងឱកាសនោះ សម្តេច ទៀ បាញ់ បានកោតសរសើរដល់ការខិតខំប្រឹងប្រែងរបស់សិស្សានុសិស្ស និងអរគុណដល់អាណាព្យាបាល លោកគ្រូអ្នកគ្រូ ដែលខិតខំបង្ហាត់បង្រៀនដល់ពួកគេរហូតទទួលលទ្ធផលល្អបែបនេះ៕
© រក្សាសិទ្ធិដោយ thmeythmey.com