សាស្រា្តចារ្យកំណាព្យ ជ័យ ចាប៖ យុវជន កំពុងតែប្រើប្រាស់ភាសាខ្មែរខុសក្បួន

ជាតិ

សង្គមជាតិ

សាស្រា្តចារ្យកំណាព្យ ជ័យ ចាប៖ យុវជន កំពុងតែប្រើប្រាស់ភាសាខ្មែរខុសក្បួន

30, Sep 2018 , 11:09 am

រូបភាព

រាប់ពីឆ្វេងទៅលោកសាស្រ្តចារ្យផ្នែកកំណាព្យ ជ័យ ចាប អង្គុយទី២

ដោយ:

ភ្នំពេញ៖ យុវជនមួយចំនួន កំពុងប្រើប្រាស់ភាសាជាតិខុសក្បួនខ្នាត ហើយបែរជាប្រើភាសាជាតិដទៃជំនួសទៅវិញ (សរសេរបែបឡាតាំង)។ ការសរសេរឡាតាំងខុសក្បួនរបស់យុវជននេះ អាចធ្វើឲ្យកម្ពុជាប្រឈមនឹងការបាត់បង់តម្លៃ និងអត្តសញ្ញាណជាតិខ្លួន។ នេះជាការលើកឡើងរបស់លោក ជ័យ ចាប សាស្ត្រាចារ្យផ្នែកតែងកំណាព្យ នៅសិក្ខាសាលាដែលស្តីពី «ភាពឆកល្វេងនៃការប្រើប្រាស់ភាសាខ្មែរបច្ចុប្បន្ន» ។

មានសំឡេង

ថ្លែងប្រាប់ទៅសិក្ខាកាមជាច្រើនរូប លោក ជ័យ ចាប បានមើលឃើញចន្លោះប្រហោងរបស់យុវជន ដែល ប្រើប្រាស់ភាសាខ្មែរមិនត្រឹមត្រូវតាមក្បួន ដែលវាបង្ហាញពីការមិនគោរព និងមិនផ្តល់តម្លៃដល់ជាតិសាសន៍របស់ខ្លួន។ ជាពិសេសយុវជនកំពុងតែឈ្លក់វង្វេង នឹងការប្រើប្រាស់បណ្តាញសង្គម ព្រមទាំងស្មេរ អ្នកអានព័ត៌មាន និងអ្នកនិពន្ធជាដើម ដែលនៅមានភាពឆក់ល្វេងក្នុងការប្រើប្រាស់ភាសាខ្មែរ។

អ្វីដែលលោក ជ័យ ចាប បានកត់សម្គាល់នោះ គឺបញ្ញាវ័ន្ត អ្នកនិពន្ធ អ្នកសារព័ត៌មាន អ្នកធ្វើស្លាកយីហោ ឬធ្វើស្លាកពាណិជ្ជកម្មនានា ប្រើប្រាស់ភាសាមិនទាន់មានភាពឯករាជ្យគ្នានៅឡើយ ហើយការប្រើប្រាស់ក៏មានកំហុសខុសឆ្គង នៅក្នុងការសរសេរ។ ចំណែកអ្នកខ្លះទៀត សរសេរជាភាសាអង់គ្លេស តែប្រកបជាភាសាខ្មែរជាដើម។ ទាំងនោះហើយជាក្តីកង្វល់របស់លោក ជ័យ ចាប ដែលភ័យខ្លាចនឹងការធ្លាក់ចុះនៃអក្សរសាស្ត្រខ្មែរ។

លោកចង់ឲ្យកូនខ្មែរទាំងអស់យកចិត្តទុកដាក់ក្នុងការការពារ និងឈ្វេងយល់ពីរបៀបប្រើប្រាស់ភាសាខ្មែរ និងវេយ្យាករណ៍ ដើម្បីជៀសផុតពីការបាត់បង់អត្តសញ្ញាណជាតិរបស់ខ្លួន។ «ខ្ញុំមិនបន្ទាសទៅនរណាម្នាក់ទេ យើងមានតែរលឹកឡើងវិញ ដោយធ្វើការណែនាំ និងផ្សព្វផ្សាយទៅសាធារណៈ ជាពិសេសយុវជន ឲ្យយល់ដឹងកាន់តែច្បាស់ ដើម្បីធ្វើការកែតម្រូវនូវចំណុចខ្វះខាតក្នុងការប្រើប្រាស់ភាសាខ្មែរ ឲ្យបានត្រឹមត្រូវ និងគោរពទៅតាមក្បូនសរសេររបស់សម្តេចព្រះសង្ឃរាជ ជួន ណាត»។ នេះជាការលើកឡើងរបស់លោក ជ័យ ចាប ដែលបន្ថែមថា យុវជនត្រូវតែរួមគ្នាការពារ ថែរក្សា និងស្រឡាញ់អក្សរសាស្ត្រខ្មែរ។

ដើម្បីឲ្យភាសាជាតិនៅគង់វង្សយូរអង្វែង លោក ជ័យ ចាប ជំរុញឲ្យសមាជិកក្រុមប្រឹក្សាជាតិភាសាខ្មែរ សមាគមអ្នកនិពន្ធខ្មែរ ព្រមទាំងដៃគូពាក់ព័ន្ធ យុវជន គ្រូបង្រៀន អ្នកនិពន្ធ និងអ្នកសារព័ត៌មាន ចូលរួមសហការគ្នា បង្កើតកម្មវិធីដែលទាក់ទងនឹងអក្សរខ្មែរឲ្យកាន់តែច្រើន ដើម្បីលើកស្ទួយផ្នែកអក្សរសាស្ត្រឲ្យរីកចម្រើន៕